Вицепремиерот и министер за транспорт Александар Николоски денеска на граничниот премин Блаце им даде поддршка на домашните транспортери, кои од денеска започнуваат седумдневен предупредувачки протест заедно со превозници од Србија, Црна Гора и Босна и Херцеговина.

Протестот се организира како израз на револт против новите правила за електронска евиденција при престој и транзит во Шенген зона.

Николоски истакна дека протестот има предупредувачки карактер и има за цел навремено да се укаже на последиците што би настанале по 10 април, доколку не се најде решение. Според него, земјите од Шенген зоната треба да ги искористат месеците февруари и март за изнаоѓање соодветно решение за проблемот со кој се соочуваат превозниците.

Тој наведе дека постојат три можни решенија: одложување на примената на електронскиот систем за превозниците, зголемување на дозволениот број денови за престој во Шенген зоната од 180 на 250 дена или нивно третирање како професионалци, а не како туристи, со можност за работни визи или исклучување од постојните правила, по примерот на Швајцарија.

Николоски предупреди дека доколку не се изнајде решение, може да има сериозни последици врз македонската, регионалната, но и европската економија, имајќи ја предвид зависноста на регионот од трговијата и транзитот со земјите од Европската Унија.

Тој најави дека веќе остварил разговор со министерот за транспорт на Грција, а во среда ќе отпатува во Загреб на средба со вицепремиерот и министер за транспорт на Хрватска, со цел координација и зголемување на притисокот за изнаоѓање решение.

Денес во Собранието, се одржа заедничка седница на Националниот совет за евроинтеграции и Комисијата за европски прашања. На седницата присуствуваа претставници на дипломатскиот кор, меѓу кои и амбасадорот на Република Кипар, Андреас Фотиу; министерот за европски прашања, Беким Сали; пратеници, претставници на медиумите, како и членови на граѓанскиот сектор и граѓански организации.

Претседателот на Националниот совет за евроинтеграции, Венко Филипче, и претседателот на Комисијата за европски прашања, Антонијо Милошоски, ги поздравија присутните и му дадоа збор на кипарскиот амбасадор, кој одржа презентација за Програмата и приоритетите на Кипарското претседателство со Советот на Европската Унија за периодот јануари – јуни 2026 година.

Во своето обраќање, амбасадорот го претстави мотото „Автономна Европа, отворена кон светот“, истакнувајќи ги приоритетите за зајакнување на безбедноста и одбранбената подготвеност, унапредување на конкурентноста, отвореност кон светот, промоција на европските вредности и обезбедување долгорочна стабилност на Европската Унија.

Тој нагласи дека Северна Македонија е важен дел од процесот на проширување на Европската Унија, ги поздрави спроведените реформи во државата и ги охрабри континуираните напори за натамошно унапредување на европската интеграција.

Првиот сведок на Обвинителството, 20 – годишниот Кристијан Панов, на денешното судење за пожарот во кочански „Пулс“ во кој загинаа 63 лица, а над 200 беа повредени кажа дека тој и брат му Андреј, кој загина во пожарот, работеле непријавени, во дискотеката и претходно се користеле запаливи средства за забава, дека имало само еден влез/излез за гостите и дека имало малолетни лица.

Панов сведочеше дека работел во „Пулс“ за викенди, на повик, а дневницата му била 1500 денари кои ги добивал пред почетокот на смената. Неговиот брат, пак, работел како шанкер.

Панов рече дека вечерта кога се случи пожарот не бил повикан да работи, во „Пулс“ дошол во 02.20 часот на роденден кај другар. Објектот бил преполн. Бил излезен да испуши цигара кога слушнал како преку микрофон некој им кажува на гостите „излегувајте сите, ќе се вратиме“ по што настанал хаос од луѓе кои се обидувале да излезат. Сведочеше дека многумина се заглавиле на вратата, едно врз други на скалите кај влезот. Тој почекал малку да се расчисти метежот и влегол да го побара братот.

„Нешто падна врз мене, се распрсна и морав да излезам. Кога се вратив по вторпат го најдов брат ми пред влезот. Имаше многу тела, никој не беше при свест. Јас ги поместував телата за да го најдам брат ми. Тој веќе беше надвор, некој го извлекол кај влезот. Го познав по тетоважите“, сведочеше Панов.

Во болницата во Кочани му кажеле дека му дале адреналин на неговиот брат, се обидувале да го реанимираат,  на кратко останал сам со него и тој се обидувал да го оживее се додека сестра од болницата не му кажала дека „во собата број два се тие што не дишат“.

На прашањето дали во „Пулс“ и претходно се користела пиротехника, Панов одговори дека на претходната забава со ди-џеи од Грција имало танчерки кои вртеле запалени факели. Во објектот Панов не забележал противпожарни апарати, но кажа дека додека бил надвор на цигара покрај него поминал газдата дејан Јованов со противпожарен апарат во рацете.

Обвинителството на денешното судење ќе повика уште четворица сведоци.