Претседателот Стево Пендаровски соопшти дека одлучил да прогласи нова вонредна состојба во времетраење од 14 дена, наместо предложените 30 дена, како што бараше техничкиот премиер, Оливер Спасовски. Одлуката е донесена по широки консултации со експерти од повеќе области и советниците во кабинетот, а врз основа на информациите кои ги добил од учесниците на Советот за безбедност.

Советот за безбедност заклучи дека надлежните институции работат координирано, со сите капацитети и ресурси за справување со пандемијата. Ситуацијата е подобрена во споредба со изминатиот период. Евидентно е дека стратегијата за справување со корона кризата дава резултати што укажува на тоа дека како држава добро се справуваме со овој огромен предизвик. Комисијата, односно претседателот информираше и за планот за релаксирање на мерките по фази и димензионирање на безбедносните протоколи кои до сега ги имаат изработено и ги работат се уште за некои стопански дејности.На седницата го разгледавме и извештајот кој Владата го достави за спроведување на вонредната состојба поради пандемијата прогласена вториот пат на 17 април.На седницата премиерот Спасовски реферираше за изминатите 30 денови и го образложи предлогот на Владата за повторно прогласување на вонредна состојба во траење од 30 денови.По широките консултации, кои изминатите денови и денеска ги имав со експерти од повеќе области и со советниците во Кабинетот, а врз основа пред се на кажаното и предложеното на седницата одлучив да прогласам нова вонредна состојба во траење од само 14 дена, наместо бараните 30. Со оглед на позитивните трендови на смирување на состојбата со пандемијата сметам дека 14 денови се доволни, рече Пендаровски.

Според него, причина за ваквата одлука е потребата од имплементирање на економско-социјалните мерки за ублажување на последиците од пандемијата, кои веќе сега се чувствуваат како резултат на фактот што огромен број фирми не работеа и се уште не работат.

„Кон крајот на месецот бев информиран дека се очекува да склучиме кредитен аранжман со ЕБРД, со Европската банка за обнова и развој, од околу 160 милиони евра. Се разбира, исто така, многу важна, веројатно најважна причина за оваа одлука беше и тоа што на таков начин и се овозможува Владата да продолжи преку уредбите со законска сила да овозможува на целокупниот здравствен сектор поуспешно да се справува со пандемијата. Овде само кусо ќе ми дозволите еден мал коментар дека Владата може вонредната состојба да ја користи за поткуп на гласачите. Сакам да ви кажам, барем во однос на овој последниот податок кој го изнесов дека се подготвуваме како држава да склучиме аранжман со ЕБРД, дека такви работи со Европската банка не се возможни. Тоа се строго наменски средства и ќе одат за поддршка на стопанството. Се разбира дека не можат да бидат, и ако некој воопшто има таква намера, не можат да бидат пренаменети за изборен поткуп. Инаку, за евентуални злоупотреби и на ова до сега што беше активност на Владата во вонредна состојба, значи уредбите со законска сила, и она што ќе биде донесено понатаму во следните 14 денови, за тоа постои Уставен суд. Знаете дека дел од тие уредби веќе ги прогласи за неуставни и донесе времени мерки за стопирање на нивното дејствие. Се разбира, постои и Антикорупциска и ред други државни органи кои можат да проверат дали тие уредби со законска сила се за справување со пандемијата или имаат некоја сосема друга мотивација“, истакна претседателот.

Пендаровски рече дека траењето на вонредната состојба од 14 дена не е поврзана со изборите, посочувајќи дека тоа прашање дополнително ќе биде разгледувано на лидерската средба.

Според претседателот на држава, главната причина за новата вонредна состојба е потребата од имплементација на економско-социјалните мерки за ублажување на последиците од пандемијата.

Ваквата одлука беше соопштена по денешната седница на Советот за безбедност во вилата Водно, на која присуствуваа премиерот Оливер Спасовски, претседателот на Собранието, Талат Џафери, министерите за надворешни и за внатрешни работи Никола Димитров и Наќе Чулев и епидемиологот д-р Жарко Караџовски од Комисијата за заразни болести.