Судијката Марија Клетничка даде нова пауза до 14 часот, во која шефицата на СЈО, во оставка, Катица Јанева, треба да одлучи дали ќе ги изземе обвинителите Фатиме Фетаи и Гаврил Бубевски од застапување во предметот „Титаник 3“ за уништување изборен материјал.

Предлогот на адвокатот на Исмет Гури, Еленко Миланов, за изземање и на шефицата на СЈО, Катица Јанева, судијката го отфрли како неоснован.

Предлозите за изземање на обвинителите до судот утрово ги поднесе Миланов по што беше дадена пауза.

Во третиот „Титаник“ на СЈО обвинети се пратеникот на ДУИ – Ејуп Аљими и Исмет Гури, заменик-директорот на УЈП Скопје. Како членови на општинската изборна комисија во Чаир на локалните избори во 2013 година уништиле изборен материјал.

Според обвинението, Аљими и Гури влијаеле директно врз изборниот резултат и ја фалсификувале изборната волја на граѓаните на Чаир за да остварат политичка моќ. Првото рочиште за предметот се одржа на 16 март 2018 година.

Предметот е пред завршни зборови и пресуда.

Општина Аеродром во соработка со ЈП „Комунална хигиена“ деновиве спроведува голема акција за чистење на дивите депонии на повеќе локации во општината.
Целосно се исчистени депониите во непосредна близина на амбулантата во населба Лисиче, како и на просторот меѓу Лисиче и Реонски центар – Аеродром.

Службите денеска работат на расчистување на дивата депонија во местото познато како Бановина во Горно Лисиче, а за наредните денови се планира расчистување на Усјанскиот Канал, како и диви депонии во Долно Лисиче.

Општина Аеродром истовремено ги охрабрува граѓаните доколку забележат фрлање отпад на несоодветни локации, да пријават на телефонскиот број ‎075-316-515. Комуналните инспектори на Општина Аеродром работат во две смени и за викенди.

Портпаролот на ВМРО-ДПМНЕ, Наум Стоилковски, праша кои се мотивите на портпаролот на СДСМ, Костадин Костадинов, за да манипулира со информациите за случајот „Рекет“.

Опозцијата упати неколку прашања, меѓу кои дали постојат фотографии, материјали и тонски записи од Костадинов во еден од телефоните на осомничените во случајот „Рекет“.

„Зошто Костадин Костадинов е толку исплашен од неговиот довчерашен најдобар пријател Бојан Јовановски? Дали е точно дека има инкриминирачки материјали на Костадинов снимени во странство? Дали на овие материјали, освен овие двајца, се вклучени и други лица, политичари со потекло од една странска земја? Дали е точно дека Костадинов е и чест посетител на скапите развратни забави организирани од еден од осомничените во „Рекет“ пред неколку месеци во два големи града во една соседна држава? Дали Костадинов на овие луксузни забави трошел и народни пари? Ако ова е точно, тогаш нека одговори Костадинов што точно правел на тие забави со Бојан Јовановски?“, праша Стоилковски.