Според владејачката ВМРО-ДПМНЕ, Венко Филипче, лидерот на СДСМ, инсистира, како што велат, Бугарите да влезат во Уставот.

„Денес повторно Венко Филипче продолжува со своето инсистирање Бугарите да влезат во Уставот прикажувајќи го како услов без кој не може. Condito sine qua non за нашата интеграција во ЕУ. Откако го прифатија на најдолен предавнички начин за услов водени од заложништвото кон Бугарија поради своите криминални активности, сега прикажувајќи се како проевропски политичари кажуваат дека треба да се прифати тоа што тие веќе го прифатиле. Ваквиот однос на Венко Филипче е катастрофален за националните интереси и е брутален пример за корумпиран заложник на бугарските интереси во земјава, под менторство на својот врховен водач од струмичкиот клан Дубаи.

До кое дереџе стигна европската иднина на Македонија ако криминалецот и потрчко на струмичкиот клан е спремен за ваква итна распродажба на националните интереси“.

Прашуваат, за што толку го држат соседите Венко, па вака се глупира и вака јасно ги покажува своите антимакедонски ставови.

Венко, додаваат од таму, е типичен пример за корумпиран политичар, фатен и уценет од соседна земја за да ја распродава сопствената.

„Човекот денес излезе и практично кажа дека никогаш не чул Бугарија да го негира македонскиот идентитет. Не чул дека Македонците ги нарекуваат вештачка нација. Не чул дека македонскиот јазик го нарекуваат бугарски дијалект. Не чул дека Гоце Делчев, Јане Сандански и Питу Гули ги присвојуваат. Не чул ни кога македонски премиер го нарекуваат „северномакедонски“.

Или не слуша. Или слуша, ама мора да молчи.

А кога веќе мора толку понижено да глуми адвокат на туѓи позиции, барем нека не ги навредува граѓаните дека не гледаат што се случува“.

СДС, оценуваат од владејачката партија, со години ја водеше државата по принципот „сè прифаќај, само остани на власт“. „Го сменија името без гаранции. Го прифатија Францускиот предлог без гаранции. Денес се подготвени и идентитетот да го стават на маса, само за некој однадвор повторно да им отвори врата кон фотелјите“.

Претседателот на СДСМ, Венко Филипче, на денешната прес-конференција укажа дека ВМРО со пропагандата што ја спроведува преку своите медиуми се обидува одговорноста за застојот во реформите да ја префрли врз Европската Унија. Филипче посочи дека наместо реални резултати и спроведени реформи, јавноста е сведок на политички спинови и обиди за манипулација со граѓаните.

„Муцунски грмнал во Брисел, Тимчо. Ова веќе звучи смешно само по себе. Но, она што воопшто не е смешно е дека криминалната група на ВМРО преку нивните медиуми, сега внимавајте, ја обвинуваат Европската Унија дека не се спроведуваат реформите тука кај нас. Повторувам што објавиле – Тимчо Муцунски, министер на криминалната група ВМРО, и во име на шефот на бандата Христијан Мицкоски, грмнал во Брисел и ја обвинил ЕУ дека таа е виновна што ние не ги спроведуваме реформите како услов за продолжување на преговорите“, рече Филипче.

Притоа, Филипче нагласи дека ваквиот наратив на владата на ВМРО е класична политичка манипулација и обид за избегнување одговорност.

„Кој е овде луд? Тие ништо не работат на реформите, па им е виновна Европската Унија? Дали разбирате до кој степен на манипулација се оди? До вчера ние бевме виновни за сè. Денес е виновен Брисел и целата Европска Унија. Муцунски, исто како и Мицкоски дома, пред македонските граѓани зборуваат едно, но во Брисел зборуваат друго. Денеска повторно го слушнавме тоа и го видовме. Не ги исполниле реформите и немаат што да бараат во Брисел. Но, важно е што сакаат да им пласираат на граѓаните. Повторно лаги и манипулации. Вести од ваков тип, кои излегуваат од кујната на ВМРО се лаги кои служат за манипулација и поделби на граѓаните“, рече Филипче.

Фактот што за само четири месеци се реализирани над 72% од планираниот буџетски дефицит е сериозен сигнал дека проекциите врз кои е скроен Буџетот за 2026 година биле или нереално оптимистички или политички мотивирани, велат од Левица.

Кога приходите потфрлаат уште во првиот квартал, а расходите продолжуваат со планирана динамика, тоа значи, додаваат од оваа партија, дека државата влегува во структурен јаз помеѓу фискалните амбиции и реалната економска база.

„Владата се обидува ова да го претстави како нормална работа за која што ќе следи ребаланс но бројките зборуваат поинаку. Ребаланс во услови кога веќе во април се исцрпени речиси три четвртини од годишно планираниот дефицит не е техничка корекција туку признание дека економската политика е промашена.

Особено загрижува фактот што потфрлањето кај приходите доаѓа токму кај клучните даночни категории: ДДВ, акцизи и персонален данок. Ниската реализација на ДДВ и акцизите укажува на забавување на домашната потрошувачка и слабеење на економската активност, додека слабата наплата на персонален данок дополнително потврдува дека растот на платите и вработеноста не го следи наративот на Владата“.

Наместо, како што посочуваат од Левица, да се адресираат структурните проблеми како неданочење на најбогатите, политика на рамни даноци, зависност од увоз, ниски плати и растечка ценовна нестабилност, Владата повторно се потпира на задолжување и краткорочно управување со ликвидност. Ова, според нив, е класичен модел на социјализација на кризата: профитите остануваат приватни, а товарот од фискалните промашувања се префрла врз граѓаните преку инфлација, нов долг и идни рестрикции.

„Дополнително, проекцијата за инфлација од 2,5% и раст од 3,9% веќе изгледа целосно невозможна. И самата Народна банка ги ревидира очекувањата надолу што значи дека Буџетот бил поставен врз нереални претпоставки уште од старт.

Потребна е сосема поинаква економска парадигма: прогресивно оданочување на високите приходи и капиталот, повисоки плати, посилна индустриска политика и таргетирани јавни инвестиции. Во спротивно, ребалансот што доаѓа нема да биде решение туку само административна потврда на веќе започнатата економска ерозија“.