Пратеничката на ВМРО-ДПМНЕ, Иванка Василевска на денешната прес-конференција ја обвини власта дека подготвува политички фалсификат и нерелевантен и фингиран попис. Таа нагласи дека пратеничката група на ВМРО-ДПМНЕ денеска во Собранието поднела предлог на закон за престанување на важење на Законот за попис, по итна постапка.

„ Сите факти и аргументи, ни говорат дека власта подготвува политички фалсификат и нерелевантен и фингиран попис. Од тие причини, како Пратеничката група на ВМРО-ДПМНЕ јасно и гласно кажуваме дека нема да бидеме нем набљудувач на овој крајно несериозен политички процес и затоа денес во Собранието на Република Македонија поднесовме Предлог на закон за престанување на важење на Законот за попис, по итна постапка.

На ова самоволие мора да му застанеме на патот и да не дозволиме криминален и насилнички попис. Оваа лакрдија што ни се случува во врска со пописот, ја најавувавме и предвидовме уште од самиот почеток. Но самобендисаната власт на чело со Зоран Заев, воопшто не сакаше да разговара и дебатира на оваа тема. Од редовна и статистичка операција, неспособноста на Зоран Заев и владата овој попис го претвори во политичка операција и пазарење, додворување и враќање на коалициски долгови“ изјави Василевска.

Таа рече дека пратеничката група на ВМРО-ДПМНЕ уште од самиот старт укажувала на многубројните недостатоци и аномалии на Законот за попис, поради што сега поднесуваат околу триесетина суштински амандмани, кои, како што рече, имаа за цел да го подобрат текстот на законот, но власта предводена од Зоран Заев не прифатила ниту еден амандман.

„ Нашите издржани забелешки и секојдневни укажувања за недостатоците и аномалиите на овој закон беа и се уште се, и тоа:

· злоупотреба на европското знаменце и европските вредности и скратената можност за стручна и опширна дебата,

· недостиг на консензус од сите политички партии,

· проблематична и недоречена методологија за спроведување на пописот,

· нефункционален и небезбеден систем за електронска евиденција на дијаспората, и

· погрешен тајминг за одржување на пописот, иако многу европски земји поради КОВИД кризата го одложија пописот за една година.

Но и покрај овие издржани аргументи, власта и Зоран Заев никако не отстапуваат од политичкиот договор и намерата по секоја цена да се одржи пописот. Нашата легитимна борба против одржување на ваков сомнителен и фингиран попис, го препознаа и огромен број на граѓани. За само неколку дена над 100 илјади граѓани, со име и презиме, јасно и гласно го кажаа своето мислење и недоверба и рекоа големо „НЕ“ за ваков попис“ додаде таа.

Пратениците од ВМРО-ДПМНЕ исто така бараат закажување на итна и неодложна седница на Собранието на која што ќе се изгласа овој Предлог на закон и ќе се стопира овој политички попис. За таа цел, Пратеничката група на ВМРО-ДПМНЕ апелира до сите пратеници, без разлика на која политичка партија и коалиција припаѓаат и без разлика на етничка и национална припадност, да го поддржат овој Предлог закон.

Василевска нагласи дека ВМРО-ДПМНЕ и пратеничката група на ВМРО-ДПМНЕ не се против попис на населението, бидејќи, како што рече таква статистичка операција е многу важна и неопходна за Република Македонија, но сакаат да упатат силна порака дека се и ќе бидат против фингиран и наместен попис.

Пратеникот од владеачката партија Миле Талески истакна дека премиерот Зоран Заев и вицепремиерот Љупчо Николовски се силно посветени на реализација на заложбите за градење праведно општество, правда и дисциплина на сите нивоа.

Во тоа како што рече, ќе помогне Акцискиот план за борба против корупцијата.

Според Талески преку ваквата акција се зајакнуваат капацитетите со цел да се обезбеди целосна подготвеност за бескомпромисна борба против корупцијата, непотизмот, судирот на интереси и злоупотреби на позициите.

„Никој не смее и нема да смее да затајува и забавува случаи каде има сомнежи за корупција“, вели Талески.

Додава дека со реализација на Акцискиот план ќе нема непотребни чекања на шалтерите за вадење на изводи од матичните книги.

Претседателот Стево Пендаровски во обраќањето на виртуелната конференција „Зелената агенда за Западен Балкан како поттик за заштита на водите во Република Северна Македонија“ истакна дека доколку не бидат превземени долгорочни мерки за нивна заштита, можеме неповратно да ги изгубиме.

Според некои проценки, истакна Пендаровски, во државата се прочистуваат само околу 3 до 4 проценти од вкупното количество отпадни води од рударството и индустријата, а најголем дел од непрочистената вода се испушта директно во почвата, во реките, акумулациите, езерата и јавната канализација.

Подеднакво сериозен проблем, според претседателот, е вадењето песок, чакал и камен од речните и езерските брегови и корита, со што како што рече, се врши легализирано уништување на речните корита.

Според Пендаровски проблемот е во ниското ниво на јавна свест.

Слаба алка во нашиот систем, според претседателот, е инспекцискиот надзор, за кој рече дека е нередовен и реактивен, поради законски недоречености и буџетски ограничувања.