Претседателот на ВМРО-ДПМНЕ Христијан Мицкоски вечерва од Вевчани истакна дека на граѓаните им се случува инфлација, додавајќи дека покрај пораст на цените на горивата, маслото, шеќерот, брашното се очекува силна енергетска криза, а како што вели тој, владата покажала дека не умее да се справи со проблемите и токму поради тоа се потребни промени.

„ Тие се толку отсутни од реалноста што чекаат повторно да дојдеме до голем тресок за да потоа се растрчаат и започнат да обвинуваат други за кризата која што ним им се случува, а од кој жртва е народот. Ако дојде до такви големи шокови, ќе дојде до уште поголема сиромаштија од таа што е до сега. Владата покажа дека не умее да се справува со проблемите, и затоа потребни се сериозни промени, рече Мицкоски.

Мицкоски потенцираше и за скандалот кој што денеска ВМРО-ДПМНЕ го обелодени а тоа е дека полицијата на Оливер Спасовски преку злосторничко здружување вршеле притисоци и малтретирање на народот а со тоа извршиле тешко кривично дело, порачувајќи дека ако народот одлучи да излезе и да гласа и да даде доверба, тогаш полицијата на Спасовски, заканите и поткупот на Заев и обвинителството на Русковска не може да го спасат, бидејќи народот е газда на оваа земја.

Наместо да решаваат вистински проблеми, гледаме дека тие се занимаваат со притисоци, прогон и малтретирање на опозицијата. Тоа го покажува и случајот кој денес го објавивме каде се гледа комуникација помеѓу полицајци блиски до нив, кои направиле злосторничко здружување за да следат, пишуваат казни на народот, малтретираат и заплашуваат. Оној дел од полицијата на Спасовски и Заев кои решиле пред народот да ја стават партијата на власт извршиле тешко кривично дело, директно потврдувајќи зошто земјава е прогласена за хибриден режим. Случајот за кој ви го раскажувам се случи во Прилеп, и ете одговорот за ова го добија, во првиот круг од изборите. Победа на ВМРО-ДПМНЕ во Прилеп и народот над бандитизмот и злоупотребите со повеќе од 7 ипол илјади гласови разлика. Така беше и во останатите 22 општини во Македонија во првиот круг, кога народот гласаше и покрај притисоците, и покрај заканите, и покрај уцените, и покрај поткупот не можат против народот. Ако народот одлучи да гласа и да даде доверба не може полицијата на Спасовски, заканите и поткупот на Заев и обвинителството на Русковска да го спасат. Народот е газда на оваа земја, истакна тој.

Мицкоски ги повика граѓаните на обединување, нагласувајќи дека позади параванот се сами и сами одлучуваат, истакнувајќи дека овие избори се борба на народот против аздисана, корумпирана, арогантна и неспособна власт на СДСМ и Заев.

Немојте да заборавите дека позади параванот сте сами, вие и вашиот глас. Вие и вашата волја да ги промените работите. Промените започнаа, тогаш ајде да ги финишираме со голема победа во недела на народот на Македонија. Затоа и повикувам на обединување против оваа власт. Ова е наша заедничка борба. Ова е борба на народот против оваа аздисана, корумпирана, арогантна и неспособна власт, повика Мицкоски.

Од Кисела Вода испративме порака дека времето на неработниците и на оние што даваат лажни ветувања а ништо не исполнија од тоа што ветија, е завршено. Сега ќе имате свој човек, поточно жена која ќе овозможи вратите на градот секогаш да бидат отворени и за секоја потреба да се најде решение”, им порача независната кандидатка за градоначалник на Скопје, Данела Арсовска, на граѓаните од Кисела Вода при денешната средба.

Арсовска се сретна со граѓаните од 11ти Октомври, Македонија парк, Пржино и Црниче и разговараше со нив за проблемите што ги имаат, што им недостига и им престави според програмата што ја нуди како Кисела Вода ќе стане урбана населба со зеленила, функционална инфраструктура, уреден простор за сите жители и град со чист воздух.

“Програмата е направена според вашите потреби, секојдневните проблеми, маки и барања за решенија. И затоа ќе почнеме да работиме уште од првиот ден и за 82 дена ќе биде многу направено, што некој не успеал да направи ни за 4 години, ние тоа ќе го направиме за 82 дена. А останатиот дел, поголемите и покрупни проекти ќе бидат решени уште во првата половина од мандатот. Ако нешто се сака и се може, а сите овие барања се потребни и затоа проектите се реални и остварливи”, истакна Арсовска.

Жителите на Кисела Вода се пожалија на преголемата изградба на згради, неплански, узурпирање на јавниот простор, канализациски и инфраструктурни проблеми.

Арсовска уште им порача на жителите на Кисела Вода дека обврска на Град Скопје е генералниот план да им го даде на увид на граѓаните, да знаат што се планира и што ќе се гради во иднина. “Овој град треба да биде отворен за сите, да може секој да најде одговор на своите барања и да си го реши проблемот, без чекање, без одлагање. Имам цел а и задача да направам овој град да биде гордост за сите нас”, истакна Арсовска.

Денес, во седумдесет и петтата година од животот почина проф. д-р Атанас Вангелов (1946-2021) – сестран филолог, книжевен научник, литературен теоретичар, критичар и есеист, повеќестран автор, поет, раскажувач, романсиер, драмски автор, преведувач, публицист.

Бил истакнат општественик, амбасадор на Република Македонија во Република Унгарија, пратеник во Собранието на Република Македонија, пратеник во Советот на Европа, директор на Државниот архив на Македонија.

Бил декан и продекан на Филолошкиот факултет „Блаже Конески“ во Скопје, раководител и долгогодишен универзитетски професор по предметот Теорија на книжевност на Катедрата за македонска книжевност и јужнословенски книжевности. Бил лектор и наставник по македонски јазик и литература на ИНАЛКО при Универзитетот „Сорбона‟ во Париз.

Бил претседател на Советот на „Струшките вечери на поезијата“ и член на Друштвото на писателите на Македонија.

Роден е во Богданци на 6 февруари 1946 година. Завршил Филолошки факултет во Скопје, каде што магистрирал на тема „Артизмот и современата македонска литература“ и докторирал на тема „Семантичките фигури во македонската народна лирика“.

Автор е на книгите: Земјата на цветот (поезија, 1966), Препев на планината (поезија, 1970), Мистер Порфирие (телевизиска драма, 1971), Живеалиште (поезија, 1974), Глетки и привиденија (поезија, 1977), Песме/Песни (двојазичен избор, поезија, 1978), Артизмот и современата македонска поезија (студија, 1978), Преданија (поезија, 1978), Литературни студии (1981), Строго доверливо (поезија, 1985), Решето (критики, 1985), Неодредени лични заменки (драма, 1986), Семантички фигури во македонската народна лирика (студија, 1987), Траги (поезија, 1991), Преписите на Божин Павловски (студија, 1992), Traces (избор поезија на англиски, 1993), Микрочитања (критики, 1993), На безгласје глас (поема, 1994), Гласови, траги (избор поезија, 1995), Исказот и стварноста (критики, 1995), Водопад (избор поезија, 1998), Морфологија на бо(љ)шевизмот (студија, 1998), Pro et contra македонизми (колумни, 1998), Див занес (роман, 2002), Македонски писатели (I) (критики, 2004), Маките на Моцарт од Жван (студија, 2007), Изучување на молкот (избор поезија, 2008), Looking for dogwood (избор поезија на англиски, 2010), Деспот Караѓоз (студија, 2010), Studying the silence (избор поезија на англиски, 2011), Неодређене личне заменице (драма, превод на српски, 2012), Деспот Кољ (драма, 2020), Лирската биографија на Конески (студија, 2020) и Филолошката критика на Конески (студија, 2021).

Добитник е на наградите: „Млад борец“, „Браќа Миладиновци“, „Божидар Настев“, „Димитар Митрев“ (два пати), „Златно перо“, „Григор Прличев“, „11 Октомври”.