Придружете ни се на 15 јули, да ги почнеме преговорите со ЕУ, да покажеме дека можеме да создадеме европски стандарди дома, истакна носителот на правата изборна единица, Никола Димитров, од коалицијата „Можеме“ предводена од СДСМ.

„Среда, средината на неделата, е многу убав ден да се заврши убава работа. А ние си имаме многу убава работа за завршување иднава среда.  Во септември годинава ќе правиме 29 години како независна држава . Од тие, речиси сите зборуваме за ова што треба да го направиме в среда – НАТО никој не спомнува, бидејќи ја завршивме таа работа“, вели Димитров и додава дека сега на ред е ЕУ.

„Од другата страна, со ВМРО-ДПМНЕ нема да има пристапни преговори со Европската Унија. Нема да го фатиме возот за којшто не знаеме дали пак ќе застанува. И затоа, ќе дигаме ли раце иднава среда, на 15 јули? Или ќе излеземе и ќе дадеме што помалку простор за овие теговиве што нè влечат надолу. За овие луѓе што главата не ја дигнале и не можат да видат дека земјата не само што се исправи од срамот што ни го оставија. Туку си влезе во НАТО и е на еден чекор да почне пристапни преговори со ЕУ.

Јас сум носител на листата „Можеме“, предводена од партијата СДСМ. И ние сме за денес и за утре. А тие се за вчера. Нема друга политичка опција денес, во нашата Македонија – официјално Северна Македонија – што сака и е одлучена, и е доволно храбра, и доволно знае да оди напред. Вие што уште се двоумите за среда, не знам какво е тоа јунаштво со неправење ништо. Има ли јунак од која било област што е јунак затоа што нешто не правел? Дали ќе ги казните тие што се обидуваат да го чистат ова валканово и да фрлат светло на темницата, затоа што темницата упорно влече назад, валканово вика остајте ме’. Или ќе ни се придружите, оти од оваа страна има надеж, од таа страна има бездна. Ништо ново нема да видиме“, рече Димитров.

Лидерот на ВМРО-ДПМНЕ, Христијан Мицкоски, денеска во Прилеп оствари средби со стопанствениците, на кои стана збор за проектите и содржината со фокус на економскиот дел од нивната програма. Тој вети дека ВМРО-ДПМНЕ ќе го реши проблемот на граѓаните од Пелагонија, односно ќе го изгради автопатот од Скопје преку Прилеп, Битола до јужната граница.

„Претставниците на компаниите ни ги презентираа нивните гледишта, анализиравме дел од политиките и предлозите коишто ВМРО-ДПМНЕ ги предлага во оваа изборна програма. Коишто понатаму ќе бидат дел од, би рекол, програмата на Владата. Пред сè тука како главен адут го споменавме и автопатот што би се изградил од Скопје преку Прилеп, Битола до границата со нашиот јужен сосед. Нешто што е дамнешна желба на жителите на пелагонискиот крај, на прилепчани, но и на останатите. Цениме дека овој инфраструктурен проект многу ќе го подобри квалитетот на живот, ќе ја подобри комуникацијата и условите на бизнис-заедницата овде, од Прилеп, и Пелагонија во целост. Потоа зборувавме за политиките во делот на земјоделието со акцент на тутунот и тутунопроизводителите. Зборувавме и за реформите во делот на образованието, администрацијата, дигитализацијата, фискалната политика, поддршката. Така што ценам дека имавме навистина корисна средба, средба на којашто ние можевме да се презентираме и да имаме определена интеракција со стопанствениците од овде, од градот Прилеп“, рече Мицкоски.

Прашан за очекувањата за излезноста на изборите, Мицкоски истакна дека очекува помала излезност за разлика од други години, но верува дека, сепак, таа ќе изнесува над 45 проценти.

„Ценам дека излезноста ќе биде помала од вообичаената, како што сме навикнати во минатите години. Не очекувам дека ќе се реализираат оние сценарија и предвидувања од минатото дека ќе биде многу ниска и ќе се движи меѓу 40-45%. Ценам дека ќе биде повисока од таа. Можеби нема да стигнеме бројка како што беше тоа во минатото, 65-67%, но ценам дека ќе биде кредибилна за идната влада, што ќе ја предводи ВМРО-ДПМНЕ, веднаш уште од првиот ден да се зафати со структурни реформи и излез од моменталната ситуација во којашто се наоѓаме“, истакна Мицкоски.

Зборот е збор! Пред две и пол години ветивме членство во НАТО и тоа го испорачавме. За само две и пол години станавме членка на најмоќната воено-политичка алијанса, по 11 изгубени години, истакна носителката во петтата изборна единица, Радмила Шекеринска, од Охрид.

„Зборот е збор, истава година добивме почеток на преговори со ЕУ, по 11 изгубени години. За само две и пол години успеавме да станеме членка на НАТО, да почнеме преговори со ЕУ  да ги зголемиме платите и пензиите, трипати да ја покачиме социјалната помош и да ги враќаме парите кон граѓаните. За само две и пол години граѓаните повторно се слободни, а медиумите и критични и секогаш ослободени од притисок од власта. За само две и пол години успеавме нашата држава од изолирана да ја направиме сигурна, членка на најмоќниот сојуз. Повеќе не сме сами ниту во добро ниту во лошо“, рече Шекеринска.

Таа нагласи дека останувањето дома на денот на гласањето може да остане уште една неискористена шанса бидејќи со ВМРО-ДПМНЕ на власт Македонија во ЕУ нема никакви шанси.