Претседателот Стево Пендаровски се обрати на тркалезната маса насловена „Патот кон ЕУ и НАТО: Перспективи и предизвици“, организирана од Советот на амбасадори.

Претседателот Пендаровски во своето обраќање преку амбасадорите на ЕУ изрази благодарност до земјите-членки на ЕУ што проширувањето остана на агендата на Унијата и изрази очекување дека Северна Македонија ќе ги почне пристапните преговори за време на хрватското претседателство и дека новата методологија за водење на пристапните преговори ќе биде усвоена на состанокот на Европскиот совет во март 2020 година.

Претседателот нагласи дека ефектите од одлуката за почеток на преговорите ќе имаат позитивно влијание врз политичките процеси, реформската агенда, резултатите кои треба да се испорачаат, како и генерално, врз оптимизмот во општеството. Оттука, порача Претседателот, важно за нашата држава е кога таа одлука ќе биде донесена.

Претседателот изрази очекување дека процедурата во Шпанија за ратификација на протоколот за членство на Северна Македонија во НАТО се очекува да заврши до почетокот на изборите во нашата држава.

Претседателот порача дека е неопходно Република Северна Македонија да спроведе фер, слободни и демократски избори.

Само во последните две години МВР потрошило над 4 милиони евра за судски постапки од вработени кои тужеле главно за неисплатени прекувремени часови и незаконски прераспределувања, извести денес техничкиот министер за внатрешни работи, Наќе Чулев.

За да ја надмине праксата вработените да го тужат МВР, министерот Чулев вели дека формирал комисија која ги разгледала издадените решенија од почетокот на декември навака и најави дека на оштетени ќе им бидат дадени решенија за вработување на соодветни места.

„Еден месец пред заминување Оливер Спасовски издал огромен број решенија за унапредувања, но и за распределувања на пониски работни места без да се водат дисциплински постапки за тоа. Од почетокот на декември 2019 година до 25 месецот биле издадени 21.050 решенија. За само седум работни дена се издадени 1.198 решенија. Се делеле решенија и во дванаесет навечер на трети јануари. Само за споредба, во декември претходната година биле поделени само 194 решенија. Комисијата во која членуваат и преставници од репрезентативниот и од независниот полициски синдикат ги разгледа решенијата што биле поделени од 1 декември до 1 јануари. Разгледани се вкупно 1.750 решенија издадени во овој период. Незаконски издадени се 100 од нив. Голем број решенија биле издадени додека работниците биле на боледување, на платен или на неплатен одмор“, рече министерот Чулев.

Како втор спорен момент, откако ја презел функцијата, министерот Чулев го наведе незаконското користење на наредбите за времено извршување на работни задачи кои место само за еден месец се издавале и по повеќе од една година.

„Додека едните работат со наредба на други работни места, нивните испразнети места биле пополнети со нови луѓе па така на едно работно место се појавуваат по двајца. Вработените за ова се пожалиле и кај Народниот правобранител кој ни укажа дека се утврдени злоупотреби“, рече министерот Чулев.

Третиот спорен момент е со неиздавање нови решенија на вработените во поранешната Управа за безбедност и контраразузнавање.

По формирањето на Агенцијата за национална безбедност, дел од вработените кои не биле преземени таму, не биле ниту прераспределени на нови работни места во министерството туку пет месеци земале плата како да се уште вработени во УБК.

„Пет месеци примале плата како вработени во непостоечки субјект. Јас таква плата не потпишувам. Изготвени се решенија за нивно распределување во МВР“, рече министерот Чулев.

Тој нагласи дека со издадените решенија илјадници професионалци биле деградирани и најави дека откако ја презел функцијата ќе гарантира ист третман за сите, без притисоци оти единствени што требале да чувствуваат притисоци според него се оние кои го кршат законот.

Состојбата е целосно под контрола, во овој момент нема ниту една причина за некаков ризик или паника за коронавирус во нашата држава, изјави министерот за здравство, Венко Филипче.

„Кај нас стигнуваат авиони од Истанбул и Дубаи, за утрово имаме информација дека авионот од Истанбул бил откажан, односно пролонгиран за неколку часа. Системот со термокамери на скопскиот аеродром е веќе воспоставен. Во текот на вчерашниот ден направен е распоред на епидемиолози од Центарот за јавно здравје, и тие ќе бидат присутни за време на скенирањето. Вчера имавме работен состанок со директорот на ТАВ, излегоа во пресрет тие авиони секогаш да бидат насочени на еден или два излези, кои се многу блиску, од практичен аспект камерата да биде поставена на едно место, доколку треба да се користи собата за изолација“, изјави министерот Филипче.

Доколку се констатира дека некој од патниците има покачена телесна температура, додаде тој, првиот чекор е интервју со епидемиолозите дали доаѓал од Кина и дали имал контакт со некои заразени.

„Доколку има таков случај, има алгоритам како се постапува и, доколку има таков случај, има протокол за излолација, дезинфекција и на авионот и на просториите и соодветен пат којшто е веќе предвиден со тој алгоритам, со посебно возило на брза помош само за таа цел на инфективната клиника во Скопје“, рече министерот.

Во одговор на новинарското прашање, Филипче потенцираше дека однапред и пред скенирањето се знае колку пациенти, потенцијални заразени може да се очекуваат. Ова значи дека има двојна сигурност, и истите тие ќе бидат интервјуирани и ќе се знае како ќе се постапува.

„Секој кој нема директен контакт и не доаѓа од Кина ќе си оди преку преку матичниот лекар, а секој којшто доаѓа и има симптоми ќе се обрати на посебниот телефонски број, кој го има на дистрибуираните флаери од Институтот за јавно здравје. Работата е целосно под контрола и во овој момент не гледам ниту една причина за некаков ризик или паника“, истакна министерот Филипче.