Во општина Прилеп денес официјално беше извршено примопредавање на функцијата градоначалник меѓу новоизбраниот градоначалник Борче Јовчески од ВМРО-ДПМНЕ и досегашниот Илија Јованоски.

Од страна на општинската изборна комисија на новоизбраниот градоначалник Јовчески му беше доделено уверението како и на сите 27 советници во Советот на Општина Прилеп.

По превземањето на функцијата новоименуваниот градоначалник Јовчески се заблагодари за укажаната доверба и истакна дека ќе биде градоначалник на сите граѓани на Општина Прилеп.

За утре е закажана конститутивната седница на Советот на Општина Прилеп на која што ќе бидат верифицирани 27-те мандати на членовите на советот, а исто така ќе биде избран и новиот претседател на советот.

Имав прилика денеска да ги видам информациите во медиумите и искрено многу непријатно се изненадив, коментира актуелниот градоначалник на Скопје и кандидат за втор мандат, Петре Шилегов, по објавата на СДСМ дека неговата опонентка Данела Арсовска имала бугарско државјанство.

„Не толку поради фактот дека има бугарско државјанство, за кое ако сакате да го добиете треба да се изјасните како Бугарин/Бугарка. Како се чувствува по националност и зошто и како земала државјанство, тоа е нејзина работа. Но она што ме загрижува мене, а верувам и сите скопјани е прво, зошто не ја кажува вистината во јавноста и второ зошто продолжува да ја лаже јавноста околу овој очигледен факт. Прашањето е за што уште не ја кажувала вистината и за што уште што кажа во кампањата е лага? Скопјани секако не заслужуваат ваков третман од некој кој претендира да биде градоначалник, очигледно Арсовска е склона кон криење на факти од јавноста. Сериозно се доведува во прашање нејзиниот интегритет и чесност како можен градоначалник на Скопје. Тоа е клучното прашање кое сега треба да си го постават и граѓаните и медиумите“, вели Шилегов.

Не сакам да коментирам луѓе што се заглавени во едно политичко мочуриште, тоа е очекувано од структурата што е во заминување. Тие нека продолжат да удираат ниско, колку пониско тие удираат, ние толку повисоко ќе се креваме, рече претседателот на ВМРО-ДПМНЕ, Христијан Мицкоски, одговарајќи на новинарско прашање во однос на црната кампања од страна на СДСМ, односно обвинувањата за бугарско државјанство на Арсовска.

Мицкоски посочи дека нема ниту едно поле каде што може да се издвои еден успех од страна на владата на СДСМ и ДУИ потенцирајќи дека додека тие се заглавени во минатото, продолжуваат да тонат во политичкото мочуриште.

„Јас не очекувам, повторно ќе кажам, нешто поинакво од Зоран Заев, СДСМ или ДУИ. Фактот е дека Владата на СДСМ и ДУИ ја направи Македонија најкриминална и најкорумпирана држава во Европа. Факт е дека Владата на СДСМ и ДУИ направи Македонија да биде трета во светот според смртноста од ковид-пандемијата и наместо да бараат вакцини за да се имунизира населението, тие одеа, бараа и трчаа по провизии. Факт е дека Владата на СДСМ и ДУИ практично ја турна на дното Македонија според економијата во регионот, па и во Европа. Факт е дека е презадолжена, факт е дека единствено што направија е распродажбата на националниот идентитет, факт е дека во образованието и реформите што ги спроведоа немаме ниту еден универзитет во првите 100 на Шангајската листа и уште многу, многу порази што ги направија“, додаде тој.