Агенцијата за национална безбедност не располага ниту со опрема за следење на комуникации, ниту со медијациски уреди за активирање на следењето на комуникациите во мрежите на операторите. Исто така, Агенцијата нема техничка можност самостојно и независно да активира и да врши следење на комуникации без посредство на Оперативно техничката агенција, реагира АНБ на изјавата на техничкиот министер за внатрешни работи, Наќе Чулев, дека Агенцијата ја задржала можноста да преслушува.

Од Агенцијата велат дека наводите на Чулев се дезинформации и ги отфрли неговите изјави како невистинити и тенденциозни.

„Наводите за наводна посредничка улога на Агенцијата за национална безбедност во процесот на следење на комуникациите и за наводен монопол во системот за следење на комуникациите се целосно невистинити. Имено, согласно член 35, став (1) од Законот за Оперативно техничката агенција, опремата за следење на комуникации со кои располагала поранешната Управа за безбедност и контраразузнавање е предадена на Оперативно техничката агенција, на ден 27.10.2018 година, за што е изготвен соодветен записник за примопредавање потпишан од директорите на УБК и Оперативно техничката агенција. Со наведениот записник, во согласност член 35, став (2) од истиот Закон, се предадени и медијациските уреди, сопственост на телекомуникациските оператори, кои до тогаш се наоѓале во МВР односно УБК. Примопредавањето е вршено под надзор на Комисија во чиј состав, покрај другите имало претставници на Врховниот суд и парламентарната комисија за надзор над спроведување на мерките за следење на комуникациите“, се наведува во соопштението.

Од АНБ велат дека Министерството за внатрешни работи има посебна служба за администрирање на пристапот зо следењето на комуникации заради кривични истраги, а АНБ нема пристап до ваквата администрација, ниту може да има увид во тековните предмети на МВР.

„Во изјавата на Чулев единствено вистинито е дека поранешната УБК од аспект на техничката опременост го имала монополот над користење на опремата за следење на комуникациите и таа монополска улога масовно ја злоупотребувала. Тој период конечно е зад нас, но тоа веројатно е тешко сфатливо за Чулев кој во тоа време имаше раководна функција во Агенцијата за разузнавање, чии вработени исто така беа сериозно инволвирани во настани кои се денес предмет на актуелни судски постапки“, се наведува во соопштението.

Времето утре ќе биде променливо облачно со сончеви периоди и со услови за краткотраен локален дожд и ретки грмежи, информира УХМР. Ќе дува умерен, наместа засилен ветер претежно од северозападен правец, особено ќе биде поизразен вдолж Повардарието.

Минималната температура ќе биде во интервал од 4 до 13, а максималната ќе достигне од 14 до 24 степени. Вредноста на УВ-индексот ќе биде 6.

Во Скопје променливо облачно со сончеви периоди и со услови за краткотраен дожд. Ќе дува слаб до умерен ветер од северозападен правец. Минималната температура ќе се спушти до 12, а максималната ќе достигне 21 степен.

Продолжува периодот на променливо облачно време со повремени врнежи од дожд и со потпросечни дневни температури за овој период од годината. Во попладневните часови на места ќе биде нестабилно-облачно со пороен дожд и појава на грмежи.

Здружението на новинарите на Македонија најостро ги осудува заканите кон новинарската екипа на ТВ Клан.

„Денеска новинарот Фуркан Салиу и снимателот Ибрахим Мамути биле на терен во селото Ваксинце, каде забележале и снимиле поголема група на емигранти која се движела во тој регион. Откако ја направиле снимката, тие со автомобил се упатиле назад кон Скопје, по што, еден автомобил со кумановска регистрациска табличка им го пресекол патот, а од него излегол човек кој директно им се заканил на новинарите и побрал од нив да ги избришат снимките и да не ги објавуваат“, се наведува во соопштението на ЗНМ.

Здружението на новинарите на Македонија бара од Министерството за внатрешни работи итно да го идентификува лицето кое се заканило на новинарите и да поднесе соодветна кривична пријава до Основното јавно обвинителство.

Според новинарската екипа на ТВ Клан, случајот е пријавен во полиција веднаш по примање на заканите. Затоа, велат од ЗНМ, очекуваме МВР веднаш да започне истрага, а со тоа да се испрати порака дека такви напади нема да се толерираат.

„Освен тоа, ги повикуваме домашните и меѓународните институции кои работат на заштита на правата на мигрантите да се заинтересираат за случајот и да помогнат за целосно расчистување. Потсетуваме дека цензурата е забранета со Уставот, а заканите кон новинарите се апсолутно неприфатливи, претставуваат кривично дело и за нив се одговара пред судот“, пишува во соопштението.