Покрај камерите на улиците во рамките на „Безбеден град“, кои ќе ги ловат прекршоците во сообраќајот, полицајци со возило опремено со специјални камери ќе ги снимаат погрешно паркираните возила. Министерот за внатрешни работи Панче Тошковски вели дека проектот „Безбеден град“ ќе понуди повеќеслојно системско решение за поголема сообраќајна култура.

„Дел од имплементацијата на ‘Безбеден град’, во иднина ‘Безбедна држава’, ќе бидат и возила што ќе бидат целосно опремени со паметни камери и при движење во рамките на одредени сообраќајници, улици, ќе ги констатираат сите погрешно паркирани возила. Тие веднаш ќе бидат процесирани во рамките на системот врз основа на компјутерска обработка на податоците што ќе бидат внесени во системот“, рече министерот Тошковски.

Тој нагласи дека имплементацијата на проектот „Безбеден град“ суштински е веќе почната оти од 1 јануари годинава при регистрација на возилата се бара сопствениците да остават електронска адреса и телефонски број. За една година, односно до 1 јануари 2026 година, кога министерот Тошковски очекува да почне да функционира новиот систем за казнување на прекршоците во сообраќајот, ќе бидат собрани податоците од сите возила, што ќе биде основа за новиот систем да почне да функционира.

Пред да почнат на граѓаните да им стигнуваат казни, министерот Тошковски и денес рече дека ќе има тест-период од неколку месеци, во кој ќе бидат само известувани за направените прекршоци.

„Очекувам оној тест-период што го најавивме, бидејќи целта не ни е да ги казнуваме граѓаните сами по себе, туку да ја смениме сообраќајната клутура и да ги намалиме бројките, да го има. Ќе го имплементираме одреден временски период, неколку месеци граѓаните ќе добиваат пораки, ќе бидат известувани кога ќе сторат одреден прекршок, а притоа тој ќе биде констатиран, ќе се уверат дека системот функционира. Од 1.1.2026 година ќе ги овозможиме законските предуслови тоа да биде онака како што треба да биде“, рече министерот Тошковски.

Во тек е измена на 5 закони, односно на Законот за безбедност на патиштата, Законот за прекршоците, Законот за возилата, Кривичниот законик и Законот за извршување на санкциите, кои се клучни за функционално системско решение.

Измената на законите министерот Тошковски вели дека е прв приоритет за Министерството. Во наредниот месец ќе се работи на измените на законите и министерот очекува на крајот на март веќе да биде готова првичната верзија за во април измените да влезат првин во владина, а потоа и во собраниска процедура.

Паралелно со измените на законите, министерот Тошковски рече дека интензивно работат и на подготовка за изградба на катна гаража во кругот на Министерството за 500 возила и ги повика градоначалниците и сите други фактори во општеството да го следат примерот и да дадат свој придонес за поголема сообраќајна култура.

Првиот заменик претседател на Владата и министер за животна средина и просторно планирање, Изет Меџити денеска заедно со градоначалникот на општина Чаир, Висар Ганиу, присуствуваше на започнувањето на целосна реконструкција на водоводната и канализационата мрежа на улицата Неџат Аголи, во општина Чаир.

Меџити истакна дека вкупната вредност на проектот поддржан од МЖСПП е над 9 милиони денари, и истиот е многу суштински проект за жителите на улицата Неџат Аголи и додаде дека на Чаир, во 2025 година му следуваат дополнителни 9 милиони евра.

‘Со овој проект ќе се поврзат над 50 домаќинства на новата водоводна и канализациона мрежа, а по неговото завршување за два месеци жителите ќе имаат и целосно асфалтиран пат’, изјави првиот заменик претседател на Владата и министер за животна средина и просторно планирање, Изет Меџити.

Тој додаде дека со овој проект, започнува имплементација на низа инфраструктурни проекти, околу 50, во општина Чаир во вредност со поддршка на Министерството за животна средина и просторно планирање, со вкупна вредност од 2.8 милиони евра.

Како Министерство и како Влада, додаде Меџити, инвестираме во сите општини за една единствена цел, подобрување на животниот стандард на граѓаните кои ни дадоа глас и поддршка да работиме за нив.

Пратеничката од Левица, Јована Мојсоска, јавно ја разобличи Владата која наместо за граѓаните, носи работни места само за блиските роднини на функционерите:

„Мислам дека оваа Влада и тоа како треба да се пофали за своите проекти за намалување на невработеноста. Некои политички “лешинари” (што би рекол премиерот) ќе речат дека е непотизам, а никој не зема во предвид дека и фамилиите на властодршците мора некаде да работат.

Еве, само некои мерки за намалување на невработеноста во овие 7-8 месеци на новата власт:

– Сестрата на премиерот се вработи на Универзитетот во Штип;
– Баџанакот на министерот Тошковски стана доцент на Факултот за безбедност и дисквалификува студент на генерација;
– Сестрата на министерот Љутков се вработи во Музејот во Велес;
– Таткото на министерот Андоновски стана советник на Мицкоски;
– Братот на министерот Андоновски стана началник во АНБ;
– Братучедот на Меџити стана директор во МЕПСО;
– Братот на пратеникот Игор Здравковски стана член на Советот на експерти на Агенцијата за супервизија на осигурување;
– Синот на директорот Александар Пандов стана советник на Мицкоски;
– Таткото на министерот Муцунски е советник на министерот Муцунски (додуша тој беше и советник на Бујар Османи).

И кога властодршците ви велат дека нема да се мешаат во дефинирањето на минималната плата, тоа доаѓа затоа што ниту тие (ниту нивните фамилии) никогаш не ги почувствувале “благодетите” од работа во приватен сектор…” – напиша пратеничката од редовите на Левица на својот фејсбук профил.