Македонија
(Видео) Третпат одбиена иницијативата на Тодор Петров за референдум за името
Иницијативата на Тодор Петров за собирање најмалку 150.000 избирачи за распишување нов референдум за името не помина на Комисијата за политички систем, како и на Законодавно-правната комисија.
Претседателот на Комисијата за политички систем, Чедо Саздовски, образложи дека инцијативата не е уредна затоа што прашањето не било во согласност со името на државата и дека не може да се распише нов референдум пред истекот на рокот од 2 години по минатиот референдум што се одржа на 30 септември лани, како и поради тоа што Собранието претходно на седница ја разгледало оваа инцијатива и донело заклучок дека не е уредна.
На Комисијата пратеникот Ферид Мухиќ бараше образложение од предлагачот со каков мотив бара распишување нреферендум затоа што веќе преспанскиот договор е во сила. Според Мухиќ, преспанскиот договор не можел да се поништува и не гледа смисла за распишување референдум.
„Каква и да биде одлуката на референдумот, таа не може да дејствува ретроактивно. Не знам каква е смислата на референдумот кога одлуката нема да има правно дејство. Ако тоа е само од морална смисла да видиме дека граѓаните се незадоволни од промена на името, во ред. Но, ако идејата е да се стопираат евро-атлантските процеси, тогаш сум против“, рече Мухиќ
Петров рече дека граѓаните имаат право да се изјаснат дали се за промена на името или не и дека Собранието треба да им го овозможи тоа. Тврдеше дека прашањето не е исто со референдумот од лани и рече дека одлуки може да поништува само Уставниот суд, а не Собранието.
„Одлуката нема само морална димензија. Прашањето е многу јасно – зошто Собранието се плаши од народот. Но, Собранието не е тоа што може да носи и укинува одлуки, ништо не е трајно и вечно. Ако цената е ЕУ како што тврдите, јас и тука не се согласувам. Има членки што пристапиле на ЕУ и кои отстапиле. Граѓаните теба да кажат дали се за ЕУ под вакви услови“, рече Петров.
Ставот на Петров го бранеше пратеникот од ВМРО-ДПМНЕ, Трајчо Димков. Тој тврдеше дека Собранието нема право да го укине граѓанското право на референдум и затоа побара да се усвои барањето на Петров.
Ова беше трета инцијатива на Петров за референдум, која е одбиена.
Иницијативата е поткрепена со потписи од 157 граѓани за распишување референдум на кој граѓаните треба да одговорат со „за“ или „против“ на прашањето: „Дали сте за промена на името на државата Македонија во држава Северна Македонија?“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.
Македонија
Николоски го претстави планот за Николиќ во Дојран: Уредена плажа, патека и подобро електроснабдување
Потпретседателот на ВМРО-ДПМНЕ, Александар Николоски, при посетата на дојранското место Николиќ, најави повеќе инфраструктурни и развојни проекти за локалното население и туристите.
Николоски посочи дека приоритет е решавањето на проблемот со снабдувањето со електрична енергија, бидејќи местото брзо се шири со нови куќи и викендици.
Како втор проект го најави уредувањето и осветлувањето на пешачката патека што ќе води од населбата до плажата, која, според него, ќе стане туристичка атракција.
Трет приоритет е уредувањето на плажата Николиќ, која ќе добие концесионер со обврска да ја трансформира во современо туристичко место.
Николоски додаде дека се разговара и за изградба на културен дом и решенија за предучилишно згрижување на децата.
„Убеден сум дека Илија Николиќ ќе биде новиот градоначалник на Дојран и дека заедно ќе ги реализираме овие проекти со поддршка од Владата“, изјави Николоски.
Македонија
Мицкоски од Пробиштип повика на масовна излезност во вториот круг
Во првиот круг коалицијата којашто ја предводи ВМРО-ДПМНЕ освои 33 градоначалници. Двајца во меѓу време, помеѓу првиот и вториот круг, против кандидати на нашите кандидати се откажаа, што значи дека сега веќе се 35 градоначалници и во уште 24 општини сме во вториот круг. Во недела ќе се одлучува кој ќе биде градоначалник во тие 24 општини. Во 6 од тие 26 општини сме второпласирани, со тенденција и со голема шанса, бидејќи разликата е премногу мала, да бидеме првопласирани, рече претседателот на ВМРО-ДПМНЕ, Христијан Мицкоски на вечерашниот мини митинг во Пробиштип во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски изрази убедување дека коалицијата предводена од ВМРО-ДПМНЕ, после овие локални избори ќе има 59 градоначалници.
„Истовремено, дозволете ми да информирам дека во 58 општини советничките листи ан коалицијата предводена од ВМРО-ДПМНЕ победија и имаат убедливо мнозинство во Советот. Кога на сето тоа ќе се додаде и резултатот во Градот Скопје, односно убедливото водство на идниот градоначалник на Градот Скопје, Орце Ѓорѓиевски, 90 илјади наспроти 30 илјади, отприлика нешто повеќе од 3 спрема 1, очекуваме во вториот круг таа бројка да дојде до 120 можеби 125 илјади гласа. И убедливата победа на советничката листа на коалицијата предводена од ВМРО-ДПМНЕ за Град Скопје, доаѓаме до фантастична бројка од 60 општини во кои што се состои и Градот Скопје, нешто што до сега на ниту една политичка коалиција во независна Македонија не и се случило“, истакна Мицкоски.
Втората крупна политичка порака, вели Мицкоски, која сакам денес од Пробиштип да ја испратам, е дека конечно, партијата која повеќе од 20 години беше дел од сите влади во Македонија, Демократската унија за интеграција, на овие локални избори е поразена.
„Ние велевме на парламентарните избори пред година и половина ги развластивме и дека ќе дојде време, кога на локалните избори, тие ќе бидат поразени. И тие практично се поразени на овие локални избори“, рече Мицкоски.
Додаде дека во вториот круг имаме три опции, од кои првата е да се гласа за коалицијата која ја претставува ВМРО-ДПМНЕ, која е победничката коалиција, додека втората опција е поранешната владина коалиција предводена од СДСМ, која е опција која не враќа назад во времето и која ја ограбуваше, понижуваше и распродаваше Македонија.
„И третата опција, по мене, најкатастрофални е да останеме дома и да не излеземе на изборите и да дозволиме некој друг да одлучува во наше име“, дециден беше Мицкоски додавајќи дека со седењето дома никој не се казнува, туку со тоа се казнуваат самите граѓани кои не излегле на гласање.
Затоа, Мицкоски ги повика граѓаните на Пробиштип, но и на цела Македонија во недела на 2 ноември да излезат на гласање што е можно помасовно и да го дадат својот глас онака како што тие мислат дека е најдобро.
„Но, убеден сум дека кога ќе застанете позади параванот, со пенкалото во рака и со гласачкото ливче пред вас, ако го слушате разумот и вашето срце, и длабоко погледате во вашата душа, ќе видите и ќе препознаете дека таму извира бројот 9 и името на Тони Тоневски. И јас сум убеден дека тоа ќе биде вашата опција за следните четири години“, посочи Мицкоски.

