Македонија
РСБСП: Корисни совети за безбедно возење во есен
Безбедното одвивање на сообраќајот зависи од многу фактори. Секако, најважен и одлучувачки фактор е факторот човек, но не смееме да ги заборавиме и занемариме и другите фактори, како: временските услови (магла, дожд, снег, голомразица), типот на патот по кој се движиме (автопат, регионален пат, локален пат…) или делот од денот во кој се одвива сообраќајот. Возењето во есен носи многу предизвици за возачите, особено за помладите и понеискусните возачи. Коловозите се влажни, денот е пократок, видливоста е намалена, честа појава на магла, дожд, ветер, одрони на пат, животни на патот итн.
Водејќи се од тоа, Републичкиот совет за безбедност на сообраќајот на патиштата со совети до возачите на што да внимаваат во сообраќајот и како да се однесуват во сообраќајот во есенски услови:
• Возење во услови на магла
Маглата е карактеристична, односно честа појава за овој период од годината. Затоа, секогаш кога се движите низ магла, вклучете ги соборените светла и светлата за магла, почитувајте ги ограничувањата за брзина и не престигнувајте сè до моментот кога вашето видно поле не стане чисто, а вашето престигнување безбедно. Држете безбедно растојание и секогаш бидете подготвени за брзо и безбедно запирање на возилото.
• Внимателно возење на дожд и влажни коловози
Дождот и влажните коловози исто така се редовна појава во есен. Затоа, возете внимателно и имајте предвид дека влажните коловози го зголемуваат сопирачкиот пат на возилото и ја искривуваат траекторијата за запирање на возилото. Дополнително, опасноста се зголемува доколку на коловозот има места на кои се собираат вода, кал, лисја, остатоци од масло и гориво и други нечистоии бидејки тогаш самиот процес на запирање на возилото станува уште посложен и потежок. Особено внимавајте кога возете по колотраги, кои се честа појава на коловозите, а кои обично се полни со вода, кал и други остатоци. Во такви услови задолжително намалете ја брзината и избегнувајте да возите по колотраги доколку за тоа постои можност.
• Внимавајте на голомразица
Голомразицате е исто така еден од важните фактори од кои зависи безбедното одвивање на сообраќајот во есен и зима. Затоа, бидете особено внимателни на голомразица, особено ако патувате во раните утрински или во доцните вечерни часови. Голомразицата обично се појавува кога се движите низ високи и осојни планински места, каде што има остри кривини, на подвозници, надвозници, мостови, пред влез и излез од тунел итн. Доколку се соочите со голомразица на коловозот, клучно е да останете присебни и концентрирани, да не паничете и да не преземате нагли дејства, односно нагло свртување или нагло сопирање на возилото. Држете го цврсто управувачот и умерено и постепено стискајте на педалот за сопирање или во зависност од состојбата, понекогаш само пуштете го педалот за гас и немате потреба да стискате на педалот за кочење сè до моментот додека возилото не загребе на сув коловоз.
• Сигурно возење низ ветар
Силниот ветер ја намалува безбедноста во сообраќајот, особено на отворен пат – автопат. Во услови на силен бочен ветер намалете ја брзината на движење на возилото затоа што тоа може да го наруши правилното движење на возилото, да ја наруши неговата стабилност и на тој начин да се загрози безбедното одвивање на сообраќајот. Во ваква ситуација важно е да бидете подготвени да го застанете возилото во секој миг. Доколку превезувате некаков товар, проверете дали е добро зацврстен. Внимавајте на паднати дрвја, гранки и друго.
• Внимавајте на одрони на патот
Временските услови во есен (поројни дождови, силни ветрови, високи температурни разлики помеѓу денот и ноќта итн.) може да предизвикаат појава на одрони на пат, наноси на земја, песок, камења на патот итн., што може да биде многу опасно за сообраќајот. Затоа, возете внимателно, особено ако возите во услови на невреме или веднаш по невреме, во планински предели или во други непознати области, каде што не ги знаете доволно карактеристиките на патот. За безбедно возење во есен, клучно е да ја намалите брзината, да бидете концентрирани и да управувате технички исправно возило, во прв ред да поседувате добри и квалитетни пневматици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Наутро студено, преку денот сончево со умерена локална облачност
Наутро студено, преку денот сончево со мала до умерена локална облачност. Ќе дува слаб до умерен ветер од југоисточен правец. Минималната температура ќе биде во интервал од -2 до 7, а максималната ќе достигне од 19 до 25 степени.
Во Скопје утрото посвежо, а преку денот претежно сончево со слаб југоисточен ветер. Минималната температура ќе се спушти до 4, а максималната ќе достигне до 25 степени.
Во четврток попладне претежно во западните подрачја ќе има повремен дожд.
Под влијание на циклонска активност во петок и за време на викендот на повеќе места ќе има повремени врнежи од дожд кои наместа ќе бидат пообилни, проследени со грмежи и засилен ветер. Локално ќе има услови за појава на невреме.
Скопје
Без вода Кисела Вода и Центар
Од ЈП Водовод и Канализација известуваат дека денеска имаат планирано две интервенции во водоводната мрежа.
– поради изведување на водоводен приклучок ф- 200 мм на улицата Борис Трајковски бб, прекинато водоснабдување ќе имаат корисниците на дел од истата улица, односно зградите од комплексот „Трим & Лум“. Водоснабдувањето ќе биде прекинато од 09:00 часот до завршување со работните активности. (општина Кисела Вода)
– поради менување на вентил ¾ на улица Македонија 16, прекинато водоснабдување ќе имаат корисниците на дел од истата улица. Водоснабдувањето ќе биде прекинато од 09:00 часот до завршување со санација на дефектот. (општина Центар)
Скопје
Без струја денеска делови од Кисела Вода, Ѓорче Петров, Шуто Оризари и Сопиште
Поради планирани зафати во електро дистрибутивната мрежа, денеска без напојување со електрична енергија ќе останат:
– Во период од 08:30 – 12:00 часот, корисниците од ул.1520-населба Пинтија (општина Кисела Вода)
– Во период од 08:30 – 12:00 часот, поголем дел од корисниците во Волково, од пругата во Ново село до кружен тек во Волково. (општина Ѓорче Петров)
– Во период од 09:00 – 15:30 часот, корисниците од дел од улиците Брсјачка Буна, Овчеполска, Виетнамска, Пелагонија. (општина Шуто Оризари)
– Во период од 10:00 – 16:00 часот, корисниците на дел од село Горно Соње кај црквата. (општина Сопиште)