Градоначалникот на Град Скопје, Орце Ѓорѓиевски, денеска беше домаќин на амбасадорката на Соединетите Американски Држави, Анџела П. Агелер, која за првпат во својство на амбасадорка официјално го посети градот. На средбата присуствуваше и делегација од Амбасадата на САД, а разговорот се одвиваше во отворена, пријателска и конструктивна атмосфера.

Средбата, како што соопштија од таму, претставува значаен чекор во продлабочувањето на долгогодишното стратешко партнерство со САД, со фокус на институционалниот развој, економскиот напредок, борбата против корупцијата и создавање нови можности за граѓаните.

Во делегацијата учествуваа и Дејвид Маерс, шеф на Политичко-економскиот оддел, како и Розита Мреношки, помошник за политичко-економски прашања.

„Ова е прва посета во градот Скопје на амбасадорката Агелер откако е на својата должност.
Ја информирав за изборната програма, за динамиката на нејзина реализација и тековните проекти кои Град Скопје ги спроведува.
Разговаравме отворено за предизвиците, визиите и стратешките приоритети за развој на градот во следните години.

Особено важно беше заедничкото согледување на потребата од бескомпромисна борба против корупцијата на сите нивоа.
Се согласивме дека само со транспарентност, отчетност и силни институции можеме да изградиме модерно и доверливо општество.
САД се наш докажан и долгогодишен стратешки партнер.

Поддршката што ја добиваме од Соединетите Држави во развојот на институциите, демократијата и економијата е од огромно значење за нашиот напредок.
Уверен сум дека ова партнерство ќе се продлабочува и ќе продолжи да создава нови можности за жителите на Скопје.

Продолжуваме заеднички да градиме силни врски, стабилност и перспективи, за Скопје што расте, се развива и го заслужува најдоброто“.

На 10 декември, околу 18:45 часот, на влезот во спортската сала „Боро Чурлевски“ во Битола, полициски службеници од СВР Битола ги привеле П.Н. (20), Н.А. (24) и Д.М. (24), сите од Скопје.

При влегување на навивачка група од Скопје на ракометен натпревар бил нарушен јавниот ред и мир, при што тројцата физички нападнале полициски службеници кои извршувале службени дејствија.

Подоцна, во 19:20 часот, на истиот влез, полициски службеници го привеле и Н.Ѓ. (34) од Битола поради агресивно однесување и повикување на насилство, со што исто така го нарушил јавниот ред и мир.

Од МВР информираат дека по целосно документирање на случаите ќе бидат поднесени соодветни поднесоци против сите инволвирани лица.

Пратеничката на француското Национално собрание, Марин Ле Пен, остро ја нападна политиката на претседателот Емануел Макрон велејќи дека неговата визија за Европа нема основа во реалноста, според француските медиуми.

За време на нејзиното обраќање во парламентот, Ле Пен оцени дека она што го изградил Макрон „не е ниту европски суверенитет ниту европско партнерство“, туку само политичка илузија.

Таа рече дека станува збор за „Потемкиново село, каде што нашите индустриски лидери, за да избегнат незадоволство, повремено се преправаат дека веруваат оти невозможното е можно, ирационалното е рационално, а неразумното е разумно“.

Според неа, таков модел на управување „неизбежно се крши од ѕидот на реалноста“ бидејќи не се потпира на економските и стратешките капацитети на Франција.

Ле Пен додаде дека дополнителните трошоци за странски операции, како и помошта за Украина, не биле придружени со потребните финансиски средства. Затоа, како што предупреди, овие активности се финансираат на сметка на француските вооружени сили, што на долг рок ги загрозува безбедносните и одбранбените способности на земјата.

Фото: депозитфотос