Македонија
Османи – Шаленберг: Македонија и Албанија веднаш и без одложување да ги почнат преговорите со ЕУ
Mинистерот за надворешни работи Бујар Османи му беше домаќин на сојузниот министер за европски и меѓународни работи на Република Австрија, Александар Шаленберг, кој е во работна посета на Република Северна Македонија.
Во пресрет на стратешката дебата на ЕУ за Западен Балкан, закажана за следната седмица во Брисел, како и претстојните јунски совети на ЕУ, во фокус на разговорите беше европското досие на нашата држава. Министрите се согласија дека нужно потребно е да се забрза пристапниот процес на сите земји од Западен Балкан, а особено да дојде до заслуженото отворање на пристапните преговори со Северна Македонија и Албанија, со што ќе се испрати силна порака дека Европската Унија ја смета интеграцијата на регионот за приоритетно прашање од геостратешки и безбедносен интерес, информираат од кабинетот на Османи.
„Aвстрија ни е стратешки партнер поради конзистентноста на поддршката што ја дава за интеграцијата на Западен Балкан во Европската Унија и особено за Република Северна Македонија. Tаа конзистентност во текот на годините се манифестира и во Брисел и во Скопје, еве вчера и во Софија. За тоа сме благодарни бидејќи да се има еден пријател како Австрија овде, во непосредното соседство на Западен Балкан, е исклучително важно“, истакна Османи.
На разговорите станало збор и за продлабочување на развиената економска соработка меѓу двете држави. Со оглед дека Австрија е меѓу најголемите инвеститори во нашата држава, Османи изразил очекување дека бројот на австриски директни инвестиции во Северна Македонија ќе продолжи да расте во периодот што претстои. Двајцата министри се заложиле двете земји посветено да работат на приближување на бизнисите и зголемување на трговската размена, при што директната соработка на стопанските комори од нашата држава со Австриската стопанска комора е од огромно значење.
Соговорниците се осврнале и на политичко-економските реперкусии, предизвикани од руската воена агресија врз Украина, при што обединетоста на Европа, како и соработката преку Партнерството за мир на Австрија со НАТО, е исклучително важно за надминување на актуелните геополитички и безбедносни предизвици.
На средбата биле разменети мислења и во врска со мултилатералната соработка, со акцент на идното претседавање на Северна Македонија со ОБСЕ во 2023 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
УЈП во 2025 собрале над четири милијарди евра од даноци
Управата за јавни приходи денеска информира дека во 2025 година во националниот буџет се собрани 4 милијарди и 426 милиони евра од даноци и социјални придонеси, што е 308,3 милиони евра повеќе во споредба со 2024 година.
Од вкупниот износ, како што посочуваат од УЈП, даночните приходи изнесуваат 2 милијарди и 334 милиони евра, при што е остварен раст од 7,5 проценти, односно 163,2 милиони евра повеќе од лани. Нагласуваат дека порастот е континуиран во текот на целата година, со поизразено темпо во втората половина од 2025 година, кога е реализиран околу четири петтини од годишниот раст.
-Приходите од ДДВ се темелат на стабилен раст на наплатата на данокот платен за промет во земјата, при што во повеќе месеци е забележан пораст од 10 до 13 проценти во однос на истиот период минатата година. Кај данокот на добивка растот произлегува од аконтативното плаќање за 2025 година на повисока даночна основица, како и од зголемената наплата на задржан данок од дивиденди и други приходи исплатени кон странски основачи и партнери на компаниите, каде што е регистриран раст од над 30 проценти. Во делот на данокот на личен доход, најголемо учество има данокот на плати кој бележи стабилен месечен раст и вкупен пораст над 10 проценти, а висок раст е остварен и кај данокот на доходите од договорни услуги, земјоделство и самостојна дејност. Кај социјалните придонеси се собрани 2 милијарди и 92 милиони евра, што е 145,2 милиони евра повеќе од 2024 година, односно раст од 7,5 проценти, соопштуваат од УЈП.
Овие резултати, како што посочуваат, се должат на засилената навремена наплата на обврските со заедничка одговорност на даночните обврзници, раното интервенирање и доследната примена на законските мерки.
Од Управата за јавни приходи најавуваат дека и во 2026 година ќе продолжат со активности за ефикасно, правично и транспарентно собирање на јавните приходи.
Македонија
Мицкоски: Се реализира проектот за изградба на училишна фискултурна сала во ООУ „Наум Охридски“
Премиерот Христијан Мицкоски преку социјалните мрежи информира дека се реализира проектот за изградба на училишна фискултурна сала во ООУ „Наум Охридски“ во населено место Црешево во Општина Гази Баба.
Како што посочува премиерот, проектот опфаќа реализација на современ спортски објект без гледалиште, наменет за изведување на наставата по физичко образование и рекреативни активности.
Со изградбата на овој објект, како што стои во објавата на Фејсбук, се создаваат безбедни, функционални и современи услови за физичка активност на учениците, што директно придонесува за нивниот здрав развој, зголемена физичка активност и подобар квалитет на образовниот процес.
-Проектот претставува значаен чекор во унапредувањето на училишната инфраструктура и вложување во иднината на младите генерации. Инвестицијата изнесува 33.047.868 денари, средства обезбедени од Буџетот на Владата преку Министерството за образование и наука. Проекти за трајна промена – темели за сигурна иднина, се посочува во објавата на премиерот Мицкоски.
Македонија
Затворен патот кон ХЕЦ Козјак поради голомразица
Патниот правец кон ХЕЦ Козјак е затворен за сообраќај поради појава на голомразица, информираат надлежните служби. Возачите се повикуваат на зголемена внимателност и да не се упатуваат кон овој правец сè додека не се подобрат условите за возење.
Во меѓувреме, сообраќајот на регионалниот пат Дебар – Маврово е нормализиран и се одвива без поголеми проблеми. На останатите државни патишта, сообраќајот тече непречено, по наместа влажни коловози.
Потсетување дека од 15 ноември 2025 година е во сила законската обврска за задолжително поседување зимска опрема во возилата, без разлика на моменталната временска состојба. Оваа обврска ќе важи до 15 март 2026 година.
Интензитетот на сообраќај на патните правци надвор од градските средини е умерен, а на граничните премини, од македонска страна, засега нема подолги задржувања за влез и излез од државата.

