Македонија
Спасовски: За МВР клучна треба да биде безбедноста, а не да ги заморуваме граѓаните кој какви возила има

Техиничкиот премиер Оливер Спасовски на прес-конференција посочи дека очекува уште денеска да се реши проблемот што се создаде во МВР, откако техничкиот министер Наќе Чулев испрати телеграма со која ги укина наредбите на неговиот претходник, па се создаде хаос низ единиците во министерството. Спасовски смета дека за граѓаните не е важно кој какви возила вози, туку институциите да бидат функционални и да нема сериозни закани врз безбедноста.
„Треба да се внимава во МВР, бидејќи не смее да имаме сериозни закани врз безбедноста или тоа да го предизвикаат одредени постапки, па да се создаде нестабилна ситуација. Ако се создаде хаос, тоа ќе биде поради лични интереси. Очекувам недоразбирањата да бидат надминати. Недоволното познавање на тоа што се носи како одлука доведува до ваква ситуација. Не треба да ги заморуваме граѓаните со тоа кој какви возила има, туку напротив, тие треба да седнат, да разговараат и да ги решат прашањата. За нас е поважно да се одржи безбедноста. Сметам дека задачата што ја добил директорот на БЈБ, да ја согледа состојбата по телеграмата со која се укинаа сите наредби, што, пак, сметам дека не е најисправниот модел, ќе заврши уште денеска во МВР. Ова не е обезбедувањето од времето додека бев министер за внатрешни работи, тоа е зголемено според уредбите, но тие се луѓе кои јас ги избрав“, посочи Спасовски.
Тој посочи дека примарна задача на Владата е да обезбеди нормално функционирање на институциите и работите да имаат нормален тек, а сè надвор од тоа е слободно толкување на законите.
„Институциите треба да продолжат да функцинираат нормално и да испорачаат услуги на граѓаните. Ние знаеме дека примарна задача на оваа Влада е да продолжи функционирањето на институциите, а втората е да се организираат избори. Треба да има нормален тек на работите. Сè што е надвор од ова е самоволно толкување на законите“, кажа Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.