Македонија
Рашковски тврди дека го местат и побара Наќе Чулев да сведочи за софтверот

Ексгенералниот секретар Драги Рашковски тврди дека обвинителката Ивана Трајчева на компјутерски програм си пишувала пораки што ги прикажала како негова комуникација. Тој вели: „Заборавила да го смени времето, па во една секунда има 43 пораки. Еве кажете ми, јас проверував на интернет, тоа не е можно, Гинисовиот рекорд е дека за 50 секунди може да пишете една порака, а не 43 во една секунда“. Според него, Обвинителството не може да ги дава тие докази, бидејќи незаконски ги прибрале.
„ Обвинителството не може да импутира дека тоа се пораки, за коишто и самиот производител вели дека не може да утврди за каков тип податок станува збор. Од тоа што јас можам да ви го кажам е дека ќе имаме едно навистина интересно судење во македонското правосудство (особено во делот на компјутерската форензика, којашто слабо е применувана, а правосудството запознаено) коешто би требало да имплицира многу поквалитетен начин за прибирање на дигиталните докази. Бидејќи срамота е на лица кои немаат познавања, лиценци, ниту се вештаци, да им се дава да буричкаат, чепкаат по приватни податоци на лица на кои им се одземени телефоните. Податоци и факти што се апсурдни не може да бидат докази. 43 пораки во една секунда, на документ кој со форензичка анализа е докажано дека е правен на компјутерот на обвинителката, тоа не е податок извлечен од телефон, таму стои на кој компјутер е правено“, рече Рашковски.
Обвинетиот доставил и дваесетина нови докази со кои ќе докажува дека не е виновен. Меѓу нив е и предлогот Наќе Чулев, ексминистер за внатрешни работи, да сведочи на судењето.
„Доставивме докази дека не можете да тврдите дека мои средства, уплатени на моја сметка во 2015 година, потекнуваат од тендери во 2019 година. Срамота е тоа што се прави. Сите знаеме дека во 2015 година не сум бил ниту функционер, не може средства од 2015 г. да бидат од кривично дело во 2019 година. Не треба да сте правник, едноставно и Холивуд да го режира ова, не може да го направи така“, додаде Рашковски.
Прашан до каде е со градбата на куќата во Побожје, која новинарите ја нарекуваат хациенда, Рашковски одговори: „Такво нешто нема. Одете на местото, ќе видите, станува збор за плац, кој е купен од мои средства, со кредит за таа работа, и тие средства потекнуваат од времето кога не бев функционер, во 2013 година. Не влегов без средства на местото генерален секретар. Ако ги споредите имотните листови во 2017 година и 2021 година ќе видите дека нема разлика, освен во подароците на моите деца, прибрани од прослави. Друг податок, зголемување на имотот не постои. Децата имаат заштеда од родендени“, рече Рашковски.
Тој призна дека им ги препишал недвижнините на неговите деца.
„Сè друго е мој имот којшто сум го препишал, а сум го имал и пред тоа. Се вулгализира целата работа. Станот, имотот во Струмица, подвижните средства ги имав и пред да станам генерален секретар. Како и секој родител сакам моите деца да имаат нешто, ние сме традиционална земја, едноставно станот што сум го имал од 2011 година само сум го префрлил, имотот во Струмица што сум го имал од 2013 година само сум го префрлил на децата. Новиот имот во Побожје е на кредит“, додаде Рашковски.
Прашан како го вратил кредитот, бидејќи Обвинителството се сомнева дека тоа го направил преку злоупотреба на службената положба, Рашковски додава: „Станува збор за уплата на кредитни картички. Кога функционер оди на пат, има две опции, да земе аванс од институцијата каде што е вработен или, пак, да троши средства, а кога ќе се врати, тоа да го надополни. Обвинителството ја гледа само страната на уплати. Кога сум патувал, секој пат кога сум одел во хотел или ако сум патувал со автомобил сум точел гориво во странство, сум плаќал со моја картичка. Кога сум се враќал тие средства биле рефундирани. Сите знаат по благајничко работење дека тие средства се рефундираат во кеш. Кога ќе се вратат, нормално е вие да го покриете минусното салдо. Меѓутоа, Обвинителството тоа не сака да ви го прикаже како факт и вели ставал пари на својата картичка. А не ја гледа страната дека тие пари се трошени за оправдани трошоци“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Николоски: СДСМ го штити и брани однесувањето на Џафери за ДУИ да не им излезе од влада

Катастрофа, недостоинствено, срам и брука, тие се зборовите, вели потпретседателот на ВМРО-ДПМНЕ Александар Николоски одговарајќи на новинарско прашање како го опишува однесувањето на собранискиот спикер Талат Џафери.
Николоски потенцираше дека СДСМ само за да не им излезе ДУИ од влада го бранат однесувањето на Талат Џафери.
Факт е дека СДСМ секое сабајле и секоја вечер се моли ДУИ да не им излезе од влада затоа што знаат дека единствен начин за да одложат за неколку месеци торнадо е да им остане ДУИ во влада и затоа се спремни да го бранат Талат Џафери до последно, рече Николоски.
За карактерот на Талат Џафери најдобро зборува начинот на кој што беше избран, на човек би требало да му е срам да е избран на таков начин не би требало да се нафати на функцијата, тој си ја води функцијата. Така што нема ни срам ни морал. А уште помал морал од него имаат овие од СДСМ кои што го штитат, изјави Николоски.
Македонија
СДСМ: Обвинети во „Криминални парцели“ биле донатори на ВМРО-ДПМНЕ и Арсовска

Последните информации кои излегоа во јавноста покажуваат дека обвинети и осомничени во аферата „Криминални парцели“ со која се проневерени 1,6 милиони евра се донатори на ВМРО-ДПМНЕ, но и кампањата на Арсовска, велат од СДСМ попладнево преку соопштение.
„Орце Тодоровски, Дарко Тодоровски, Влатко Илиевски, Мирослав Митрески се на листите на донатори на ВМРО-ДПМНЕ, а Орце Тодоровски и на листата на донатори на Данела Арсовска.
Мицкоски треба да излезе пред граѓаните и да каже каде завршиле украдените пари од „Криминални парцели“?
Дали Мицкоски ја искористил познатата шема на неговиот ментор Никола Груевски и преку својот телохранител ги затскривал трагите за испумпување на пари од ЕВН, како што Груевски правеше со плацовите на Водно?
Овие сомнежи за коишто говориме се основани по сите информации кои изглегоа во јавноста дека станува збор за криминална шема“, се наведува во соопштението на СДСМ.
Македонија
ЦУК апелира на внимателност поради силно локално невреме и можни опасни порои во текот на викендот

Центарот за управување со кризи (ЦУК), согласно информацијата од Управата за хидрометеоролошки работи (УХМР), превентивно апелира и препорачува на граѓаните во земјава од попладнево до крајот на викендов да избегнуваат локално движење во и покрај суводолици и други стари корита – водотеци, како и во долови по коишто се слевале порано порои од обилни дождови.
Конкретно, концентарацијата на врнежи на одреден простор е со голема веројатност можна во делови на земјава, проследено со силно локално невреме. Постои голема можност да биде голема и опасна поројната вода по околината таму каде што ќе зафати поројониот дожд што се предвидува да падне во делови од земјава.
Од УХМР известија дека викендов земјава на места ќе биде зафатенa од метеоролошка нестабилност со интензивен пороен дожд (за кратко време поголема количина), грмежи и силен ветер, локално во форма на невреме, грмежи и можна појава на град. Во недела дневната температура ќе се намали за неколку степени, а од понеделник ќе се намали метеоролошката нестбилност и ќе преовладува потопло време.
ВРЕМЕТО ДО КРАЈОТ НА ДЕНОТ
Ќе биде нестабилно со пороен дожд, грмежи и засилен ветер, претежно од западниот дел на земјата кон Повардарието и кон североистокот и ќе премине и преку скопската котлина, информираат од УХМР.
Изолирана нестабилност ќе има и во вечерните часови. Преку ноќта облачност особено на истокот че се намали.
ВРЕМЕТО УТРЕ
Променливо облачно, посвежо и нестабилно со локален пороен дожд, грмежи и засилен ветер. Наместа процесите ќе бидат во форма на невреме со интензивен пороен дожд (за кратко време поголема количина), електрични празнења, силен ветер (над 70 км/час) и појава на град. Минималната температура ќе биде во интервал од 10 до 16, а максималната ќе достигне од 22 до 28 степени. УВ=6
Во Скопје, променливо облачно. Од претпладне ќе биде и нестабилно со пороен дожд, грмежи и засилен ветер со услови за појава на краткотрајно невреме. Минималната температура ќе се спушти до 14, а максималната ќе достигне до 24 степени.
ВРЕМЕТО ВО НАРЕДНИТЕ ДЕНОВИ
Под влијание на циклонска активност и утре ќе биде нестабилно со пороен дожд, грмежи и засилен ветер. Локално процесите ќе бидат во форма на невреме со интензивен пороен дожд (за кратко време со поголеми количества воден талог), електрични празнења, силен ветер (над 70 км/час) и појава на град. Утре преку денот температура ќе биде пониска за 3 до 5 степени. Од понеделник ќе се намали нестабилноста и повторно ќе преовладува потопло време.
Во Скопската Котлина утре ќе биде нестабилно со пороен дожд, грмежи и засилен ветер, повремено и во форма на краткотрајно невремем а од понеделник нестабилност ќе се намали.