„Средношколскиот глас“ вели дека компромисот постигнат од страна на Сојузот на средношколците е политички инструиран и неприфатлив. Според нив, оваа одлука била донесена во затворен круг и без консултации со пошироката средношколска јавност.

„Во текот на вчерашниот ден претседателот на Сојузот на средношколците објави дека постигнале договор со власта, кој никако не е поволен за нас средношколците. Иако се претставија како гласот на сите средношколци, оваа одлука ја донесоа во затворен круг и без консултации со пошироката средношколска јавност. Договорот што го постигнаа, најверојатно, по партиска наредба, не е ништо, освен дополнително потценување на средношколците. Се залагаа за кратење на испитите, но ништо не се исполни. Новиот концепт не го намали материјалот или бројот на испитите. Останува прашањето со кое право Сојузот на средношколците го прифати овој концепт во име на сите средношколци?“, велат од „Средношколскиот глас“.

Од „Средношколскиот глас“ ги повторија нивните барања – да се намали бројот на испититите на 2 екстерни и проектна задача. Да се организираат дополнителни часови за дообучување поради неквалитетната онлајн-настава.

Во текот на утрешниот ден преставници на „Средношколскиот глас“ до надлежните институции ќе поднесат барање за прием. Бараат во најкраток рок да бидат примени од страна на надлежните за да разговараат за концепт што ќе биде прифатлив за сите средношколци. Ние средношколците нема да се откажеме од оваа битка, отпорот ќе почне со посериозен чекор доколку нашите барања не се исполнат, порачаа средношколците.