Градоначалникот на општина Битола, Тони Коњановски и советникот Бојан Бојкоски, денес остварија работна средба со советничката во Советот на Општина Битола, Анастасија Трајковска, во врска со нејзиниот предлог проект за објавување на Конкурс за идејно архитектонско решение за спортско рекреативна зона на просторот на поранешната касарна, односно во делот на АРМ Четврт 2, во близина на новата детска градинка.

Предлогот кој беше усвоен од страна на Советот на Општина Битола, денес од стручен аспект, советничката Трајковска, детално го образложи, пред градоначалникот Коњановски, нагласувајќи дека ова решение треба да содржи спортски игралишта за фудбал, кошарка, тенис, одбојка, фудбалско игралиште по стандарди на УЕФА за тренинг камп, соблекувални, мини детски паркови, пропратни содржини, како кафетерии и мини ресторани, што ќе значи вистинско спортско рекреативно збогатување на овој дел од АРМ. Со својата експертиза, советничката Трајковска, како дипломиран инжинер архитект, даде важни насоки, кои ја истакнуваат значајноста и функционалната важност на овој проект.

Градоначалникот Коњановски и советникот Бојан Бојкоски, нагласија дека станува збор за многу добра идеја, која прво треба да донесе избор на најдоброто архитектонско решение кое потоа ќе резултира на терен со успешен проект во интерес на битолчани.

Коњановски потенцираше дека, проектот за објавување на Конкурс за Идејно архитектонско решение за рекреативна зона со намена Д3 во АРМ Четврт 2 е дел од Програмата за економски развој, за истиот веќе се обезбедени средства и по завршувањето на подготовката на потребната документација од страна на општинската администрација, во месец јуни ќе биде објавена постапка за јавна набавка.

Вицепремиерот и министер за животна средина и просторно планирање, Изет Меџити, денес учествуваше и имаше обраќање на 6-тата Меѓународна конференција „Патот кон одржливо управување со отпадот“, организирана од Здружението за управување со цврст отпад – MASWA.

Во своето обраќање, Меџити ја истакна важноста на одржливото управување со отпадот и развојот на циркуларната економија како клучни елементи во справувањето со климатските промени и деградацијата на животната средина.

„Управувањето со отпад претставува комплексен предизвик, но и можност за развој на иновативни технологии и за зајакнување на зелена економија. Министерството за животна средина е посветено на изградба на регионален системи за управување со отпад што ќе ги исполнува највисоките европски стандарди, вклучувајќи ја и изградбата на првата регионална стандардизирана депонија во земјата,“ рече Меџити.

Тој ја посочи и потребата од тесна меѓуопштинска и меѓусекторска соработка и почитување на стандардите на ЕУ, кои се неопходни за транспарентно и ефикасно функционирање на системот за управување со отпад и за унапредување на процесот на европска интеграција.

Министерот Меџити информираше и за мерките преземени за чистење на дивите депонии, со цел создавање почист и побезбеден животен амбиент за граѓаните и подобра заштита на јавното здравје.

На крајот, Меџити потенцираше дека заштитата на животната средина е заедничка одговорност и дека преку соработка ќе се создаде поодржлива и поздравa иднина за идните генерации.

Во рамки на дводневната работа посета на Мадрид, министерот за европски прашања на Република Северна Македонија, Орхан Муртезани, се сретна со државниот секретар за Европска Унија во шпанското Министерство за надворешни работи, Европска Унија и соработка, Фернандо Мариано Сампедро.

Соговорниците изразија заемно задоволство од одличните билатерални односи, базирани на заеднички демократски вредности, членството во НАТО и заемна почит.

Муртезани ја поздрави континуираната и принципиелна поддршка од страна на Кралството Шпанија за европската перспектива на земјата и на регионот Западен Балкан.

Посебен акцент во дискусиите беше ставен на поддршката за отворањето на Кластерот 1 (Фундаментални вредности), како следен чекор во пристапниот процес, по успешно завршениот скрининг за сите кластери според ревидираната методологија.

Муртезани информираше за тековната имплементација на Реформската агенда 2024-2027 и активностите поврзани со Планот за раст на ЕУ за Западен Балкан, особено во насока на дигитална и зелена транзиција, владеење на правото, регионалната соработка и економската отпорност.

Ја истакна важноста од натамошна шпанска поддршка за принципот на заслуги и неполитизирање на пристапниот процес, со оглед на потенцијалните регионални предизвици кога би се билатерализирал европскиот процес.

На средбата беа разгледани и можностите за унапредување на билатералната соработка, особено во економијата, енергетиката, одбраната, културата и образованието.

Сампедро и Муртезани разговараа и на теми од регионално и глобално значење, вклучувајќи ја поддршката на Северна Македонија за Украина, позициите во однос на блискоисточниот конфликт и регионалната стабилност на Западен Балкан.

Во овој контекст, министерот го поздрави ангажманот на Шпанија во рамки на Берлинскиот процес и нејзината поддршка за интеграцијата на регионот во Унијата. Муртезани ја реафирмираше цврстата определба на Северна Македонија за членство во ЕУ и изрази очекување дека со натамошната поддршка од Шпанија, процесот ќе продолжи со засилен интензитет. Тој упати покана до државниот секретар Сампедро за возвратна посета на Скопје, со цел продолжување на дијалогот и натамошно продлабочување на соработката.