Македонија
(Видео) Се појави сопственикот на дивоградбата кај Мавровка, вели дека имал дозвола
Мевљудин Алити, сопственикот на дивоградбата кај Мавровка, за првпат се појави пред јавноста за време на рушењето на објектот.
„Еве од Град Скопје што сум добил, еве сумата што сум ја платил према Град Скопје, еве ги и потписите од кај Петре Шилегов. Еве го решението за другиот објект, за парцелата од 86 метри квадратни, со потпис, со датум, со сè“, рече Алити покажувајќи на новинарите цела папка со документи.
Тој тврди дека има одобрение за обнова на објектот кој му изгорел до темел.
„Ова е од Општина Чаир што сум го добил за расчистување на парцелата каде што се гради сега, на 24 јуни 2020, значи не сум отишол по свој памет таму да градам или да обновувам. Тоа е прво.
Второ, ова е дел од имотните листи од парцелата, еве го едниот имотен лист од Град Скопје, еве ја сумата што сум ја платил, еве го решението од Општината за легализирање на едната парцела. Еве и за другата парцела со елаборат. Еве имотен лист од другата парцела“, рече Алити.
Неговиот адвокат, Александар Варела, најави дека правдата ќе ја бараат по судски пат.
„Ако во време на Грујо ‘Космос’ се уриваше по телефон, сега тоа го прави ‘Македонијапат’, ќе одиме на суд“, изјави адвокатот Варела.
Јавноста денеска за првпат го виде сопственикот на градбата кај Мавровка, кој минатите месеци се криеше и покрај тоа што имаше јавен повик тој да се јави за објектот што се градеше на местото на изгореното кафуле „Фонтана“, на што му претходеше и мистериозно сечење на неколкудецениско здраво дрво во негова близина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Да си ги зачуваме луѓето овде во нашата татковина, порача Мицкоски за 8 Септември
„Денес се одбележува најголемиот светилник на постоењето на македонската држава, финалниот чин по повеќестолетната борба за слобода и независност или што би се рекло денот над деновите – 8 Септември, празникот на нашата независност“, напиша премиерот Христијан Мицкоски на својата Фејсбук страница по повод Денот на независноста.
„На овој ден за прв пат се слушнаа зборовите: Да ви ја честитам суверена и слободна Република Македонија, на плоштадот Македонија каде се прославуваше независноста. Воедно да не заборавиме дека 8 септември е стремежот на илјадници претходно борци за слободна и своја држава. Тогаш се градеа темелите на Републиката и создаваа институции, но и денес имаме битки кои мора да ги победиме, заеднички, поинакви, иако поинакви сепак подеднакво важни“, додаде Мицкоски.
Мора да се победи разочарувањето, додава Мицкоски, кое ни го оставија и криминалот и корупцијата кои денес се најважните проблеми против кои се бориме. Секој атом од силите да го вложиме во градба на иднина каква заслужува секој еден човек.
„Овој пат државата е на потег и нејзе ја враќаме на народот. Да создадеме земја на среќни граѓани и силна економија. Општество кое ќе одговара на реалните потреби и ќе нуди реални решенија. Да си ги зачуваме луѓето овде во нашата татковина. Оваа генерација има обврска да ги исправи грешките и да создаде иднина за сите наредни. Ова е нашата заедничка битка и заедно се бориме и заедно ќе успееме! Нека е честит и вековит денот на независноста. Бог да ја благослови Македонија!“, вели премиерот во честитката по повод Денот на независноста.
Македонија
Во текот на вчерашниот ден 38 пожари на отворено, активни се уште три
Центарот за управување со кризи информира дека во текот на вчерашниот ден имало вкупно 38 пожари на отворен простор, од кои активни се 3, под контрола се 4 и изгаснати се 31 пожар.
Според информациите на ЦУК, активни се пожарите во Општина Петровец, кај селата Градманци, Брезница и Катланово каде што гори нискостеблeста шума, во Општина Кичево во селото Арангел каде што гори деградирана шума и во Општина Демир Хисар во селото Сопотница.
Под контрола се пожарите во Општина Прилеп кај селата Пештани, Кокре, Кален, Дуње, Бонче, Лениште, Веловодица, Смолани и Дрен, како и кај м.в. Дервен. Во Општина Долнени, кај село Десово, пожарот е исто така под контрола.
Изгаснати се пожарите во општините Чашка, Чучер-Сандево, Гази, Бутел, Сарај, Штип, Делчево, Крушево, Куманово, Старо Нагоричане, Липково, Виница, Брвеница, Теарце, Гостивар, Валандово, Македонски Брод, Битола, Демир Хисар, Охрид, Струга и Дебар.
Македонија
Силјановска-Давкова по повод 8 Септември: Наша должност е да ги оставиме на страна поделбите и да се сплотиме
Претседателката Гордана Силјановска Давкова упати честитка до граѓаните по повод 8 Септември – Денот на независноста, во која посочува дека наша должност е да ги оставиме на страна поделбите и да се сплотиме околу општото добро и јавниот интерес.
-На 8 септември 1991 година, македонските граѓани, користејќи го правото на самоопределување, ја изразија својата волја и во огромен број го дадоа својот глас за суверена и самостојна македонска република. Освен на референдумското ливче, таа волја беше изразена и преку озарените лица на илјадниците граѓани спонтано собрани на плоштадот „Македонија“, каде што со голем ентузијазам и надеж за иднината ѝ се радуваа на независноста, стои во честитката.
Со тој чин, додава претседателката, тие, ние, македонските граѓани, на мудар, демократски и мирољубив начин, во согласност со Повелбата на Обединетите нации, ја напуштивме федерацијата што се распаѓаше и зачекоривме во новата етапа на македонската државност.
-Заокружувајќи го делото на илинденците и на асномците, ја превзедовме одговорноста да градиме модерна, европска, правна држава која ќе обезбеди мир и соживот, социјална правда, економска благосостојба и напредок на личниот и заедничкиот живот. Триесет и три години подоцна, ентузијазмот и надежта се, за жал, засенети од бројните предизвици со кои се соочивме како држава, од надворешни притисоци и непринципиелни блокади, преку внатрешни поделби, па сè до политички и безбедносни кризи. Низ годините имавме и успеси и грешки, и подеми и падови. Пропуштените можности, сеприсутната партизација и политизација и хроничната корупција ги отуѓуваат граѓаните и ги иселуваат младите, нагласува Силјановска Давкова во честитката.
Таа натаму посочува дека наша должност е да ги оставиме на страна поделбите и да се сплотиме околу општото добро и јавниот интерес.
-Мора да ги вложиме сите наши лични и институционални капацитети за да ја направиме македонската република пристојно место за живеење, што ќе им дава еднакви шанси за напредок на сите нејзини граѓани, република што ќе биде грижлива кон најдобрите, инклузивна кон различните, солидарна кон ранливите и праведна кон сите, наведува претседателката во честитката.
Истакнува дека само со европеизација на државата, со владеење на правото и со борба против корупцијата, со функционални институции и со компетитивна економија и систем на заслуги ќе им овозможиме на младите генерации, правото на потрага по среќа да го остварат дома, во заедничката татковина, во која ќе работат, ќе основаат семејства и ќе создаваат иднина.