Македонија
СДСМ на чекор да го даде Правда и да го земе Министерството за животна средина, ДУИ да даде заменичко место во Одбрана

СДСМ ќе го преземе Министерството за животна средина од ДУИ за сметка на Министерството за правда, кое ќе треба да биде раководено од кадар на Алијансата за Албанците. Ова се неофицијалните информации за кои потврда не даваат од ниту една партија. Кандидат за да го раководи Министерството за животна средина е Каја Шукова.
Од ДУИ ќе биде земено и заменичкото место во Министерството за одбрана. И овој ресор ќе треба ѝ да припадне на Алијансата за Албанците, која треба да го зголеми владејачкото мнозинство. За таа функција, неофицијално, Тиран Јајага е можен кандидат. Станува збор за лице што работи во безбедносниот сектор.
„Макфакс“ одново стапи во контакт со лидерот на Алијансата за Албанците, Арбен Таравари, кој не ги потврдува, ниту ги негира кадровските промени за кои се шпекулира во јавноста. Таравари во понеделникот најави дека во средата најдоцна ќе има одлука за влез во Владата под конкретни услови. Ова не се случи.
Вчера, се одржаа низа состаноци во СДСМ и Алијанса за Албанците. Но нема конкретна одлука околу распределбата на ресорите.
„Макфакс“ веќе објави дека од Алијансата за Албанците неофицијално брифираат дека партијата со која раководи Арбен Таравари е на чекор да земе директорско место во МЕПСО, каде што моментно раководи кадар на Алтернативата. Второто место е директор на Фондот за пензиско и здравствено осигурување (ПИОМ), кое моментно исто така го раководи кадар на Алтернативата. Партијата на Таравари веќе извесно е дека ќе земе и заменик-директорско место во Управата за јавни приходи. Од директорските места, СДСМ ќе им го отстапи и она што го имаат во „Македонијапат“. Петтото што го бараат, а неофицијално и ќе биде отстапено, е и директорското место во ЈП „Железници“, каде што моментно раководи Хари Локвенец.
Претходно, премиерот Димитар Ковачевски најави дека има можност Алтернативата на Африм Гаши да излезе од Владата со влезот на Алијансата за Албанците на Арбен Таравари и промената на министерските места.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Таравари во скутот на Ахмети ја пее неговата песна

ВМРО-ДПМНЕ преку соопштение го обвини Арбен Таравари дека го сменил ставот кон лидерот на ВМРО-ДПМНЕ, Христијан Мицкоски, под притисок и уцени, и дека сега работи во корист на ДУИ и Али Ахмети.
„Арбен Таравари уште еднаш го покажа своето вистинско лице, човек кој до скоро јавно го фалеше Христијан Мицкоски и соработуваше со него, денес неосновано го напаѓа, само затоа што е уценет и мора да ја пее песната на Али Ахмети“, се наведува во соопштението на партијата.
Од ВМРО-ДПМНЕ додаваат дека Таравари додека бил дел од Владата не изнесувал критики, туку зборувал за искреноста, капацитетот и посветеноста на Мицкоски, а дека сега, „кога го притиснаа со некои папки и му дојдоа некои потсетници“, решил да стане „гласноговорник на ДУИ“.
„Како и некои функционери на СДС и градоначалничката на Скопје, сега и Таравари е ставен во непријатниот скут на Ахмети, ама очигледно, кога ќе се намести убаво, скутот не му пречи“, се наведува во партиското соопштение.
Од партијата заклучуваат дека „виновникот не е Ахмети, туку самиот Таравари, кој од човек со кредибилитет стана симбол за политичко понижување“, додавајќи дека „народот гледа сè“ и дека „на крајот, секој ќе си го добие заслуженото“.
Македонија
Објавен огласот за финансиска поддршка за сметките за струја за ранливи потрошувачи

Министерството за енергетика, рударство и минерални суровини го објави јавниот оглас за финансиска поддршка за потрошена електрична енергија за ранливи потрошувачи во 2025 година.
Право на поддршка имаат домаќинства со едно или повеќе лица со тешка или длабока интелектуална попреченост, со најтешка телесна попреченост, потполно слепо лице и глуво лице, корисници на посебен надоместок заради попреченост со навршени 26 години возраст, а без оглед на старосната возраст, согласно член 44 од Законот за социјалната заштита, чиј вкупен нето доход кој подлежи на оданочување на месечно ниво согласно Законот за данокот на личен доход на членовите на домаќинството во 2024 година не го надминувал износот од:
· 24.500,00 денари за едночлено домаќинство,
· 42.000, 00 денари за домаќинство со два члена,
· 60.000, 00 денари за домаќинство со три члена и
· 80.000,00 денари за домаќинство со четири и повеќе члена, не сметајќи го посебниот надоместок согласно Законот за социјалната заштита.
При пресметка на вкупниот доход на домаќинството кој подлежи на оданочување на месечно ниво согласно со законот за данок на личен доход, надоместокот заради попреченост, не се засметува при пресметката на вкупниот нето доход на домаќинството. За ранлив потрошувач од точка 1 од овој јавен оглас не се смета лице кое што го користи правото на цивилна или воена инвалиднина.
Лицата со категориите од точка 1 од овој оглас се стекнуваат со финансиска поддршка преку намалување на месечната сметка за потрошена електрична енергија во износ од 1000,00 денари месечно, сметано од денот на поднесување на барањето, во времетраење од 12 месеци.
Вкупно ќе се распределат:
· 2. 300. 000,00 денари од вкупните средствата ќе бидат наменети за домаќинства во кое живее лице/лица со тешка или длабока интелектуална попреченост,
· 19. 000. 000,00 денари од вкупните средствата ќе бидат наменети за домаќинства во кое живее лице/лица со најтешка телесна попреченост,
· 9.000.000,00 денари од вкупните средства ќе бидат наменети за домаќинства во кое живее потполно слепо лице и
· 12. 000. 000,00 денари од вкупните средствата ќе бидат наменети за домаќинства во кое живее потполно глуво лице.
Не следува поддршка за лица со цивилна или воена инвалиднина или сместени подолго од 30 дена во институции.
Рокот за аплицирање по јавниот оглас изнесува 30 дена од денот на објавување на јавниот оглас.
Барањето се поднесува со пополнет образец кој е достапен во архивата на Министерството или на www.energy.gov.mk, каде се наведени и сите останати документи кои се задолжителни да се достават со барањето.
За тоа кои документи се задолжителни за секоја група на баратели погледнете на https://portal.mdt.gov.mk/post-body-files/izvestuvanja-file-3m6z.pdf
Документите се достапни во архивата на Министерството или може да се обезбедат преку интернет страната на министерството: www.energy.gov.mk .
Комисиите составени од по три члена ќе ги разгледуваат барањата, ќе вршат проверка преку надлежните институции и ќе предложат решенија до министерот. Поддршката започнува од месецот по објавата на списокот на корисници и се пресметува на месечната сметка за струја.
Неплатени две последователни сметки доведуваат до укинување на решението за поддршка.
Македонија
Изминатиот викенд казнети 1.077 возачи во цела држава, 314 за брзо возење

Во деновите од празничниот викенд (02./03.08.2025) како резултат на редовните сообраќајни контроли на патиштата низ земјава, од вкупно 1.077 издадени платни налози дури 163 прекршоци се однесуваат на возачи кои што учествувале во сообраќајот без возачка дозвола. Истовремено 48 возачи возеле под дејство на алкохол и се исклучени од сообраќај, додека пак 156 возачи на мотоцикли се санкционирани заради неносење на заштитен шлем.
Инаку согласно одредбите од Законот за безбедност на сообраќајот на патиштата најмногу прекршоци во текот на викендот 314 се однесуваат на непочитување на пропишаната брзина на движење, 82 за недозволено паркирање, додека пак прекршочно се санкционирани уште 57 лица кои некористеле сигурносен појас, 24 заради користење мобилен телефон при возење, а четворица минале на црвено светло.
Исто така, а согласно Законот за возила, 44 возила биле отстранети од сообраќај заради тоа што биле нерегистрирани.
„Сообраќајните контроли продолжуваат и во наредните денови. Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта“, велат од МВР.