Македонија
Османи: Политичко и воено зајакнување на алијансата е наш заеднички интерес

Заврши првиот ден на Северноатлантскиот совет на НАТО на ниво на министри за надворешни работи, на кој учествуваше и министерот за надворешни работи на Република Северна Македонија, Бујар Османи, што се одржа во седиштето на алијансата во Брисeл.
Ова е прв состанок со физичко присуство на министер за надворешни работи на министерските состаноци од нашето зачленувањето во НАТО, истакнуваат од кабинетот на Османи.
На денешните две сесии министрите се осврнале на прашања од стратешки приоритет за алијансата, како што се регионалната стабилност, хибридни и сајбер-предизвици, контрола на оружјето, разоружувањето и непролиферацијата. Била разгледана и стабилноста во соседството на НАТО и борбата против тероризмот, како и состојбите во Авганистан и Ирак.
На посебна сесија министрите ги изнеле своите сугестии и видувања во однос на развојот на документот „НАТО 2030“, кој ќе биде предмет на усвојување на претстојниот состанокот на шефовите на држави и влади на Северноатлантскиот совет.
Во своите излагања министерот Османи ја истакна посветеноста на нашата држава како нов сојузник во рамките на алијансата, во зајакнување на регионалната безбедност, како и активна партиципација во рамките на одржувањето на глобална безбедност.
Османи го потенцирал придонесот на земјата во однос на приоритетите на алијансата во справувањето со безбедносните закани и предизвици. Во тој контекст министерот Османи го истакнал значењето што алијансата го придава на борбата против тероризмот и преземените натамошни активности за справување со оваа закана. Изразил и поддршка на стратешките предлози во врска со натамошниот концептуален развој на иднината на алијансата содржани во „НАТО 2030“.
„Агендата на ‘НАТО 2030’ во вистинско време нуди амбициозни видувања за иднината на алијансата во наредната деценија. Ние се согласуваме со поставените цели – НАТО да остане воено силен, да стане политички посилен и да има позасилен глобален пристап“, истакна Османи.
Во рамките на Советот на министрите за надворешни работи на НАТО во Брисел, Османи се сретна и со државниот секретар на САД, Ентони Блинкен. Тема на разговори била стратешкото партнерство меѓу Северна Македонија и САД, што претставува основа за долгорочно пријателство меѓу двете земји.
На маргините на состанокот министерот Османи оствари билатерална средба со министерот за надворешни работи на Словенија, Анже Логар. На средбата биле отворени повеќе актуелни теми – за билатералните односи, европската перспектива на земјата, особено со фокус на претстојното претседателство на Словенија со ЕУ во втората половина на 2021 година.
„Нашата цел е јасна, полноправно членство во ЕУ и сите наши напори се во таа насока, да работиме на европски начин за да ги достигнеме европските вредности. Очекуваме валоризација на постигнатото од нашите партнери“, посочи Османи на средбата со Логар.
Министерскиот состанок на НАТО продолжува и утре со многубројни теми важни за иднината на алијансата од интерес на зачувување на мирот и безбедноста на светскиот поредок.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити изврши увид на градежните активности за изградба на примарната водоводна мрежа во Мерово, Желино

Првиот заменик-претседател на Владата и министер за животна средина, Изет Меџити, придружуван од градоначалникот на општина Желино, Блерим Сејдиу и пратеници од регионот, денеска изврши увид на градежните активности за реализација на проектот за изградба на примарната водоводна мрежа во селото Мерово, општина Желино.
Проектот предвидува изградба на дистрибутивната мрежа за водоснабдување во рамките на селото, изградба на поврзувачки цевковод од резервоарот до главната мрежа, отворање на нов бунар покрај постојниот, како и рехабилитација и проширување на веќе изграден резервоар.
Досега е извршено отворање на еден бунар и изградба на еден резервоар, кои во рамките на овој проект ќе бидат финализирани и модернизирани.
Вкупната вредност на инвестицијата изнесува 15.847.359 денари, обезбедени од буџетот на надлежното министерство, а градежните активности се очекува да завршат до крајот на 2025 година.
„Одржливото снабдување со вода е еден од најважните приоритети на нашата Влада, бидејќи е директно поврзано со квалитетот на животот на граѓаните и развојот на нашите населени места. Со овој проект ставаме крај на децениските проблеми со недостиг на водовод во Мерово и им обезбедуваме на жителите подобри услови за живот“, истакна првиот заменик-претседател на Владата, Изет Меџити.
Оваа инвестиција претставува дел од стратешките проекти кои имаат за цел унапредување на основната инфраструктура и задоволување на елементарните потреби на граѓаните во сите населени места на општина Желино и пошироко.
Македонија
На Табановце се чека околу 10 до 15 минути за излез од државата

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила.
Сообраќајот на државните патишта се одвива непречено, по суви коловози. Интензитетот на сообраќајот на патиштата надвор од градските средини е зголемен.
Поради летните одмори, се бележи зголемена фреквенција на возила, на ГП Табановце времето на чекање за излез е околу 10-15 минути. На останатите гранични премини од македонска страна нема подолги задржувања при влез или излез од државата.
Македонија
Општина Карпош: Го демантираме другарот на Мицкоски, Сотир Лукровски, дека има нерешени 11 000 предмети за легализација, а тој ќе ги решел за две и пол години

„Општина Карпош во целост го демантира другарот на Христијан Мицкоски, Сотир Лукровски, дека во општина Карпош има нерешени 11 000 предмети за легализација и замислете, тој ќе ги решел за две и пол години. Фактите говорат дека општина Карпош од 2011 до 2018 година има примено вкупно 12688 барања и од нив досега се решени 9385, а останати се уште 3303 барања“, велат од општина Карпош.
„Најголем дел од нив се со нерешени имотно-правни и оставински постапки и се чека на завршување на судска постапка, на друг дел е побарана дополнителна документација, и мал дел се во постапка за решавање.
За кандидатура на градоначалник основен услов за кандидатот е да биде добро информиран и да не кажува лаги. Ако кандидатот во кампања кажува лаги, какво ли ќе биде неговото функционирање како Градоначалник!?
Општина Карпош го замолува г-дин Христијан Мицкоски да го едуцира својот кандидат и го замолуваме да не ги вознемирува директорките на градинките и училиштата“, соопшти општина Карпош.