Македонија
Перински на состанок со градоначалниците од Југоисточниот плански регион: Локалните власти ќе имаат спремни проекти
Министерот за локална самоуправа Златко Перински, денеска имаше состанок со градоначалниците од Југоисточниот плански регион.
На состанокот министерот Перински се информираше за приоритетните потреби на општините и на граѓаните, како и на подготвеноста на локалните власти, да реализираат поголеми инфраструктурни проекти.
Министерот Перински, нагласи дека Владата во континуитет ќе ги поддржува општините, со цел во секоја општина, во секое населено место, да се обезбедат основните услови за живеење и да се подобри квалитетот на услугите за сите граѓани.
„Ние сакаме секој граѓанин да има пристојни услови за живеење во својот град, во своето село и таму да ја гради перспективата за своето семејство. Секоја општина, секој плански регион, има свои потенцијали, кои што со поддршка на Владата, можат да бидат ставени во функција на развојот и на подобрувањето на условите за живеење и за работа на граѓаните.“, рече Перински.
Од локалните власти министерот Перински доби уверување дека тие се подготвени, има готови проекти со целосна проектна документација и дека ќе бидат аплицирани проекти, кои што ќе имаат директно влијание на животот на граѓаните.
Како проекти, кои се подготвени, беа спомнати, реконструкцијата на чаршијата во Гевгелија, потоа целосно нова канализациона мрежа во населеното место Василево и целосната реконструкција на старата стоковна куќа во Радовиш, која скапува цели 30 години.
Министерот за локална самоуправа Златко Перински, најави дека веднаш по ребалансот на Буџетот ќе биде објавен јавен повик за финансирање на поголеми инфраструктурни проекти во општините, на што веќе се работи во Министерството за локална самоуправа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево време со температура до 25 степени
Времето утрово е студено со појава на магла по одделни котлини и речни долини. Преку денот, ќе биде сончево со мала локална облачност. Ќе дува слаб ветер претежно од југоисточен правец. Минималната температура ќе биде во интервал од -3 до 5, а максималната ќе достигне од 18 до 25 степени.
Во Скопје минималната температура ќе се спушти до 2, а максималната ќе достигне до 23 степени, јавува УХМР.
Во наредните денови продолжува периодот на стабилно и претежно тивко време со студени утра и температури кои наместа ќе се спуштаат под нула степени. По одделни котлини ќе има услови за појава на утринска магла или ниска облачност. Дневната температура ќе биде без значителни промени.
Македонија
Не е за пиење водата во тетовските села Мерово, Луковица и Седларево, како и во прилепското село Ропотово
Регионалниот центар за управување со кризи Тетово, извести дека од Центарот за јавно здравје ЈЗУ – Тетово добиле информација дека испитаните примероци на вода за пиење од селата Мерово, Луковица и Седларево (Општина Желино) не одговара на законските и стручни прописи за бактериолошка анализа.
„Потребно е да се врши редовна дезинфекција на водата за да може да се употребува за пиење“, велат од ЦУК.
РЦУК Битола, информира дека од Центар за јавно здравје ЈЗУ – Прилеп е докажана здравствена микробиолошка неисправност на водата за пиење од регионалниот водовод (Општина Долнени) во с. Ропотово и во основното училиште на с. Ропотово.
Македонија
Се’ уште забранета водата за пиење во Струмица
Изречената забрана за пиење на водата од струмичкиот водоснабдителен систем останува на сила, соопшти Агенција за храна и ветеринарство (АХВ) по резулатите од анализираните мостри земени на 18 октомври годинава во рамки на спроведениот вонреден инспекциски надзор во водоснабдителниот објект – фабрика за вода на ЈКП „Комуналец” Струмица.
Од АХВ информираа дека кај сите мостри претходно зголеменото ниво на манган е во рамки на дозволените вредности, но микробиолошки, четири од земените мостри не ги исполнуваат безбедносните критериуми поради детектирано зголемено присуство на колиформни бактерии во водата.
Целта на контролата беше увид во досегашните активности спроведени од страна на ЈКПД Комуналец од Струмица во однос на спроведувањето добра производствена и добра хигиенска пракса, како и други технички зафати во водоснабдителниот систем.
Во рамки на надзорот, земени се 6 мостри за анализа на водата од водоводната мрежа на ЈПКД Комуналец Струмица и тоа: една мостра од сирова вода која доаѓа од браната, сирова вода од чешма во фабриката, втора мостра на хлорирана/третирана вода за пиење од чешма во фабриката за вода, три мостри вода за пиење од мерните места одредени од ЈПКД Комуналец во нивниот мониторинг план за земање мостри вода за анализа и една мостра вода за пиење земена по случаен избор на инспекторот од водоводната мрежа на ЈПКД Комуналец.