На Попова Шапка и планинскиот премин Пресека провејува снег со слаб интензитет, кој засега не се задржува на коловозот, информираат од Автомото сојузот на Македонија (АМСМ).

Сообраќајот на државните патишта се одвива редовно, во зимски услови, а коловозите се главно влажни. Сите патни правци се проодни и нема забрани или ограничувања за движење.

АМСМ апелира до возачите да ја прилагодат брзината на условите на патот, да ја почитуваат поставената сообраќајна сигнализација и да возат внимателно. Особена претпазливост се препорачува на патиштата низ котлините, речните долини и клисурите, каде постои ризик од одрони. Меѓу потенцијално ризичните делници се наведуваат: Катланово – Велес, Маврово – Дебар – Струга, Виница – Берово и Кочани – Делчево.

Возачите се потсетуваат дека зимските услови бараат дополнителна подготвеност, како и задолжителна зимска опрема за непречено и безбедно патување.

Без вода денеска од 17:10 часот се три куќи и болницата „Неуромедика“ на  улицата „Влае“ во општина Карпош.

Како што соопшти ЈП „Водовод и канализација“ – Скопје, прекинот е поради уличен дефект на водоводена цевка Ф-100 милиметри од страна на изведувачот „Елма Градба“ на улица „Влае“ број 57.

Дефектот, како што се наведува, ќе биде саниран од изведувачот „Елма Градба“. Водоснабдувањето ќе биде прекинато до завршување на работните активности.

Министерот за надворешни работи и надворешна трговија, Тимчо Муцунски, денеска најави значителни измени на Законот за надворешни работи, со кои ќе се зголеми процентот на амбасадори од редот на професионалните дипломати во Министерството.

„Предлагаме зголемување на процентот на амбасадори од редот на професионалните дипломати од една третина на најмалку една половина,“ истакна Муцунски.

Со измените, како што објасни министерот, се враќа четиригодишниот мандат на амбасадорите наместо досегашните три години. Оваа промена е поттикната од честата ротација, која предизвикувала потешкотии во адаптацијата во земјите на приемот и дополнителни трошоци за Министерството и државниот буџет.

„Четиригодишниот мандат овозможува поголема стабилност и ефикасност,“ додаде тој.

Одредбата за именување амбасадори надвор од Министерството, кои со своето општествено и културно делување оставиле трага, исто така, претрпува измени.

„Се предвидува од оваа група да доаѓаат најмногу половина од амбасадорите,“ објасни Муцунски.

Законот исто така го допрецизира учеството на Собранието во процесот на именување амбасадори.

„Со оваа измена, ќе се спречи можноста претседателот на државата да потпише указ без соодветна процедура во Собранието,“ изјави министерот, посочувајќи на претходните примери на непочитување на законските процедури.

Предложените измени предвидуваат корекција на коефициентите за плати и животни трошоци на дипломатите во странство.

„Со години платите и предвидените кирии за дипломатите стагнираат, што предизвикува потешкотии,“ нагласи Муцунски.

Муцунски истакна дека измените вклучуваат и усогласување на Законот со новите надлежности на Министерството за надворешни работи и надворешна трговија во делот на трговијата и инвестициите.

„Овие измени обезбедуваат правна основа за Министерството да ги преземе обврските за креирање политики во делот на трговијата и инвестициите,“ рече министерот.

Заклучувајќи, Муцунски нагласи дека измените ја зајакнуваат професионализацијата на дипломатската служба и отвораат пат за поефикасно делување на државата на меѓународната сцена.