Македонија
Османи: Со Бугарија годинава имавме динамичен и интензивен дијалог за надминување на разликите
Министерот за надворешни работи Бујар Османи одржа годишен брифинг за претставниците на медиумите, кои ја следат надворешната политика, посветен на најзначајните надворешно-политичките активности на министерството за 2021 година.
Во рамките на брифингот беа истакнати постигнувањата и предизвиците во однос на добрососедските односи, европското досие на земјава, унапредувањето на билатералните односи, поставувањето на државата на мултилатерален план, како и многубројните проекти што се однесуваат на економската дипломатија и дијаспората.
Во областа на мултилатерализмот, министерот ја подвлече важноста од нашето претседавање со ОБСЕ во 2023 година, како и поднесените кандидатури за трите главни тела на ООН – Економскиот и социјален комитет (ЕКОСОК), Советот за човекови права и Советот за безбедност.
Османи ги издвои односите со САД како особено значајни не само за стабилноста на земјава, туку и на регионот како целина. Ги нагласи бројните контакти со високи американски претставници на кои беа истакнати одличните билатерални, односи и заедничките заложби за зајакнување на стратешкото партнерство преку гарантирање на слободата, безбедноста и демократскиот просперитет.
„Изминатава година ги посетив речиси сите земји од континентот Европа, а доста од нив имаа и возвратни посети на нашата држава на ниво на министри за надворешни работи. Од аспект на односите со Германија, тие остануваат наш значаен партнер во политичка и економска смисла. Имав исклучителни успешни официјални посети на Берлин на кои беше демонстрирана силната поддршка за нашите ЕУ интегративни процеси. Со Франција го потпишавме Договорот за формирање на Француската агенција за развој АФД во нашата држава, додека со Обединетото кралство го одржавме и првиот инаугуративен состанок на Советот за партнерство, трговија и соработка, што беше прв во Европа по брегзит“, истакна министерот Османи во делот на билатералната соработка со европските земји.
Во однос на европската перспектива, министерот нагласи дека нашата држава има кристално чисто досие што во неколку наврати е потврдено не само од институциите на ЕУ, туку и од останатите 26 земји членки, при што за следниот исчекор преостанува тргањето на ветото од Република Бугарија. Кога станува збор за односите со Бугарија, Османи посочи дека изминатава година постоеше динамичен и интензивен дијалог насочен кон надминување на разликите што ги имаме, сè со цел продолжување на нашиот евроинтегративен процес.
Министерот Османи се осврна и на постигнувањето на полето на економската дипломатија, нагласувајќи го упатувањето на економски советници во нашите амбасади во Абу Даби, Анкара, Варшава и Минхен, како и во Организацијата за храна и земјоделство на Обединетите нации или ФАО, во Рим, што има за цел унапредување на економската соработка и привлекување странски инвестиции. Во насока на зајакнување на видливоста на земјава во светски рамки, го истакна учеството на Северна Македонија на ЕКСПО- ДУБАИ 2020, што претставува одлична можност за промоција на нашите бизнис-можности, туристичкиот потенцијал, етничката и културната разновидност.
Како особено значајни ги истакна проектите кои се однесуваат на подобрувањето на услугите на дијаспората, нагласувајќи го поставувањето на девет базни и пет мобилни станици во нашите амбасади, со што значително се скрати постапката за издавање патни исправи, а воедно, го нагласи постигнатиот успех за признавање на нашите возачки дозволи во 19 држави. Нашата посветеност на дијаспората се демонстрира и со упатувањето на првите дипломати за дијаспора, кои со својот ангажман треба да овозможат подобар увид во нивните потреби и зајакнување на соработката со матичната земја. Воспоставено е и признание за истакнатите припадници на дијаспората наречен МКарта, кои со своето делување придонеле за вистинска промоција на земјава во странство.
Што се однесува на редовните активности на Министерството, министерот Османи се осврна и на зајакнување на нашите дипломатска покриеност, нагласувајќи дека од преземањето на функцијата упатени се амбасадори во седумнаесет земји во светот, како и дека се работи на пополнување и на другите испразнети амбасадорски позиции. Дополнително, нагласи дека за 2022 година предвиден е најголемиот буџет на Министерството за надворешни работи во историјата во висина од една милијарда и шестотини и педесет милиони денари, или околу 27 милиони евра, со кои е предвидена реализација на бројни капитални инвестиции во нашите амбасади во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
АХВ: Уништени над 1 тон небезбедна храна од продавниците за здрава храна
Илјада и десет килограми небезбедна „здрава храна” уништија инспекциските служби на Агенција за храна и ветеринарство кај 14 оператори во рамки на 373 контроли спровдени неделава, кај оператори именувани како објекти за производство и промет со здрава храна, соопшти АХВ.
Со контролите утврдено било дека 14 оператори воопшпто не биле регистрирани како оператори со храна во Агенцијата.
За утврдените недоследности со контролите, биле издадени 65 решенија, 19 опомени и 44 парични казни, во вкупна вредност од 20.550 евра.
„Кај 9 оператори со контролите утврдени биле незадоволителни хигиенски и технички услови во објектите, кај 7 била пронајдена храна со поминат рок на употреба. Кај двајца оператори најдена била и храна со непознато потекло. Несоодветно означена била храната кај 18 оператори, а кај 23, вработените немале спроведено задолжитрелен здравствен преглед. Двајца од операторите немале воспоставени процедури за Добра производствена и Добра хигиенска пракса, или не воделе соодветни записи. Кај исто толку оператори не била извршена задолжителна дезинфекција, дезинсекција и дератизација во објектите“, пишува во соопштението на АХВ.
Македонија
СДСМ: Наместо луксуз на власта со авиони, да се пренаменат пари за 600 евра минимална плата
Животот во Македонија станува сѐ поскап, работниците едвај врзуваат крај со крај, а власта сѐ луксузира врз грбот на народот, велат од СДСМ.
„Според последните податоци, синдикалната кошничка во февруари достигна 67.400 денари. На едно четиричлено семејство не му се доволни ниту 3 минимални плати месечно за да ги покрие основните потреби. Над 200 илјади работници земаат плата под 30.000 денари. Со сегашното ниско ниво на минимална плата не можат да се покријат трошоците за основни потреби, храната, сметки.. Тешкото секојдневие, високите сметки и поскапувањата ги доведоа работничките семејства на раб. И додека граѓаните се борат за корка леб, премиерот Христијан Мицкоски се луксузира на сметка на народот – со владини авиони, со скапи часовници од 60 илјади евра. Време е да се укине луксузот на власта, а работниците да добијат достоинствени плати, какви што заслужуваат. Бараме парите што власта ги планираше за нов авион да се пренаменат за минимална плата од 600 евра за сите работници. Нема повеќе оправдувања дека „нема пари“. Имало пари за нов авион, за мебел, за уредување кабинети, за службени автомобили. Нека направат ребаланс на Буџетот и нека ги пренаменат парите за плати. Доста е расфрлање со милиони за авиони – мали или големи – додека народот тоне. Доста е луксуз на грбот на народот“, стои во соопштението на СДСМ.
Македонија
Обвинителство: Забрана за две правни лица од Велешта да вршат ископ во близина на изворите за вода за пиење во Шум
Преземајќи истражни дејствија по наредба на Основното јавно обвинителство Струга за испитување на причините за загадувањето на водата од извориштето во селото Шум, истражните органи затекнаа работни машини на две правни лица од Велешта кои вршеле кршење, ископ и транспорт на карпи во поголем обем во непосредна близина на изворите, информираат од Обвинителството.
Како што се наведува во соопштението, поради сомненија за кривични дела – Незаконита експлоатација на минерални суровини од член 225-а и Загадување на водата за пиење од член 219 од Кривичниот законик, надлежниот јавен обвинител до судијата на претходна постапка веднаш достави предлог за определување мерки на претпазливост – забрани на правните лица да ги посетуваат парцелите каде вршеле ископ и забрана да преземаат какви било работни активности на подрачјето.
Основното јавно обвинителство Струга продолжува да презема дејствија за обезбедување докази и испитување на евентуална кривична одговорност во однос на енормното загадување на изворите во Шум од каде подрачјето на градот Струга се снабдува со вода за пиење, стои во соопштението.

