Во рамките на акцијата која Општина Чаир ја покрена за отстранување на терасите поставени без дозвола во Старата Скопска Чаршија, Градоначалникот на Општина Чаир Висар Ганиу јавно им се заблагодари на сите бизнисмени кои го испочитуваа законот и сами ги отстранија терасите за кои не поседуваа дозвола. Од Општина Чаир соопштија дека за нив нема да бидат изречени предвидените законски казни.

„Иницираната акција од страна на Општина Чаир ќе продолжи да се реализира и градоначалникот Ганиу им гарантира на граѓаните дека никој нема да биде поштеден и над законот. Рокот за реакција од страна на самите сопственици е 5 работни дена. По овој рок, инспекторите и полициските службеници ќе ги отстранат незаконски поставените тераси и за истите ќе бидат изречени соодветните казни“, велат од општината.

Општина Центар почна со отстранување нелегални тераси на повеќе од 20 угостителски објекти, а како што информираат од таму, во процедура се и други извршни решенија по кои Општината ќе постапува во наредниот период.

„Предмет на отстранување се објектите кај кои е утврдено дека и покрај немање одобрение за поставување урбана опрема од Град Скопје, тие ја поставиле опремата и направиле тераси со кои бесправно узурпирале јавен простор“, појаснуваат општинските власи.

На листата со објекти кај кои Центар изминатиов период утврдил нерегуларности и во согласност со тоа следува отстранување на терасите се: ресторан „Гурмет“, кафе-бар „Паладиум“, кафе-бар „Кофи фектори“, гостилница „Сушико“, гостилница „Лантерн“, ресторан „Барака“, кафе-бар „Броз-кафе“, гостилница „Фрути ди маре“, кафе-бар „Деус“, бистро „Правда“, кафе-бар „Нано-бар“, гостилница „Бруклински“, гостилница „Булевар“, кафе-бар „Винил“, кафе-бар „Џус-бар“, кафе-бар „Локал 45“ и гостилница „Сквер“.

Наведените објекти доставиле барање до Град Скопје за вршење дејност надвор од својот деловен простор и поставување урбана опрема, но добиле официјално решение од Градот со кое нивното барање се одбива. Но, и покрај тоа, тие постапиле спротивно од решението.

Инспекциските служби од Центар, по извршениот увид, им дале на сопствениците решенија за отстранување со можност сами да постапат и да ја отстранат недозволената опрема. Доколку не го сторат тоа во законскиот рок, Општината со полициска асистенција ќе го отстрани нелегалниот дел.

Минатата недела цел на Општина Ценатар беа и дивите тераси на кафулиња на улицата Ленинова во Дебар Маало.

Седум години по почнувањето на изградбата на населбата Јака во Илинден, состојбата е непроменета – очајна, а општинската власт не почувствува никаква обврска кон своите жители и не почна со реализација на речиси ниту еден проект од доменот на инфраструктурното уредување, велат жителите на оваа населба. Тие се жалат дека иако проектот бил најавуван како елитна населба, тие живеат во кал, во мрак и без јавен превоз.

Сопствениците на куќи и плацови велат дека општинската власт воопшто не почнала со инсталација на водоводна мрежа, не е поставен ниту еден метар асфалт, уште многу улици не се ниту трасирани, а некои од сопствениците не може ниту да пријдат до своите куќи.

„Немаат поставено ниту една светилка за надворешно осветление – иако редовно го плаќаме, не е означена ниту една улица во населбата иако во неа во моментот живеат триесетина семејства, а повеќе од стотина други семејства не може да се вселат во своите куќи бидејќи ги немаат основните услови за живеење. Во 21 век населбата Јака, инаку од општинските власти најавувана како проект ‘Елитна населба’, е целата во кал, во потполн мрак, без јавен превоз – без можност за приоѓање евентуално потребна екипа на брзата помош, противпожарно возило, без можности за достава на пошта – генерално, со супстандардни услови за домување. Во такви услови живееме триесетина семејства, кои немавме поинаков избор, освен да се вселиме во нашите куќи, а се надевавме на брзо решавање на овие основни инфраструктурни потреби“, велат жителите.

Тие велат дека ги купиле плацовите во текот на 2012 и 2013 година за изградба на куќи за семејно домување и дека ги реализирале сите финансиски обврски кон општината Илинден. Според нивни неофицијални сознанија, од овој проект Општината Илинден инкасирала повеќе од 1.200.000 евра.

Граѓаните велат дека формирале и неофицијален одбор и дека разговарале со градоначалникот и други претставници на општинската власт, но инфраструктурните проблеми и натаму останале нерешени.

„Во последните неколку месеци од 2019 година постојано се обидуваме да се состанеме со градоначалникот на општината, но тој постојано нè избегнува. Длабоко сме разочарани, се чувствуваме излажани од страна на општинските власти, не можеме да ги сфатиме ваквиот дискриминаторски однос кон нас, нивната непрофесионалност и ароганција кон сопствените граѓани. Ваквиот однос на општинската власт кон нас развива силна разочараност, револт и недоверба не само кон институциите на локално ниво туку и на државно ниво“, велат сопствениците на куќи и плацови во Јака. Тие доставиле и претставка до народниот правобранител.