Македонија
Само за десет години бројот на ученици во основните и средните училишта намален за 27 илјади
																								
												
												
											Само за последните десет години бројот на ученици во основните и средните училишта е намален за 27 илјади. Намалувањето на бројот на ученици е особено изразен во средното образование, каде што само за десет години бројот на ученици е намален дури 20 %, односно за 17 илјади ученици. Во основното образование намалувањето изнесува 5 %, односно 10 илјади ученици, известуваат од Центарот за граѓански комуникации.
Од општините има намалување на бројот на ученици, а зголемување има во десет скопски општини и во 9 други општини надвор од Скопскиот Регион.
Најголемо намалување на бројот на ученици во вкупна бројка има во општина Гази Баба, каде што во последната учебна година имало дури 2.389 помалку ученици отколку пред десет години. Следна општина е Тетово, каде што имало речиси 1.500 ученици помалку, само за период од десет години. Со намалување од илјада ученици следуваат: Центар, Струга, Куманово и Гостивар.
Во релативни бројки, најголемо намалување на бројот на ученици во осмолетка има во општина Ново Село, каде што за десет години бројот на ученици во односното образование е преполовен, односно е намален 57 %.
Намалување на бројот на ученици за третина има во општините Маврово и Ростуше, Вевчани, Кратово и во Пехчево. Намалување за една четвртина на бројот на основци има во Врапчиште, Конче, Зрновци, Гази Баба и во Берово.
Од големите градови, бројот на ученици во основно расте во Скопје и во Струмица.
Спротивно, зголемување на бројот на ученици имало во десет општини од Скопскиот Регион, а со тоа и во градот Скопје во целина. Најголемо зголемување и во вкупна бројка и процентуално има во Бутел и Карпош. Во Карпош во последната учебна година имало речиси 2,5 илјади повеќе основци отколку пред десет години, што е зголемување на бројот на ученици за 56 %. Во Бутел зголемувањето е за приближно 2 илјади ученици, односно 59 %. Слично е и во Ѓорче Петров, каде што зголемувањето е 43 %, односно за нешто повеќе од илјада ученици.
Надвор од Скопје зголемување имало во девет општини, но во сите заедно имало само илјада ученици повеќе сега отколку пред десет години. Тоа се претежно мали општини, како Чашка, Теарце, Ресен и Крушево. Единствено од поголемите градови, само во Струмица има зголемување на бројот на основци за речиси 400, односно 9 %.
Кога станува збор за средното образование, состојбата е многу полоша, истакнуваат од центарот. Таму намалување на бројот на ученици имало во дури 73 општини, односно во 90 % од општините, вклучувајќи го и град Скопје како целина.
„Во апсолутни бројки, најголемо намалување на бројот на средношколци има во Скопје и во речиси сите големи градови, почнувајќи од Тетово, Струга и Кичево, сè до Струмица, Гостивар, Куманово и Штип.
Процентуално, пак, најголем губитник е Пехчево. Таму бројот на ученици во средно е намален 83 % само во последните десет години. Преполовување на бројот на средношколци има во Крушево, Македонски Брод и во Врапчиште.
Во главниот град Скопје има намалување од 2.727 средношколци, односно з10 % во последната учебна година.
Спротивно, зголемување има само во седум општини, од кои пет се од Скопскиот Регион и само три други општини – Брвеница, Боговиње и Богданци. Четири од општините со зголемување се оние во кои во последните десет години се отворило средно училиште, а претходно немало со што може да се оправда зголемениот број ученици. Ако се изземат овие општини, бројот на ученици во средно е зголемен само во 3 општини во земјата, и тоа: Аеродром, Центар и Богданци.
Како и да е, во сите седум општини во кои има зголемување на бројот на средношколци вкупната бројка на зголемување изнесува 1.136 наспроти 18.000 за колку што е намален бројот на ученици во преостанатите 73 општини“, стои во анализата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
																	
																															Македонија
Утре променливо облачно време, од четврток до понеделник дожд, најавува УХМР
														Времето утре ќе биде променливо облачно со сончеви периоди. Ќе дува слаб до умерен ветер од северен правец. Минималната температура ќе биде во интервал од 5 до 8, а максималната ќе достигне од 12 до 17 степени.
Во Скопје, променливо облачно претпладне со повремен слаб дожд. Ќе дува умерен, северен ветер. Минималната температура ќе се спушти до 7, а максималната ќе достигне до 15 степени.
Во среда и четврток во утринските часови има услови за појава на магла. Под влијание на влажна воздушна маса, од четврток од вечерните часови па се до понеделник, следува период на променливо облачно време со повремени локални врнежи од дожд, наместа пообилни.
Македонија
Герасимовски на средба со противкандидатките Ивановска и Среброва, споделени предлози и идеи за поквалитетен Центар
														Градоначалникот на Општина Центар, Горан Герасимовски, денеска одржа средба со противкандидатките од локалните избори, Билјана Ивановска од „Независни заедно“ и Марија Среброва од „Левица“. Поради работни обврски, на средбата не присуствуваше кандидатот Мирослав Лабудовиќ од „Знам“.
На состанокот, на кој присуствуваа и раководителите на секторите во општината, се дискутираше на повеќе теми од интерес на граѓаните: урбанизам, зеленило, нови паркинг-зони, планираното затворање на сообраќајот во Дебар Маало и друго.
„Високо ги ценам и почитувам моите противници во изборниот процес. Уште на предизборните дебати јавно потенцирав дека секој нивен предлог и иницијатива ќе бидат добредојдени. Нивните искуства со кои влегоа во трката, Среброва како советник во Советот на Општина Центар и Ивановска како поранешна претседателка на ДКСК, го кренаа нивото и квалитетот на целиот изборен процес. Се надевам дека ќе продолжиме со блиска соработка и во иднина,“ рече Герасимовски.
На средбата беше договорено ваквите состаноци да продолжат и понатаму, со цел развивање на заеднички иницијативи во интерес на жителите на Центар.
Македонија
Ќе работиме со транспарентност: Меџити го презеде мандатот како градоначалник на Чаир
														Денес, новоизбраниот градоначалник на општина Чаир, Изет Меџити, и официјално го презеде својот мандат.
Во своето обраќање по повод преземањето на функцијата, Меџити истакна дека ова враќање за него претставува чувство на чест и длабока одговорност кон граѓаните на Чаир кои му укажаа доверба со неспорна изборна победа на последните локални избори.
„Од денес се враќам во моето место, меѓу моите луѓе, со чест, со скромност и со длабока благодарност. Чаир секогаш ме поддржувал, а овој пат ми даде силен мандат, доверба што ќе ја претворам во чесна работа, конкретни резултати и управување што го познава само јавниот интерес,“ истакна Меџити.
Тој додаде дека Чаир е дел од неговиот идентитет, дел од неговата лична историја и јавна мисија, нагласувајќи дека секој успех што ќе следи ќе го носи печатот на граѓаните кои никогаш не се откажаа.
„Пред нас стои ново поглавје. Ќе работиме со јасен план, со транспарентност и со храброст за да направиме големи промени. Имам доверба во луѓето на Чаир, во нивната енергија, талент и љубов кон ова место. Од денес започнува работата за општина Чаир што ја сакаме, од денес започнува нашето време!“, додаде Меџити.

