„ДУИ го губи компасот, во забуна не знае што прави, кого напаѓа, а кого го брани. Мијалков им стана помил од меѓународната заедница. ВЛЕН со загриженост ги следи неодамнешните изјави на пратеникот Зејд Реџепи од Европскиот фронт (ЕФ), коалиција на ДУИ, со кои повторно се прави обид да се наруши довербата на Албанците кон нашите стратешки партнери од Западот. Со ваквите ставови, раководството на ДУИ и Европскиот фронт покажува дека не знае што прави, дека е во целосна конфузија и дека ги става своите лични и партиски интереси пред стратешките интереси на Албанците и на државата“ велат денеска од коалицијата ВРЕДИ.

Ја повикаа јавноста и членството на ДУИ „да размислат дали нивните лидери, кои очигледно продолжуваат да ги конфронтираат Албанците со нашите западни партнери, заслужуваат уште да ја водат партијата и да учествуваат во креирањето на иднината на граѓаните. Време е за јасна дистанца од корумпирани политики и антизападна реторика. Албанците и сите граѓани на Северна Македонија заслужуваат искрени лидери, одговорни политики и силно партнерство со ЕУ, НАТО и целата меѓународна заедница“.

„ДУИ и ЕФ ги дистанцираат Албанците од западните сојузници. Настапите со кои се изразува сомнеж во меѓународната заедница укажуваат дека ДУИ и Европскиот фронт намерно настојуваат да ги оддалечат Албанците од Западот. Ваквата реторика е крајно штетна и оди спротивно на децениските определби на граѓаните на Северна Македонија, вклучително и мнозинството Албанци, за зачленување и блиско партнерство со ЕУ и НАТО. Обвинувањето на меѓународната заедница за сопствените криминални афери е неосновано. Неразбирливо е како ДУИ и ЕФ упорно го вперуваат прстот кон амбасадорите и странските институции, наместо да се соочат со сомнежите и фактите за своите корупциски скандали“ велат од ВРЕДИ.

Сметаат дека „Ваквиот обид за префрлање на вината е само уште еден доказ дека раководството на ДУИ е во длабока забуна и дека нема капацитет да ги решава вистинските проблеми. Личната одговорност на Артан Груби сакаат да ја релативизираат. Обидите да се прикаже дека Артан Груби не е виновен за сопствените постапки, туку дека „криви“ се амбасадорите, е врв на манипулација“.

„Ова е класичен пример на избегнување на одговорност, со што се потценува и јавноста и членството на ДУИ. Тврдењето дека „Артан настрадал затоа што ги слушал“ е врв на самобендисаноста на ДУИ и ЕФ. Оваа теза на ДУИ и ЕФ, според која одговорноста им припаѓа на другите (амбасадори, меѓународни претставници итн.), наместо на самите функционери, е уште еден очаен обид за алиби. ДУИ и ЕФ продолжуваат да даваат нелогични и контрадикторни изјави за да ги залажат сопствените членови и целата јавност“ посочуваат од ВРЕДИ.

Министерот за надворешни работи и надворешна трговија, Тимчо Муцунски, денеска на проштална средба го прими вонредниот и ополномоштен амбасадор на Комонвелтот Австралија во нашата земја, Даниел Емери.

На средбата Муцунски му се заблагодари на амбасадорот Емери за неговиот значаен придонес во унапредувањето на билатералните односи меѓу двете земји за време на неговиот мандат.

Во текот на разговорот, соговорниците се осврнаа на одбележувањето на јубилејот – 30 години од воспоставувањето на билатерални односи помеѓу двете земји, како и на важната улога што ја има македонската дијаспора во Австралија. Таа претставува вистински мост за поврзување меѓу граѓаните на двете земји и значаен фактор во билатералната соработка.

Посебен акцент беше ставен на можностите за унапредување на економската соработка и зголемување на трговската размена меѓу двете земји. Министерот Муцунски и амбасадорот Емери разговараа и за продлабочување на соработката во повеќе области од заеднички интерес, вклучително во сферата на образованието, науката, здравството, културата и туризмот. На средбата беа разменети мислења и за актуелната политичка и безбедносна состојба во регионот и пошироко.

Државната администрација од неколку министерства и денес излезе на получасовен протест со барање за 30 отсто поголема плата и потпишување колективен договор. Претседателот на Синдикатот на вработените во управата, правосудните органи и здруженијата на граѓаните (УПОЗ), Трпе Деаноски денес пред Министерството за култура, ја замоли опозицијата да не се лепи на протестот, а на Владата и порача да не го меша УПОЗ со некој друг Синдикат.

„„Не случајно на вториот ден од протестите сме тука пред Министерството за култура. Во 2023 година токму овие вработени 21 ден по ред протестираа пред Владата на Република Македонија со истите барања како и денес – потпишување на колективни договори и зголемување на платите на вработените. Нашите барања се исти со години наназад и секој обид од страна на Владата или политичките партии да докажат дека има политика во протестите или во работата на Синдикатот ќе биде залуден.

Да ја замолам сегашната опозиција да не се лепи на овие протести бидејќи имаа седум години да го решат овој проблем, но наместо да го решат, направија се што можат да го забранат колективното договарање па дури беа и првата Влада која поништи колективен договор. Да ја поправам вчерашната изјава на Владата бидејќи очигледно го има помешано Синдикатот на УПОЗ со друг Синдикат“, рече Деаноски и потсети дека изминативе три години УПОЗ има организирано три штрајка и најмалку 20 протести.

На вториот ден протести на државната администрација, некои од вработените се пожалија дека има Министерства во кои се вршат притисоци да не се излегува на протест.

„Во неколку министерства да, има притисоци да не се излегува на протест. Моментално не можеме да ги кажеме, но ќе одговориме на тоа до крајот на неделата“, рече Деаноски.

Бранко Костовски, претседател на Синдикална организација при Министерството за култура и туризам на УПОЗ, рече дека платите на 70 проценти од вработените во Министерството за култура се под просечната плата, а разликата со платите на вработените на истите позиции во државните органи кои го добија додатокот на основната плата е 30 проценти. Синдикалната организација при Министерството за култура и туризам пред повее од две години има изработено предлог-текст на колективен договор кој предвидува објективно и коректно покачување на платите на вработените во висина од 30 %, исто како и покачувањето за вработените во Министерството за финансии, Министерството за одбрана, Генерлниот секретаријат на Владата, СОЗР, УЈП, Царинска управа, државна администрација при Универзитетот „Св. Кирил и Методиј“ . Ние го поздравуваме покачувањето на платите на нашите колеги од останатите државни органи, но истовремено бараме од министерот за финансии, Владата и премиерот да не дозволат нерамноправен третман на вработените во државните органи“, рече Костовски.

На протести за 30 отсто поголема плата и потпишување колективни договори излегуваат вработените од Министерството за животна средина и просторно планирање, Министерството за дигитална трансформација, Министерството за земјоделство, Министерството за правда, Министерството за култура и туризам, Министерството за економија и труд, Министерството за транспорт, Државниот завод за статистика и Државниот архив. В петок најавија дека ќе протестираат пред Министерството за финанси.