Министерот за образование и наука, Јетон Шаќири информира дека заедно со СОНК ги прифатиле предлозите на медијаторот во однос на сите отворени теми и причините за штрајкот во образованието.

„И двете страни се согласивме да ги прифатиме предлозите на медијаторот кои се вклучени во преговарачкиот процес, во однос на сите теми кои беа отворени и причините за штрајк во образованието. Повисоки плати во образование ќе има, освен порамнувањето што го донесовме со минимална плата, се договоривме за зголемување на платите за сите вработени во образование за 15 проценти“, истакна Шаќири.

Додаде дека нема да има кратење на платите во месецот кога се штрајкуваше.

„Нема да има кратење за времето кога се штрајкуваше. Најдовме целосно разбирање и ќе се исплатат целосни плати за април. Ги допрецизиравме работите и околу колективните договори“, нагласи ресорниот министер по средбата со претседателот на СОНК, Јаким Неделков.

Изрази благодарност до родителите, наставниците и учениците кои имале разбирање за овој процес.

Зголемувањето, како што беше најавено треба да се очекува од септемвриската плата.

Претседателот на СОНК, Јаким Неделков потврди дека овој предлог на медијаторот, ќе важи и со Министерството за труд и социјална политика.

Владата, на денешната 45-та седница, ја разгледа и усвои информацијата за почеток на стратешкиот дијалог меѓу Македонија и Соединетите Американски Држави.

За координатор на процесот за стратешки дијалог меѓу Македонија и САД е определен министерот за надворешни работи Бујар Османи, кој на 2 јуни ќе ја предводи делегацијата на отворањето на процесот во Вашингтон, во чиј состав ќе бидат и министерката за одбрана, Славјанка Петровска, министерот за економија, Крешник Бектеши, и министерката за култура, Бисера Костадиновска-Стојчевска, соопштија владините служби.

„Стратешкиот дијалог претставува подигнување на односите на повисоко ниво со САД и е од особено значајно во контекст на актуелните безбедносни закани. Во рамките на дијалогот ќе бидат опфатени теми од билатералните односи за соработка во економијата, трговијата, образованието, транспортот, енергетиката, климатските промени, демократскиот развој, борбата против корупција, владеењето на правото, како и безбедносните сегменти од соработката, од миграцијата, борбата против тероризмот, па сѐ до справување со организираниот и меѓународен криминал“, е наведено во владиното соопштение.

Дијалогот, како што е појаснето, ги опфаќа и актуелните безбедносни состојби, соработката на двете земји како НАТО-партнери, аспирациите на Македонија за зачленување на ЕУ, претстојното претседавање на земјата со ОБСЕ, заложбите на земјата во рамките на самитот за демократија на претседателот Бајден и други теми од интерес, е нагласено во дописот.

Српската православна црква на својата веб-страница официјално објави дека на 19 мај, во соборниот храм „Свети Сава“ во Белград, српскиот патријарх Порфириј и архиепископот охридски и македонски Стефан ќе служат литургија на помирување, „со која ќе се воспостави литургиско и канонско причестување на двете сестрински цркви со одлука на Собранието на СПЦ“, се вели во официјалното соопштение од СПЦ.

Литургијата, како што пренесуваат и српските медиуми, ќе почне во 9 часот, а ќе служат сите архијереи на двете цркви.

Според написите, патријархот Порфириј ги повикал верниците во што поголем број да присуствуваат на архијерејската литургија.

Соборот на СПЦ вчера соопшти дека прифаќа статус на најширока можна автономија за Македонската православна црква, односно целосна внатрешна самостојност, која ѝ е доделена уште во 1959 година.