Премиерот Димитар Ковачевски за трите предлози на претседателот на ВМРО-ДПМНЕ, Христијан Мицкоски не одговори конкретно дали ги отфрла, но посочи дека не е загрозен идентитетот и јазикот.

„Во однос на тезите кои беа поставени, тие не задираат во третманот на македонскиот јазик ниту идентитетот. Тоа е мултилатерален документ кој е усогласен. Во однос на уставните измени, сите партии имаа свои изјави во изминатиот период, други ги менуваат. Нашиот Устав предвидува дека граѓани кои се самоопределуваат на друг начин, можат да се дел од Уставот. Сметам дека сите пратеници треба да го прифатат менувањето на Уставот” – кажа Ковачевски.

Дел од коалиционите партнери имаат позитивно мислење, а дел размислуваат, кажа Ковачевски за францускиот предлог.

„Јас сметам дека сите политички партии сериозно пристапуваат кон ова прашање и дека ќе донесат вистинска одлука. Тоа е одговорност”, кажа Ковачевски на прашања од новинарите.

Според него, Владата се држи до државните интереси, се штител идентитетот и не е направено ништо без да се почитуваат црвените линии.

„Сите сме свесни за чувствителноста за ова прашање. Лесно е да отфрлиме. Но потребно е рационално размислување со ладна глава. Од ова прашање не смееме да правиме дневна политика. Ова е стратешко прашање” – посочи Ковачевски.

Кристијан Ландов

Лидерот на ВМРО-ДПМНЕ, Христијан Мицкоски понудил три решенија за францускиот предлог. Тој не добил никаков одговор на барањата од премиерот Димитар Ковачевски.

Според Мицкоски, барањата се разумни. Останува на ставот кој го дели со партијата дека предлогот во ваква форма треба да се одбие.

„Ковачевски го презентираше тоа што секој ден го гледавме во јавноста. На сметка на тоа јас дадов свое гледише на текстот и ги извлекувам заклучоците: овие два документи не се прифатливи за мене и ВМРО-ДПМНЕ, му понудив на Ковачевски да излезе и да го отфрли предлогот, а јас да се повлечам од барање предвремени избори и да ги надминеме заедно предизвиците кои ги имаме пред нас зимава, последица на кризата. Само треба да го одбие ова. Ова не е преговарачка рамка со која ние не обезбедуваме европска иднина туку се бугаризираме. Третата работа која ја понудив, ако смета дека ова е така, дека идентитетот е обезбеден, да бидат избришани членот 11 и членот 14 од Протоколот, а потоа во преговарачката рамка каде имаме принципи врз кои се водат преговорите да ги избришат членовите каде се годишните прегледи и делот каде се повикуваат на протоколот на првата меѓувладина конфенреција. Нека ги избришат ако ова обезбедува европска иднина”, кажа Мицкоски.

Според него, предлогот е да се направи чекор назад и да се застане во одбрана на македонскиот идентитет.

Кристијан Ландов

Претседателот Стево Пендаровски во изјавата по Советот за безбедност на новинарско прашање даде свој коментар и за фејсбук статусот и навредата кон него од пратеникот од Левица, Димитар Апасиев.

„Тој тип минатата година јавно ја пцуеше Радмила Шекеринска и од прилика знам за каква креатура се работи, каков резон има, но навистина не верував дека може да дојде до ситуација да ми пцуе починат родител. Тоа ми е една лична болка која не можам да ја разберам зошто имал потреба да ја искаже. Мојата мајка е почината пред 10 години. Мислам дека беше крајно нечовечки, пцовката сама за себе, особено да ми пцуеш гроб на почината мајка, тоа е нешто што не се простува“, одговори претседателот Стево Пендаровски на новинарското прашање за пцовката која што му ја упати Димитар Апасиев преку социјалните мрежи.

Тој смета дека ова е изјава без преседан во современа Европа.

„Таква работа, таков јавен став може да каже само човек кој е ушмркан или му фали нешто во главата. Јас навистина мислам дека тој психопат не е со сите штом може вакви работи да постира на социјалните мрежи. Тоа е настан, изјава без преседан во современа Европа. Ви гарантирам дека избран пратеник во ниту еден европски парламент не пцуе починати родители на друг колега политичар. На Балканот тие работи особено ако имаш нешто меѓу нозе ги кажуваш во очи. Тој немаше храброст да ми ги каже во очи, туку се криеше во подрум и зад некоја тастатура и испраќаше пораки. Неговите пораки за сечење, бесење, колење ги испраќа преку фејсбук. Од друга страна што можеш да очекуваш од таква гнида од човек, да ти дојде во очи и да ти го каже тоа бидејќи знае кои се консеквенсите. Не само јас, туку секој нормален човек за починат родител не би му простил и знае што ќе добие во таква ситуација. Преку глава ми е од таквите фејсбук патриоти, големи македонски мажиња кои не туркаат во обратна насока од демократија“ – додаде Пендаровски