Денеска министерот за земјоделство, шумарство и водостопанство Трајан Димковски, беше во Кочани, градот познат по производството на еден од нашите светски познати македонски брендови, оризот.

Димковски имаше средба со производителите на ориз на која разговараше за повеќе работи поврзани со производството на ориз, како што е обезбедувањето на квалитетен семенски материјал и рестартирање на Институтот за ориз во Кочани, којшто во моментов се соочува со кадровски и технички недостиг. Истотака се дискутираше и за употребата на заштитни средства и контролата при увозот, за што активно е вклучен Државниот инспкеторат за земјоделство.

„Во насока на поддршка и развој на оризопроизводствто, во изминатите три години неколкупати се зголеми и субвенцијата за оризова арпа. Оваа година висината на директните плаќања за ориз изнесува 25.000 денари по хектар, однесоно 30.000 денари по хектар за земјоделски стопанства со пријавена површина за финансиска поддршка од минимум 5 хектари, максимум до 50 хектари со задолжителна употреба на сертифициран семенски материјал. Оваа година и цената на оризот бележи пораст, односно од 49 денари за килограм лани, годинава откупната цена на белиот ориз е 58 денари за килограм, цената на арпата за 2018 изнесуваше 14 денари за килограм, додека пак за 2019 е 25 денари по килограм“, изјави министерот Димковски.

Најголемиот дел од новинарите и медиумските работници земаат од 15.000 до 20.000 денари плата. Ова го покажува анкетата на Самостојниот синдикат на новинарите и медиумските работници (ССНМ), спроведена на 150 испитаници, на кои им беа поставени прашања во врска со работничките права и состојби во новинарските редакции во земјава.

Вкупно 53 лица или 35,3 % одговориле дека нивните месечни примања се од 15 до 20 илјади денари, додека пак 46 лица или 30,6% одговориле дека добиваат месечна плата помеѓу 20 и 25 илјади денари.

Дваесет луѓе или 13,3% одговорите дека нивната плата е во висина од 25 до 30 илјади денари, а 23 лица или 15,3% земаат над 30 илјади денари плата.

Само осуммина или околу 5% одговориле дека нивните примања се под 15 илјади денари во месецот.

Од ССНМ велат дека медиумскиот бизнис дополнително е на удар од корона-кризата, а тоа се одразило и на губењето на работно место и намалување на платите.

Четворица останале без работа, а 45 одговориле дека познаваат колеги ја изгубиле работата. Во проценти, 33% од анкетираните знаат дека некој во медиумскиот бизнис овој период останал без плата.

Најмногу кратење имало кај новинарите со полно работно време, вкупно 11 новинари.

Четири слободни новинари се соочиле со кратење на приходите од 20% (1), 15% (1), 10% (2). Некаде е забележано делумно намалување на платите. На пример, на петмина новинари со полно работно време скратени им се 30% од примањата овој период на криза.

Половина од платата (50%) добил еден новинар, двајца по 20% намалување, двајца 10% помалку и на еден новинар му била скратена платата за 15%. Покуси за 20% и 30% од платата останале и двајца уредници. Еден фоторепортер добил плата скратена за 30%.

Од вкупно 150 испитаници во анкетата на ССНМ, 73 се машки пол, а 77 се жени, возрасната граница се движи од 23 до 62 години. Од испитаниците најголем дел одговориле дека работат во телевизија – 77, додека пак во електронски медиуми 54. Од печатените медиуми биле 16 испитаници и само тројца кои работат во радио.

Во однос на која позиција работат, 84 лица одговориле дека се новинари со полно работно време, 19 дека работат како слободни новинари, сниматели се 14, монтажери и уредници по 10, на работно место во режија шест лица, двајца фоторепортери и петмина дописници.

Градоначалникот на Град Скопје, Петре Шилегов и вицепремиерката за економски прашања, Мила Царовска направија увид во градежните активности за проширување на булеварот АСНОМ и за изградба на нов мост на реката Вардар. Според интензитетот на градба, општините Аеродром, Гази Баба и Центар за помалку од две години ќе бидат поврзани со нов мост и модерно булеварско решение што ќе го релаксира сообраќајот во овој дел од Скопје.

Новиот мост на Вардар ќе ги поврзува улицата Васко Карангелевски во Аеродром со улицата Индустриска во населбата Ќерамидница, во Гази Баба. Вкупната должина на трасата изнесува 400 метри. Самиот мост ќе биде долг 150 метри, со 6 коловозни ленти, како и велосипедски и пешачки патеки од двете страни. Вредноста на договорот за изведба на оваа фаза изнесува 365,6 милиони денари со вклучен ДДВ.

– Денеска вршиме увид на интензивните градежни активности за изградбата на новиот мост на булеварот АСНОМ, односно втората фаза од пробивањето на булеварот. Веќе се поставени темелите, а мостот ќе биде со габарит како мостот Гоце Делчев и ќе овозможиме нов сообраќаен коридор од општина Аеродорм кон општина Гази Баба. Работите се одвиваат според предвиденото темпо и очекувам кон средината на идната година да го завршиме овој капитален проект, имајќи предвид дека вистински мостови во Скопје не се градени повеќе од 20 години – изјави Градоначалникот Шилегов.

По изградбата на новиот мост и пробивањето на новиот коридор, граѓаните од Ново Лисиче до Судската палата со автомобил ќе се стигнуваат за 5 минути, со автобус за 10 минути, со велосипед за 18 минути, а со пешачење за 35 минути. По овој мост ќе сообраќаат и нови автобуски линии кои дополнително ќе го намалат сообраќајниот метеж.

Од Град Скопје велат дека изградбата на ваков мост на реката Вардар во планската документација на Скопје постоела уште од 1965 година, но за жал, заради отсуство на визија за развој на градот и немање чувство за вистинските приоритети неговата изградба била одложувана за некои подобри времиња.