Независната кандидатка за градоначалник на Град Скопје, поддржана од ВМРО-ДПМНЕ, Данела Арсовска, денеска се сретна со граѓанското здружение „Го сакам Водно“, веднаш по нивниот повик преку кој од кандидатите за градоначалник на Скопје побараа гаранција дека ќе работат за заштита на планината.

На средбата Арсовска ги ислуша сугестиите и истакна дека за Водно не смее да има компромиси и дека решенијата ќе се креираат заеднички преку формирање на работен комитет од здруженијата, со професори и експерти кои ќе работат на сеопфатна заштита на Водно.

„Ќе се залагам за заштита на просторот со Закон и ќе го решам проблемот со појавување на нови градби на парк шумата, без да дозволам да се закова дури и една шајка. Во исто време проектот за Водно – зелен штит на Скопје ќе вклучува и пошумување со 100.000 садници автохтони видови дрвја годишно. Се предвидува и 24-часовна лупа на Водно, односно постојана грижа за парк шумата. Ќе има 24-часовна патрола на редари кои ќе се грижат за заштита на шумското и природно богатство како и за безбедноста на планинарите при несакани ситуации, повреда или слично”, посочи Арсовска.

На крајот од средбата, таа се обврза на заедничка соработка и континуирана комуникација со цел Водно да продолжи да биде зелена заштита за Скопје и скопјани.

Градската организација на СДСМ бара од кандидатката за градоначалник на Скопје, Данела Арсовска, која вети 250 нови автобуси, да одговори зошто во нејзината биографија не се споменува дека била менаџер на фирма што се занимавала токму со продажба на автобуси во Македонија.

„Арсовска ја менаџирала фирмата ТЕМ МК, која во 2008 се занимавала со продажба на автобуси и нудела на продажба турски автобуси во Македонија. ТЕМ МК била семејната фирма што се трансформирала во ‘Ројал груп’, со седиште во салата ‘Расадник’, а во обете фирми сопственици биле Арсовска и татко ѝ“, посочуваат од СДСМ.

Од таму укажуваат и дека во целиот тек од кампањата, кога ветува 250 нови екоавтобуси, Арсовска промовира и рекламира еден од, како што велат, најскапите кинески електрични автобуси од 18 метри од кинеската фирма BYD.

„Арсовска рекламира кинески автобуси, а Македонско-кинеската стопанска комора се наоѓа на иста адреса со организации и фирми поврзани со неа и татко ѝ“, посочуваат од СДСМ.

Врз основа на ваквите сознанија, од партијата ја повикуваат кандидатката за градоначалник да одговори на неколку прашања за кои сметаат дека се во интерес на јавноста.

„Дали Арсовска била успешен или неуспешен менаџер на фирма за продажба на автобуси во 2008? Дали нејзиното рекламирање електрични кинески автобуси во кампањата има врска со Македонско-кинеската стопанска комора, која е на иста адреса со нејзини приватни и семејни правни лица? До кога Арсовска ќе бега од новинарите и ќе ги крие пипалата на семејниот бизнис ‘октопод’, кој ја упропастил скопската сала ‘Расадник’ – изградена од Град Скопје со пари на скопјани?“, прашуваат од градската организација на СДСМ.

Македонската јавност треба да знае дека од страна на министерот Оливер Спасовски, директорот на БЈБ и помошник- директорот во одделот за криминалистичка полиција, Оливер Лукароски, се врши класична злоупотреба на специјалната единица на МВР – „Тигар“ во партиски цели, обвини денеска Драган Ковачки, член на ИК на ВМРО-ДПМНЕ.

„Деновиве гледаме енормно и несразмерно присуство на полицијата и на нејзините специјални единици во градовите во кои има втор круг избори. Под плаштот на наводни акции за апсење дилери на дрога или опасни лица, Спасовски прави класична злоупотреба на специјалните единици и шири страв кај народот“, посочи Ковачки, кој додаде дека специјалната единица „Тигар“ е наменета за борба против терористички активности, а не за спроведување и штитење на, како што рече, партиските активности на Заев и Спасовски.

Претставникот на ВМРО-ДПМНЕ побара безбедносните служби да работат во интерес на граѓаните и порача дека секоја злоупотреба ќе биде процесирана веднаш по промената на власта.

„Немојте да си играте и да одите по паметот на давениците Заев и Спасовски. Знаеме дека некои од вас се уценети со вашите позиции, но и со прикривање дејства од страна на Спасовски за кои сте лично одговорни. Ги повикуваме чесните полициски службеници да постапуваат во согласност со законските овластувања. Знаеме дека морате да спроведувате наредби од вашите претпоставени, но верувајте дека одговорност за тие раководни структури што прават злоупотреби ќе има веднаш по промената на власта“, порача Ковачки, кој го повика народот масовно и референдумски да излезе на изборите в недела.