Министерот за надворешни работи, Бујар Османи, на денешната прес-конференција ја претстави иницијативата „Преспа форум за дијалог“ – платформа наменета да ги заштити, да ги промовира и да ги канализира придобивките и значењето на трите политички договори: Охридскиот рамковен договор, договорот за пријателство со Бугарија и договорот од Преспа.

„Почетокот на годината претставува убава можност да ги претставиме иницијативите на кои сакаме да се посветиме оваа година, иницијативи што произлегуваат од мојата мандатна мисија, иницијативи што сметам дека се важни за земјава и особено за нашата надворешна политика. „Иницијативата 8“ и „Преспа форум за дијалог“ ќе бидат платформи преку кои ќе се продлабочуваат добрососедските односи и ќе се унапредува регионалната соработка“, истакна Османи.

Идејата за лансирање еден ваков мултидимензионален проект се раѓа со стекнувањето на политичката тежина на трите договори и изворниот know-how на нашата земја во однос на дијалогот и соработката, со што се отвора можност, но и обврска да се отвори интелектуална и политичка дебата, од која би можеле да произлезат идеи, практични решенија и јасни одговори на отворени прашања од регионален и глобален карактер.

„’Преспа форум за дијалог’ ќе биде наш, автентичен придонес кон безбедноста, стабилноста и политичката соработка во регионот, но и одлична можност да го зајакнеме авторитетот на самите договори, да ја засилиме нивната улога, како и да обезбедиме нивна соодветна примена во справување со актуелните современи предизвици“, нагласи Османи.

Во рамките на „Преспа форумот“ во текот на целата година ќе бидат организирани помали настани (тематски работилници и семинари) со високопрофилирани учесници од политичките, но и од академските ешалони. Главниот настан на годишно ниво ќе биде во форма на меѓународна конференција, кој се очекува оваа година првпат да се реализира од 15 до 17 јуни, и тоа во Охрид, што соодветствува и со годишнината од потпишувањето на договорот од Преспа.