Македонија
Пецаков: Не сме против нов клинички туку против кражба на 400 милиони евра

ВМРО-ДПМНЕ не е против изградба на клинички центар, вели пратеникот од редовите на ВМРО-ДПМНЕ, Кирил Пецаков. Неговата партија, како што дополни, е против мега криминалот што го подготвува најкорумпираната власт на Заев.
„Власта на Заев по 4 години одлагања и шетања на проектот нов Клинички центар, сака со 30-тина страни физибилити студија да потроши над 500 милиони евра за изградба на клинички центар. Овој проект е безмалку идентичен со тој во Белград и според површината и според бројот на болнички легла и според бројот на болнички соби и операциони сали, Но има една голема разлика. Во Србија ваквиот проект за изградба и опремување чини 125 милиони евра, а кај нас тој е проектиран на над 500 милиони евра“, нагласи Пецаков.
Според Пецаков, ако СДСМ сакаше да направи нешто за јавното здравје ќе изградеше, како што рече, клинички центар за кој имаше и план и целосна финансиска конструкција од страна на претходната власт на ВМРО ДПМНЕ кој ќе чинеше речиси десет пати помалку.
„Тогаш од СДСМ велеа дека наместо во објекти ќе работат за приватизација на здравството. Со други зборови, да беше ВМРО-ДПМНЕ досега граѓаните ќе имаа современ клинички центар“, смета Пецаков.
Тој додаде дека ВМРО-ДПМНЕ нема да дозволи кражба на векот од оваа, како што ја нарече, најкорумпирана власт во Европа, затоа што тие 400 милиони евра се, како што рече, пари на граѓаните.
„Овие 400 милиони евра не се пари на Заеви или Филипче, ама постои основен сомнеж дека со ваков криминален проект ќе станат. Костадин Костадинов почна самиот себеси да се лаже, кога веќе не можат да ја излажат јавноста“, истакна пратеникот од ВМРО-ДПМНЕ навраќајќи се на прес конференцијата на Костадинов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Каевски: Наместо проекти и решенија, градоначалниците на ВМРО-ДПМНЕ ги задолжуваат општините

Масовна партизација, поскапи услуги за граѓаните и задолжување на општините, тоа е учинокот на градоначалницитена ВМРО-ДПМНЕ и шпицниот градоначалник Христијан Мицкоски за првите 16 месеци власт, истакна на денешната прес-конференција Дарко Каевски, портпарол на СДСМ и пратеник.
Наместо проекти и решенија за развој, градоначалниците и советничките групи од ВМРО-ДПМНЕ, вели Каевски, ги задолжуваат општините кои важат за едни од најбогатите и финансиски најстабилните.
„Градоначалникот на Гази Баба со обврзница од пет милиони евра ја задолжи општината без при тоа да биде наведено на кој рок ќе биде издадена обврзницата, без да биде наведено колкава е каматната стапка. Тој пример го следи и градоначалникот на општина Бутел, кој ќе издаде обврзница во вредност од два милиони евра или неверојатни 55 отсто од годишниот буџет на општината. Претходно постапка за издавање обврзница издаде и општина Аеродром предводена од Тимчо Муцунски и ВМРО-ДПМНЕ, а обид за издавање имаше и општина Штип“, рече Каевски.
Според него, освен што овие обврзници се издаваат во период кога каматните стапки се значително високи, заедничко за сите обврзници е што тие ќе можат да бидат откупени од било кој приватен субјект.
Со тоа, оценува Каевски, се создава опасност, обврзниците да бидат купени од големи градежни компании и крупниот бизнис и потоа да можат да влијаат врз работата на градоначалниците, при носењето урбанистички планови или одредени тендерски постапки.
Појаснува дека ваквото масовно задолжување, лично го најави шпицниот градоначалник Мицкоски.
„16 месеци изминаа, а градоначалниците од ВМРО-ДПМНЕ не сработеа ништо. Потрошија милиони за партиски вработувања, за набавка на скапи мобилни телефони и компјутери, се испокараа за провизии и тендери, а интересите на граѓаните се целосно игнорирани. Локалната власт предводена од ВМРО-ДПМНЕ е најнеспособната и најнеуспешна локална власт досега“, посочи Каевски.
Македонија
(Видео) Мицкоски: Наместо поддршка на Ахмети и Груби, Тупанчески да воспостави европски вредности

„Ако министерот за правда и мој колега од Универзитетот ‘Свети Кирил и Методиј’, редовен професор, е мотивирачки да сме во друштвото на Суринам, Тунис и Индија наместо во Европската Унија, за мене тоа е девастирачки и понижувачки. Се надевам дека нашите студенти не ги воспитуваме и учиме на вредностите на Тунис, Суринам и Индија со сета почит кон тие држави, туку на вредностите што ги споделува Европската Унија“, нагласи претседателот на ВМРО-ДПМНЕ, Христијан Мицкоски, одговарајќи на прашање за коментар за извештајот на „Транспаренси интернешнл“.
Мицкоски додаде дека уште еднаш власта покажува политичка незрелост.
„Уште еднаш оваа Влада покажува политичка незрелост и со тие позиции што ги рефлектира дополнително го обесхрабрува македонскиот народ. Ние сме држава со висока корупција, висок криминал, за жал“, рече тој.
Нагласи дека единствена светла точка во државата се општините, каде што градоначалници се од редовите на ВМРО-ДПМНЕ.
„Не сакам да бидам обвинет дека ете за тоа ги форсирам општините во кои имаме градоначалници од ВМРО-ДПМНЕ, но помина доволно време за да може граѓаните да оценат како работат кадрите на ВМРО-ДПМНЕ, а како работи централната власт, која практично е раководена од Владата на ДУИ, а поддржана од СДСМ“, истакна Мицкоски.
„Така што, јас би апелирал до мојот колега, наместо да дава недвосмислена поддршка на Али Ахмети и Артан Груби, да се посвети малку и да ги воспитува студентите на европските вредности наместо да се споредуваме и да сме задоволни и да сме охрабрени со тоа што се наоѓаме во друштво на Суринам, Тунис и Индија“, укажа Мицкоски.
Македонија
Тупанчески не негира дека ќе го сменат: Беше лиферувано дека Министерството ќе биде ставено на берза

Министерот за правда, Никола Тупанчески, не е загрижен доколку го сменат од функцијата, ниту негира дека тоа ќе се случи со влезот на Алијансата за Албанците во Владата. Тупанчески смета дека брзата промена на министри не е решение. Тој ја извршуваше функцијата една година.
„Беше лиферувано дека Министерството за правда ќе биде едно од министерствата што ќе биде ставено на ‘Пазар 3’, фигуративно кажано, ќе биде на берза, во однос на одредени рокади, односно замени на министерските места. Апсолутно, и јас како министер, но и Министерството за правда, не сум оптоварен со овие работи. Јас кажав дека до последниот ден ќе го дадеме својот максимум. Ние сме министерство што има резултати и замисла како да ги заокружиме претходните замисли за поддржување на ресурсите. Брзата промена на министри не сум сигурен дека претставува најдобро решение, но, дефинитивно, не се зависни од Министерството за правда. Има фактори што не се директно поврзани со Министерството за правда. Не постои оптовареност со развојот на настаните, но подготвени сме да одговориме на предизвиците“, посочува Тупанчески.
Со влезот на Алијансата за Албанците во Владата ќе следува и реконструкција.