Членовите на Судскиот совет го изгласаа годишниот извештај за работата за 2018 година, но претходно претседателот Зоран Караџовски и членот Селим Адеми дискутираа што да пишува во извештајот, Република Македонија или Република Северна Македонија.

Дилемата ја отвори Караџовски кој започна дискусија за името на државата кое треба да го пишува на извештајот.

,,Да не кажам дека кога сум се родил јас, таа држава се викала Северна Македонија”, рече Караџовски, појаснувајќи дека промените настанале во 2019 година, а извештајот е за претходната година.

,,Во заблуда сте. Не сте ја смениле се’ уште таблата на влезот. Сигурен сум дека и печатите не се сменети. До крај ја браневте Република Македонија. Јас, Селим Адеми, сум член на Судскиот совет на Република Северна Македонија, иако бев избран од Собранието на Република Македонија”, рече Адеми.

Претходно, 12 членови на советот назначија вд претседатели на 10 основни судови во државата.

По повод претстојните велигденски празници, во петок (26.04.2019 година) возилата од јавниот превоз ќе сообраќаат по неделен возен ред, со исклучок на автобусите на линиите 11, 11А, 18 А, 32, 47А, 51, 55, 55В, 56, 56А, 64А, 65А, 70, 74, 80А, 81, 118, 160, 180 кои ќе возат по делничен возен ред.

Во сабота (27.04.2019 година), недела (28.04.2019 година) и понеделник (29.04.2019 година) автобусите на сите линии ќе сообраќаат по неделен возен ред.

Автобусите по неделен возен ред ќе сообраќаат и во среда на 1 Мај-Меѓународниот ден на трудот.

Жичарницата на Водно ќе работи вообичаено сите празнични денови од 10 до 18 часот, а автобусите што сообраќаат до Средно Водно 25 (Транспортен центар-Средно Водно), 25А (Автомакедонија-Средно Водно) и 25Б (Дом на печат-Средно Водно) во понеделник (29.04.2019 година) ќе возат по неделен возен ред. Жичарницата во вторник (30.04.2019 година) нема да работи.

Министерството за труд и социјална политика во соработка со Меѓуопшинскиот центар за социјални работи Скопје, Црвениот крст и УНИЦЕФ ги засилува активностите за работа со деца на улица. За таа цел денеска се одржа обука на стручни лица (социјални работници, педагози и дефектолози), кои ќе работат со децата на улица за да им се обезбеди соодветна заштита. Работата на терен ќе се спроведува мултисекторски врз основа на стандардизирана вмрежена соработка на сите релевантни владини и невладини организации и институции.

На овој начин Центарот за социјални работи ги зајакнува мобилните тимови, кои ќе прават мапирање на најфрекфентните локации каде што има деца што питаат, а полнолетните членови ќе ги активираат како баратели на работи и ќе работат на нивно вклучување во мерките за доквалификација и прекфалификација.

„Оваа засилена активност за работа на стручни лица со децата на улица ја почнуваме бидејќи на секое дете му треба безгрижно детство, детство што е целосно ослободено од насилство, експлоатација и злоупотреба. Со работа одблиску со децата на улица и нивните семејства ќе ги детектираме и решаваме проблемите со кои се соочуваат“, изјави министерката за труд и социјлна политика, Мила Царовска, по повод обуката на стручните лица што ќе го прават мапирањето.

Во обуката се вклучи и претставникот на УНИЦЕФ, Бенџамин Перкс, кој истакна дека УНИЦЕФ и Владата тесно соработуваат за да ги зајакнат механизмите за помош на децата на улица, но исто така да се спречи децата да го поминуваат времето на улица преку развивање посилни механизми за заштита и спроведување системски промени.

„Децата на улица често се жртви на многубројни негативни искуства вклучувајќи физичка и психичка злоупотреба и запоставување. Многу од нив не го остваруваат своето право на образование, здравство и заштита“, рече Бенџамин Перкс, претставник на УНИЦЕФ.

Министерството за труд и социјална политика ја креира социјалната реформа, која е во собраниска процедура, а е во насока на намалување на детската сиромаштија и извлекување на најранливите граѓани над линијта на сиромаштија. Со оваа реформа детскиот и образованиот додаток ќе станат достапни за 20 пати повеќе деца, а работоспособните ќе се активираат на пазарот на трудот.