Македонија
Платите на наставниците од овој месец се зголемуваат 15 отсто, соопшти МОН

Платите на наставниците и на другите вработени во основните и средните училишта продолжуваат да се зголемуваат. Како резултат на заложбата за создавање квалитетно образование, кое се темели на мотивирани наставници, министерот за образование и наука, Јетон Шаќири, и претседателот на Самостојниот синдикат за образование, наука и култура, Јаким Неделков, потпишаа спогодба која предвидува зголемување на платите на вработените во основните и средните училишта за 15 % почнувајќи од овој септември.
„Чест ми е што токму во време на мојот мандат како министер за образование и наука во 2022 и 2023, практично во период од само една година, платите на наставниците се зголемени во три наврати, односно кумулативно над 35 %. Ова е само потврда дека навистина имаме намера да ги вратиме дигнитетот и достоинството на наставниците што го заслужуваат во општеството затоа што се најважната алка во воспитно-образовниот процес, од што зависи квалитетот на генерациите што се создаваат и без која ниту една реформа не може да успее“, рече Шаќири.
Задоволство изрази и претседателот на СОНК, Неделков, кој посочи дека само со мотивирани наставници може да градиме добра иднина за државата. Истакна дека како синдикат, ќе продолжат да се заложуваат за подобрување на правата и можностите на просветните работници и во иднина, а очекува набргу да се постигне согласност за измени во колективниот договор, со што уште повеќе ќе се стимулира работата на оние што директно ги пренесуваат знаењата на учениците.
Освен покачувањето на платите, во меѓувреме продолжуваат и континуираните обуки на наставниците како единствен начин постојано да јакнат нивните професионални компетенции отворајќи им можности за кариерен развој во звања ментор и советник. Во период од 3 години во звање ментор напредуваа 250 наставници од основните училишта, кои се носители на промените што се случуваат за поквалитетна настава, информираат од МОН.
Владата и Министерството за образование и наука потенцираат од ресорното министерство обезбедуваат системска поддршка за наставниците.
„Работиме на достоинствено вреднување на нивниот труд и посветеност. Тие се ценети и почитувани за важната работа што ја работат – вложувањето во воспитувањето и образованието на децата, кои се иднината на оваа држава“, истакнуваат од Министерството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Извршниот одбор на СДСМ донесе неколку заклучоци

Извршниот одбор на СДСМ го потврди предлогот на Ковачевски и кандидат за претседател на Собранието го избра Јован митревски, координатор на пратеничката група на СДСМ.
„Митревски е пратеник со искуство, вреден, отворен, чесен и посветен на интересот на граѓаните, докажан во неговиот ангажман во Собранието. Сигурни сме дека Митревски ќе ја извршува функцијата на највисоко ниво“, рече портпаролот на СДСМ Дарко Каевски.
ИО го задолжи генералниот секретар да го подготви роковникот за постапка, начин и критериуми за кандидат за претседател на претседателските избори, согласно статутот на партијата.
За шеф на централниот изборен штаб на СДСМ, извршниот одбор го предложи Миле Зечевиќ Вардарски.
Македонија
Османи во посета на Женева

Министерот за надворешни работи, Бујар Османи утре ќе учествува на настанот на високо ниво за Одбележување на седумдесет и пет години од Универзалната декларација за човекови права, организиран од Обединетите Нации во Женева.
Преку неговото обраќање, Османи ќе ги презентира заложбите на Северна Македонија во овој важен домен.
За време на престојот во Женева, Османи ќе оствари низа билатерални средби со високиот комесар за човекови права Волкер Турк и високиот комесар за бегалци Филипо Гранди, како и генералните директори на светската здравствена организација и меѓународната организација за миграции Тедрос Аданом и Ејми Поуп, соопштија од МНР.
Македонија
Ковачевски: Кандидатот за претседател на државата ќе биде од СДСМ, а не од ДУИ

Ковачевски пристигна во штабот на СДСМ каде во 19 часот ќе се одржи состанок на извршниот одбор и рече дека денеска ќе биде потврдена неговата одлука – координаторот на пратеничката група, Митревски, да седне во фотелјата на Талат Џафери. На прашањето дали би поддржал претседател Албанец од ДУИ, како што вчера најави Османи, премиерот рече дека нема никаква дилема оти кандиндатот за претседател ќе биде од СДСМ.
„Сите политички партии имаат свои амбиции, меѓутоа претседателскиот кандидат ќе биде од СДСМ, како што беше на минатите избори и ќе ја има најшироката поддршка од политичките партии и граѓанските организации, поединци итн. Тоа ќе биде претседалот на државата и во следниот мандат“ , рече премиерот.
Во врска со дилемите околу тоа дали ВМРО-ДПМНЕ ќе предложи свои членови во техничката влада, Ковачевски верува дека опозицијата ќе го стори тоа бидејќи така се договорила на лидерската средба.