Основното јавно обвинителство за гонење организиран криминал и корупција пред два дена ја добило документацијата за модуларната болница во Тетово од Бирото за јавни набавки, а вчера, по 14 часот, е добиена и од Министерството за труд и социјална политика.

Шефицата на Основното јавно обвинителство за гонење организиран криминал и корупција, Вилма Русковска, информира дека денеска истражителите почнале со првично разгледување на документацијата.

„Обвинителството за гонење организиран криминал и корупција е наделжно само во делот на јавната набавка и само тоа ќе се проверува дали се почитувани процедурите, оваа набавка одела и според посебен закон, кој го има донесено Владата. Тоа е само наша надлежност, друго не“, рече Русковска прашана што ќе проверува Обвинителството.

Обвинителката изјави дека техничката спецификација ја добиле на англиски јазик и веднаш ја скенирале и по имејл ја испратиле во Обвинителството во Тетово за да може експертите од Германија да се запознаат со неа.

Власта воопшто не се меша во истрагата за пожарот во модуларната болница во Тетово. Да сакаше да се меша, немаше да повика германски истражители од највисок ранг, кои што треба да ги испитаат сите околности, изјави денеска министерот за правда Бојан Маричиќ, одговарајќи на новинарско прашање за тоа дали власта се меша во истрагата во Тетово.

Маричиќ потенцира дека германските истражители пристигнале вчера и дека сите институции се ставени на раполагање да помогнат во истрагата.

„Вчера вечерта беше свикан Кризниот штаб и сите документи се предадени на надлежните институции. Обезбедено е местото на настанот и сите предуслови за брза и успешна истрага ги имаат институциите, а ние како Влада сме заинтересирани час поскоро да излезат институциите со фактите, кои ќе помогнат за понатамошно постапување и извлекување научени лекции од овој трагичен настан, рече министерот за правда.

Потпретседателот на ВМРО-ДПМНЕ, Владо Мисајловски, на денешната прес-конференција во врска со трагедијата во Тетово и прашањето за оставки во Владата истакна дека оставката секогаш билa и ќе биде чин на одговорност.

Според Мисајловски, одбивањето оставки во Владата по еден таков трагичен настан како во Тетово значи само две работи: оваа Влада нема морал и оваа Влада не чувствува одговорност.

„ВМРО-ДПМНЕ не бара одговорност од Владата поради политичка малициозност или затоа што има лични мотиви против Заев или Венко Филипче, туку поради тоа што се неспособни, но и поради објективна истрага, која мора да ја има. Тоа што премиерот Заев го штити министерот Филипче значи дека и Заев треба да си поднесе оставка поради негово активно учество во несмасниот обид да се одговорат прашањата што ја мачат целата јавност“, нагласи Мисајловски.

Од ВМРО-ДПМНЕ поставија неколку прашања: „Kој е виновен што сме земја со највисока смртност во Европа од Ковид-19? Кој е виновен што нема нови протоколи за лекување од Ковид-19? Кој е виновен што нема персонал во болниците и роднини одат да се грижат за пациентите? Кој е виновен што немаше вакцини и сѐ уште не оди добро процесот на вакцинација? Кој е виновен што народот нема доверба во системот и во вакцинирањето?“, рече Мисајловски.

Побара одговори и на прашањата кој е виновен што немало технички прием на модуларната во Тетово?

„Кој е виновен што немало ПП-апарати? Кој е виновен што е направена од ПУР-пена и никој не водел сметка дали таа е запалива? Кој е виновен што не се дозна кој ги исекол цевките за довод на кислород во модуларната болница во Тетово на почетокот? Кој е виновен што од роднини на пациенти на сестри, доктори и на болничари им се плаќало по 1.000 денари да водат грижа за пациентите и дали е тоа нормално? Кој е виновен што дополнително надвор од тендерска постапка се поврзувале кислородните цевки?“, запраша потпретседателот на ВМРО-ДПМНЕ.