Македонија
Поставени ознаки на спомениците на Александар Велики, Олимпија и Филип Втори

Tројазични табли на кои пишува дека споменикот е во чест на историска фигура која припаѓа на античката хеленска историја и светското културно наследство, осамнаа денес на спомениците на Александар Велики, Олимпија и Филип Втори. Таблите се со големина на А4 формат и се залепени под или на оградата од мермерните фонтани и се речиси незабележителни за случајните минувачи.
„Во чест на Александар Велики, историска фигура која припаѓа на античката хеленска историја и цивилизација и на светското културно и историско наследство. Овде е претставен како воин на коњ“, стои на ознаката на 14-метарската бронзена скулптура поставена на десетметарски столб, во вредност од 10 милиони евра.
Слични ознаки има и на спомениците на Олимпија и Филип Втори поставени пред влезот на Старата скопска чаршија. Таблите се напишани на македонски, албански и англиски јазик. Од Град Скопје, надлежни за поставувавњето на ознаките, велат дека активноста опфаќа четири антички споменици, но не откриваат колку точно пари ќе се издвојат за оваа намена.
„Трошоците за активностите кои ќе ги спроведе градот се планирани во средствата за програмата за нумерација и поставување табли и истите се реализираат во рамките на постоечките договори, поточно истите не предизвикуваат дополнителни финансиски трошоци. Со оваа активност ќе се постават табли на 4 објекти од Скопје 2014 кои се во надлежност на Градот Скопје (Александар Велики, Олимпија, Филип Втори и Филип Втори во плоштадот во Автокоманда)“, одговорија од Град Скопје.
Од Владата велат дека активностите се спроведуваат согласно предвидената динамика на преспанскиот договор.
„Во рок од шест месеци од влегувањето во сила на оваа спогодба, Втората страна ќе го преиспита статусот со спомениците, јавните згради и инфраструктурата на нејзината територија и доколку истите на кој било начин упатуваат на античката елинска историја и цивилизација, што претставува составен дел од историското или културното наследство на Првата страна, ќе преземе соодветни корективни дејствија со цел делотворно да го разгледаме прашањето и да се обезбеди почитување на таквото наследство“, соопштија од Владата.
По налог на Владата, согласно преспанскиот договор од вчера почна да се отстранува и симболот на поранешното државно знаме – сонцето од Кутлеш. Службите на Град Скопје почнаа со отстранување од шахтите во центарот на Скопје, а министерот за локална самоуправа, Горан Милевски, изјави дека одлуката се однесува на општините, државните и локални институции. Во однос на приватното користење на симболот, Милевски рече дека тоа не може да се забрани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.