Новиот претседател на Комисијата за заразни болести, Александар Петличковски, по првиот состанок на новиот состав објасни дека препорачуваат учење со физичко присуство оти процентот на заразени на возраст од 12 до 18 години не бил голем во однос на целата популација, а работат и на планот за најавениот скрининг во училиштата.

„Се размислува скринингот да биде со брзи тестови, кои не се многу на број, неколку илјади, десетина-дваесет илјади се на располагање, и ќе биде на случајни ученици со цел да ја видиме вкупната застапеност на вирусот во овие групи. Брзите тестови имаат пониска специфичност за детектирање омикрон отколку на делта-сојот, но и таа специфичност се движи некаде над 50 проценти, па ќе бидат некако употребливи“, вели претседателот Петличковски.

Главна препорака остануваат вакцинацијата и почитување на мерките за носење маска и одржување дистанца. Комисијата во новиот состав ќе се базира на следење на научните студии и приспособување и примена на светските искуства од студиите и кај нас.

„Омикрон-сојот може да го избегне имунитетот од прележување на делта-варијантата и може да го избегне имунитетот што е постигнат со вакцина ако е примена пред повеќе време. Единствен начин да се намали бројот на реинфекции останува вакцинацијата, вклучително третата доза. Има студии што кажуваат дека заштитата од инфекција пораснува над 80 проценти со третата доза вакцина и секако инсистираме да останат мерките за носење маска и одржување дистанца“, рече претседателот Петличковски.

Првиот состанок на Комисијата во нов состав траел два часа, на кој членовите се запознавале со работата, а покрај за учебната година и скринигот, разговарале и за стимулирање на вакцинацијата и за вакциналните сертификати.