Противпожарната бригада на Град Скопје заедно со припадници на специјалните единици на МВР во центарот на Скопје ја презентираа новата противпожарна скала. На презентацијата присуствуваа градоначалникот Петре Шилегов, министерот за внатрешни работи, Оливер Спасовски, и министерот за здравство, Венко Филипче.

„Скопје од денес е побогато за ново специјализирано возило – 45-метарска противпожарна скала каква што досега немало во историјата на Република Северна Македонија. Оваа презентација ја организиравме со цел граѓаните на Скопје да може визуелно да се запознаат со дел од перформансите што ова возило ги нуди, а тоа е многу важно затоа што тоа ќе значи многу спасени животи и на нашите сограѓани, но и на хероите на градот, припадниците на скопската Противпожарна бригада“, рече Шилегов.

Од денеска, додаде тој, конечно, ќе можеме брзо и ефикасно да ги спасиме и сите граѓани што живеат и повисоко од 5-ти кат на скопските висококатници, што, за жал, тоа досега беше многу тешко изводливо, на граница на невозможното.

Шилегов истакна дека со ова повеќенаменско возило како дополнителна опрема е вклучена и пумпа за вода со капацитет од 45.000 литри во минута, со која, на пример, олимписки базен може целосно да се испразни за помалку од 16 минути.

„Да ја имавме оваа опрема кога беше поплавата во Стајковци, за еден и пол-два дена целата вода од населените места ќе можеше да биде испумпана, а самата скала може да биде користена и како кран за подигнување товар до 4 тони“, рече градоначалникот.