Македонија
Случајот со „пајакот“ и полицајката во фиока – ОЈО сè уште ги анализира доказите против Асани
Основното јавното обвинителство, и по шест месеци од инцидентот, сè уште ги анализира доказите за случајот со нападнатата полицајка Јасмина Јаначковска. Полицајката беше повредена при извршување службена должност додека со пајак-возилото и вработени од „Градски паркинг“ му го кренале непрописно паркираниот автомобил на високиот функционер во ДУИ, Бекир Асани. ОЈО не кажува колку и какви докази се обезбедени, но и дали ќе поведат обвинение против Асани.
„ОЈО ги анализира прибраните докази во насока на утврдување евентуална кривична одговорнсот“, беше кусиот одговор на ОЈО.
Обвинителството не ги даде снимките од безбедносните камери на кои точно се гледа дали полицајката била нападната физички или вербално иако во нив нема класифициран материјал. Останува нејасно зошто, ако полицајката не била нападната и сторителот има само прекршочна пријава, ОЈО отвори истрага, а снимките не се објавуваат во јавност, односно се чуваат во тајност.
Кога во јавноста одекна веста дека партискиот функционер на ДУИ, Бекир Асани, ја удрил полицајката Јасмина Јаначковска, МВР излезе со соопштение во кое тврдеше дека тој ѝ се развикал, но не ја тепал. Полицајката беше на сослушување кај министерот Оливер Спасовски, каде што кажа дека повредата настанала бидејќи се удрила во вратата од пајак-возилото. Нападнатата полицајка Јаначковска за „Макфакс“ пред седум месеци, по средбата со Спасовски, објаснуваше дека непотребно се кренала врева за целиот случај со нападот од функционерот на ДУИ, Бекир Асани.
„Вонредна прес-конференција на ‘Градски паркинг’, пајакот ќе се извинува во живо; Не ме удри никој, ме касна пајак; Лицето Бекир А. толку вербално ја нападнал што таа изгубила рамнотежа, при што настанало судир на полициската службеничка со возило од пајак-службата; Условно за цајканката и решена работа. Судија?; – Мамо, кога ќе пораснам, сакам да бидам полицајка. Никако ќерко, сакаш ли пајак да те тепа?; Агресивна полицајка нападна пајак, а тој го возврати ударот; Вистински пајак не удира полицајка“, беа само дел од коментарите што кружеа на социјалните мрежи.
МВР го гонеше Асани бидејќи го нарушил јавниот ред и мир, дело за кое максималната казна изнесува 800 евра. Функционерот на ДУИ, Асани, ѝ е добро познат на полицијата бидејќи неколкупати го евидентирала како учесник во насилство. Пред повеќе од две години тој и тројца партиски лица го нападнаа претседателот на Светскиот македонски конгрес, Тодор Петров. Овој предмет не стаса на суд.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левица ветува изградба на споменик за бранителите од Вејце
Политичката партија Левица вели дека ако дојде на власта ќе изгради во Вејце споменик во помен на загинатите бранители, кои несебично се жртвуваа во војната во 2001 година.
„Масакрот од 2001 година во село Вејце останува дел од колективната меморија на Македонците како најголем пораз на државните институции од група на терористи, кои ден денес немаат праведна судска разврска, туку напротив истите тие кои ги направија овие злосторства беа амнестирани и наградени со удобни фотелји.
Делегација на Левица на 28 Април ќе положи свежо цвеќе за сеќавање на жртвата на осуммина припадници на специјалната единица “Волци” кои беа убиени, масакрирани и живи запалени на истиот тој ден пред 23 години.
Проектот го изготви м-р Андреа Јанков, координатор на секторот за Урбанизам и локална самоуправа на Левица“, велат од партијата.
Македонија
Маричиќ: Евроинтеграцијата е премногу важна цел за да се потклекне пред предизвиците
Првиот заменик претседател на Владата за европски прашања Бојан Маричиќ ја пречека Вицепремиерката за европски прашања на Република Молдавија Кристина Герасимов. По остварената средба во Секретаријатот за европски прашања, Вицепремиерите одржаа заедничка прес конференција во Владата на Република Северна Македонија.
На прес конференцијата Вицепремиерот Маричиќ ја пренесе заедничката определба на двете држави што побргу да го завршат процесот за преговори за членство во ЕУ. Во продолжение интегралната изјава на Вицепремиерот Маричиќ.
„Откако на Самитот на ЕУ во Шпанија минатата година беше утврдена целта дека следното проширување на ЕУ е позиционирано до 2030 година, и откако Европскиот Совет донесе одлука да ги отвори пристапните преговори со Молдавија и Украина, Северна Македонија и Молдавија имаат заедничка цел. Со тоа стануваме и стратешки сојузници.
Република Молдавија сега го отпочнува скрининг процесот, додека ние го завршивме успешно во декември минатата година. Успешниот скрининг е резултат на ангажманот на речиси илјада владини претставници и експерти од академскиот и граѓанскиот сектор, за што добивме признанија од страна на Европската Комисија.
На колешката Герасимов ѝ пренесов дека Северна Македонија ќе им го стави на располагање сето знаење и искуство од овој процес на нашите колеги од пријателска Молдавија. Исто како што ние ја добивме поддршката од Хрватска и Словенија, Србија и Црна Гора.
Тоа е европската солидарност. Тоа е израз на пријателство и поддршка како европски вредности.
И двете држави сериозно претендираме на членство при следното проширување до 2030 година. Тоа проширување добива на значење и во забрзување заради геостратешките и безбедносните аспекти, Но, исто толку сме свесни дека за членство во ЕУ мора да ги исполниме и објективните критериуми и стандарди. Секоја земја одделно со своите специфики и перформанси е повикана да ги постигне тие стандарди, но споделувањето на искуствата на тој пат е од огромно значење и секогаш добредојдено.
Исто така, имаме сериозна намера и подготвени сме да ги извлечеме најдобрите придобивки од Планот за раст, кој треба да донесе дополнителна динамика во евроинтегративните процеси на земјите претенденти за членство во ЕУ.
Креиран, како финансиска и политичка инвестиција во регионот, Планот за раст со шесте милијарди евра за Западен Балкан е подадена рака за забрзување на процесот за членство до 2030 година. Тоа е брза лента на патот на евроинтеграцијата. Планот за раст бара реформи од државите и од владите, а придобивките се во системските промени кои ги обезбедуваме низ тие реформи, во финансиските пакети за земјава и во економската интеграција во единствениот европски пазар.
Мораме да останеме силно посветени на европската реформа агенда, зашто само на тој начин, токму преку Планот за раст ќе си обезбедиме слободно движење на стоки, услуги и работници, пристап до Единствената платежна област, олеснување на патниот транспорт, интеграција во индустриските синџири на снабдување, интеграција и де-карбонизација на енергетските пазари, како и во дигиталниот единствен пазар.
На овој пат до членството во ЕУ, сите земји кои се во преговори или се кандидати се соочуваат со предизвици кои бараат одговорни одлуки. Северна Македонија сега е пред таков предизвик. Ние нема да се откажеме од донесувањето на потребните одлуки за да ги продолжиме започнатите преговори.
Со колешката Герасимов се согласивме дека евроинтеграцијата е премногу важна цел за да се потклекне пред предизвиците. За двете земји членството во ЕУ е приоритет во остварувањето на врвните државни интереси.
Македонија
„Не е законски да не е осигурана Клиниката, за тоа треба да преземе одговорност менаџментот“, кажа Демири
Министерот за здравство Илир Демири кажа дека штетата на Токсикологија е покриена, откако имаше хаварија со цевката за парно.
„Клиничкиот центар има заеднички служби кои се наменети за тоа, тоа им е примамрна обврска да се грижат за Клинички центар и за сите хаварии што можат да се случат. Хаваријата со цевката за парно е санирана уште вчера од страна на заеднички служби“, рече Демири.
Дали е потпишан договор или не, тоа се интерни договори на Клиниките кои морам да ги проверам, додаде министерот.
Во однос на болничарот кој требаше да биде суспендиран, Демири кажа дека има една голема неправда направена на Токсикологија, а тоа е необезбедување на согласност од страна на менаџментот на таа институција за обезбедување договори за 18 вработени кои се дел од медицинските процедури, кои веќе 4 месеци служат на таа институција, а не добиваат никаква економска надокнада.
„Во тек е изборна кампања, не сакам да се прекрши ниту една законска процедура, чекам да дојде извештајот на Инспекцискиот надзор кој ги има обврзано во тек на 5 дена менаџментот да најде решание за 18 луѓе кои работат, а не добиваат надокнада. Не е законски да не е осигурана Клиниката, за тоа треба да преземе одговорност менаџментот“, кажа Демири.
На новинарско прашање, министерот одговори дека економската директорка оди на работа и не се паркира на влезот на Клиниката.
„Не се точни наводите дека доаѓала на работа по четири саати, според моите сознанија“, додаде Демири