Македонија
Почна средбата за помирување, од ВМРО-ДПМНЕ не дојдоа

Почна координацијата кај претседателот на Собранието, Талат Џафери, на чиј дневен ред
единствена точка е формирањето интерпартиско парламентарно тело за помирување и интеграција, на барање на новата пратеничка група независна од ВМРО-ДПМНЕ и коалицијата. Пратениците на ВМРО-ДПМНЕ не дојдоа на координацијата.
Присутни се дел од пратениците на новата пратеничка група, освен тројцата обвинети за 27 април. На средбата учествуваат координаторите на пратеничките групи на СДСМ, ДУИ, претставници на Беса, Алијанса за Албанците и независниот пратеник Панчо Минов.
Претседателот на Собранието, Талат Џафери, за денеска закажа координација со потпретседателите на Собранието, координаторите на пратеничките групи и претставниците на политичките партии што не се организирани во пратенички групи. Координацијата требаше да се одржи вчера, но на состанокот кај Џафери не присуствуваа подносителите на иницијативата, поради обврски поврзани со посетата на претседателот на австрискиот Национален совет на Австрија, Волфганг Соботка, кој вчера се обрати пред пратениците во Собранието.
Формирањето на телото за помирување беше еден од условите на осумте опозициски пратеници да гласаат за отворање на Уставот. Нивните очекувања се дека сите пратенички групи ќе се вклучат во работата на интерпартиската комисија, која првенствено ќе се фокусира на настаните од 27 април, а не ја исклучуваат можноста да се продолжи мандатот и истото работно тело да функционира и во иднина за други политички прашања.
Од опозициската ВМРО-ДПМНЕ го повторија ставот дека нема да учествуваат во работата на ова тело, а како причина сега го наведуваат изборот на Џафери да раководи со него. Од партијата, сепак, оставаат можност дека ќе ги почитуваат одлуките на телото ако се во насока на неселективно помирување, но не отстапуваат од барањето закон за целосна амнестија на обвинетите од 27 април.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Скопската ЗОО од утре може да биде затворена, вработените од вчера се и без здравствено осигурување, а плата немаат 45 дена

Доколку не им биде исплатена платата за март на вработените, веројатно скопската Зоолошка градина од утре ќе биде затворена за посетители. Вака најави Јаким Неделков, претседател на Синдикатот за образование, наука и култура (СОНК), оти вработените, поради доцнењето на платата, веќе немаат ниту здравствено осигурување, а секојдневно се изложени на повреди.
„Испоснички го дочекаа Велигден, а тој испоснички живот во Зоолошката градина продолжува и за првомајските празници и навистина трпението на овие луѓе е при крај. Премногу културно се однесуваат овие луѓе, кои се дел од културата и со избрани зборови ја кажуваат својата мака, како и тагата, но факт е дека од вчера немаат ниту здравствено осигурување. Секојдневно се изложени на повреди и да останат без здравствено осигурување во најмала рака е нехумано и итно мора да се најде решение за овој проблем. Дефинитивно, СОНК ќе ја земе работата под свое и оваа наша толеранција, оваа наша коректност кон надлежните, веројатно некој ја толкува како наша слабост. Апсолутно не е така, ако денеска излегоа луѓето да си ја кажат својата мака јавно, пред медиумите, од утре па натаму, доколку не се исплатат платите, веројатно и вратите на Зоолошката ќе бидат затворени“, рече претседателот на СОНК, Неделков.
Установите од културата, кои се на централно ниво, Неделков вели дека веќе сите имаат земено плати, како што е дадено упатството од Министерството за култура, но, за жал, некои од институциите, кои се на локално ниво, од засега непознати причини сѐ уште немаат плата. Неделков побарал состанок со директорот на Зоолошката, но тој денес не е работа, па писмено ќе му се обратат за да побараат средба и со него и со одговорните на централно ниво.
Некои од вработените, денес, за време на паузата, излегоа пред Зоолошката и апелираа да им се исплатат платите.
„Овој протест е за да нѐ видат дека навистина немаме земено плата за март. Последната плата ја зедовме пред 45 дена. Нам ни требаат пари, а од вчера го изгубивме и здравственото поради тоа што не зедовме плата навреме. Имаме колеги на боледување и бараат што побргу да им се реши проблемот, кај без пари, па и без здравствено осигурување сме. Ги замолувам оние што се надлежни во оваа работа што побргу да најдат модус да го решат ова за ние што побргу да земеме плата за да не дојдеме до некои други несакани работи, да не дојдеме до големи штрајкови. Ние сме 50-ина вработени и веќе ни се јавуваат банки, извршители, телефоните ни се исклучени“, рече Миле Таневски, претседател на синдикалната организација на скопската Зоолошка градина.
Зоонегувателот Мирослав Станковиќ вели дека во Зоолошката работните задачи за двајца вработени ги завршува по еден оти немаат доволно вработени.
„Ние сме склони на повреди, сега веќе немаме ни здравствено осигурување. Работата не ни е лесна. Надвор сме во сите временски услови, правиме сѐ, импровизираме за да ги решиме сите проблеми. Заслужуваме редовно да си работиме, да мислиме само на работата и на животните. Ние сме минимално вработени. Немаме луѓе по реони, работници, даваме сѐ од себе. Кога треба една работа за двајца да ја работи еден, тоа е многу тешко“, вели Станковиќ.
Вработените што излегоа пред Зоолошката и без плата и без здравствено осигурување, денес, по паузата, им се вратија на обврските.
Македонија
Меморандум за соработка на МВР со Министерството за спорт

Министерот за внатрешни работи Панче Тошковски и министерот за спорт Борко Ристовски денеска во Министерството за внатрешни работи потпишаа Меморандум за соработка помеѓу двете министерства во областа на физичките подготовки и спортски активности.
Со овој Меморандум за соработка се утврдува рамката помеѓу страните потписници за работи од заеднички интерес базирани на искористување на стручно- научните, професионалните, материјално-техничките и просторните услови насочени кон унапредување на едукативните, истражувачките и апликативните активности преку кои ќе се реализира соработката за работи од заеднички интерес.
„Со потпишување на овој меморандум ја подигнуваме нашата и досегашна одлична соработка на повисоко ниво со што директно ќе влијае врз работата на министерството и подготвеноста на полициските кадети и службеници. Спортот и физичката подготвеност е во директна поврзаност со успешното извршување на задачите на полициските службеници а со тоа и чување на безбедноста на граѓаните. Планираните проекти со министерството за спорт ќе значат унапредување на терените и можностите за квалитетни спортски активности на ниво на европските полиции со една цел, да имаме подготвена и спремна полиција која ќе биде вистински гарант на безбедноста на своите граѓани“, потенцираше министерот Тошковски.
Македонија
(Видео) Кузеска: ДПМНЕ се врати, слободата на медиумите замина, пад на слободата по 8 години

Портпаролката на СДСМ, Богданка Кузеска оценува дека за прв пат после 8 години Македонија бележи пад од 6 места на Индексот за слобода на медиумите за 2025 година, објавен од „Репортери без граници“.
Според неа, после осум години постојан напредок под водство на владите на СДСМ ваков драстичен пад се случува за прв пат.
„Од 118-то место во 2016 година, со СДСМ Македонија напредуваше до 36-то место, на најдобро место во регионот, благодарение на посветените политики за слобода на говорот, транспарентност и независност на медиумите.
Овој континуиран напредок на слободата на медиумите сега е сериозно загрозен.
ДПМНЕ се врати – слободата на медиумите замина.
Секогаш кога ВМРО-ДПМНЕ е на власт, слободата на медиумите се гуши, новинарите се под притисок, а медиумскиот простор се стеснува. Денес тоа повторно се случува“.
„Репортери без граници“, потсетува таа, алармираат дека новинарите се изложени на закани и напади, а владините функционери покажуваат понижувачки ставови кон медиумските работници.
Според Кузеска, наместо да ги унапредува демократските стандарди, Владата предводена од ДПМНЕ ги враќа добро познатите методи на контрола, притисоци и страв.
Ова, додав, е јасен аларм за загрижувачката насока во која оди државата под власта на ДПМНЕ.
Ја повика јавноста, граѓанските организации и меѓународната заедница на будност.
„Слободата на медиумите е темел на секое демократско општество и не смее да биде жртва на партиските апетити и авторитарните амбиции на ДПМНЕ“.
СДСМ, нагласи таа останува цврсто на страната на слободното новинарство и ќе продолжи да се бори против секоја форма на цензура, притисок и медиумска репресија.