Министерката за образование и наука, Мила Царовска, денес имаше координативен онлајн состанок со над 200 директори од основни и средни училишта во државата. На состанокот се разговараше за сите актуелни прашања и за организираноста за стартот на учебната година во услови на пандемија.

Министерката во разговор со директорите истакна дека пандемијата го забрза процесот на дигитализација и воспоставувањето на онлајн платформата, но го забрзува и целиот процес на модернизација на образовниот систем.

Царовска истакна дека за првпат државата создава еден ваков сложен онлајн систем за исклучително краток рок и секако дека ќе има предизвици коишто заеднички ќе се надминуваат.

„Платформата ја правиме не само за да ја надминеме ковид-состојбата, туку и за да биде поддршка и понатаму во наставата. Предизвици ќе има, но најважно е сите да покажеме грижа кон учениците и да ја започнеме наставата на први октомври“, рече Царовска.

Од МОН најавија дека редовната координација на министерката со директорите продолжува и во наредниот период, со цел да се надминуваат предизвиците и да се обезбеди непречена настава во време на пандемија.

Заменик-претседателот на Владата задолжен за европски прашања, Никола Димитров, денеска се сретна со амбасадорот на Австрија во Северна Македонија, Георг Вуцас, на којашто стана збор за активностите на Владата во наредниот период со фокус на исполнување на реформската европска агенда, за австриската поддршка на нашиот евроинтеграциски процес, како и за билатералната соработка.

„Австрија е една од најгласните и најголеми поддржувачи за пристапувањето на Северна Македонија во Европската Унија и воопшто за политиката на проширување во контекст на регионот. Конзистентната и принципиелна австриска поддршка е од суштинско значење периодов за нашиот европски исчекор“, истакна Димитров, при што изрази надеж дека во најскоро време ќе се изнајдат модалитети за билатерална соработка во рамките на австриската развојна помош со акцент на реформските приоритети.

Во овој контекст двајцата соговорници се заложија за продлабочување на билатералната соработка, како и преку Твининг и ТАИЕКС механизмите на ЕУ,

На денешната проштална средба со амбасадорката на Кралството Јапонија во нашата земја, Кеико Ханеда, претседателот на Собранието, Талат Џафери, изрази задоволство од досегашната соработка со јапонската амбасада, односно со првиот резидентен амбасадор, Ханеда, и нагласи дека очекува во наредниот период да продолжи оваа соработка и со новиот амбасадор, со што ќе продолжи трендот на јакнење на политичките и економските релации меѓу двете земји.

Тоа ќе резултира со зголемување на јапонските инвестиции и интензивирање на соработката во областа на медицината, туризмот, културата и други области.

„Во овој период пред нас се три големи приоритети. Очекуваме во декември оваа година отворање на пристапните преговори со ЕУ, борба со епидемијата предизвикана од Ковид19, како и справување со последиците по економијата предизвикани од оваа пандемија, и јас очекувам дека успешно ќе се справиме со овие предизвици“, нагласи претседателот Џафери.

Јапонската амбасадорка, Кеико Ханеда, го потенцира своето задоволство од досегашниот престој во нашата земја во овие три години во својство на амбасадорка на Јапонија и изрази уверување дека соработката со македонското Собрание ќе продолжи и со нејзиниот наследник на највисоко ниво и во таа насока, упати благодарност за досегашната соработка и комуникација меѓу Амбасадата на Јапонија и Собранието на Република Северна Македонија, како и со парламентарната група за соработка. Исто така, амбасадорката констатира дека во овие три години се случија многу добри и позитивни настани во Република Северна Македонија, како што се полноправното членство во НАТО и датумот за почеток на преговорите со ЕУ и, изрази очекување дека претседателот Џафери и во наредниот период ќе продолжи успешно да го води Собранието и да се справува со предизвиците.

На крајот, и двајцата соговорници се согласија дека соработката меѓу Собранието на Република Северна Македонија и јапонската амбасада ќе продолжи како и досега на највисоко ниво.

.