Македонија
Стефанова очекува тројцата бизнисмени од „Империја“ да бидат осудени: Да им се одзеде имотната корист

Обвинителката Лиле Стефанова е децидна дека ќе докаже оти тројцата бизнисмени, кои не се спогодија за „Империја“, се виновни за делата што ги сториле. Таа пред судот посочи дека за предметот имало обемна истрага, во која се собрани голем број докази. Стефанова му посочи на судот дека очекува осудителна пресуда. Таа побара судот да им ја одзеде и имотната корист.
„Обвинителниот акт против обвинетите Цветан Панделески, Зоранчо Митревски и Јованче Тасковски за кривичните дела што се наведени е резултат на една обемна и долготрајна истрага. Во оваа постапка предмет на истражување беа повеќе осомничени лица, повеќе кривични дела сторени во подолг временски период, а некои од обвинетите, кои беа предмет во оваа истрага, го завршија со внесување пресуди врз основа на спогодби. За обвинетите, кои се предмет на ова обвинение, по завршување на истрагата, иако некои беа под истрага и за други кривични дела, Јавното обвинителство собра доволно докази за да очекува осудителна пресуда за дејствата што се опишани во диспозитивот на обвинението“, рече обвинителката Стефанова.
Таа во детали раскажуваше кои од фирмите на обвинетите колку приход добиле, како што рече, со сторувањето на кривичните дела.
„Пред судот ќе изведам повеќе материјални и вербални докази, од кои судот со сигурност ќе ја утврди фактичката состојба од обвинителниот акт. Преку материјалните докази и исказите на сведоците, ќе се утврди дека обвинетите Цветан Панделески и Зоранчо Митревски заедно со осудениот Ванче Мијалчев ги искористиле своите ингеренции во АД ‘Бетон’ – Штип, па прибавиле значителна имотна корист за правни лица на кои тие биле сопственици“, додаде Стефанова.
Обвинителката тврди дека ќе докаже и како Панделески и Митревски ги префрлале парите за кои знаеле дека се од сторени кривични дела.
„Обвинетите постапувале по веќе создаден план за стекнување противправен имот. Иако знаеле дека градежно земјиште е лоцирано во Центар, кое било во сопственост на правно лице, немало одобрение за градба, немало процена на уделот, земјиштето веќе било дадено под хипотека за кредит од Стопанска банка АД Битола, ги искористиле своите овластувања и на седница на одборот на директори потпишале записник со предлог-одлука за добивање зделка со заинтересирана страна да се откупат уделите на правното лице ‘Омега билдинг’, кое како единствен имот го имало ова земјиште“, посочи Стефанова.
Во вториот дел на обвинителниот акт се опфатени берзанскиот брокер Јованче Тасковски заедно со Цветан Панделевски.
„Личи на сложена измама од највисок вид за која судот сигурно ќе го убедиме, при што успеале да измамат долгогодишен стопанственик и да заработат милионски суми. Ќе докажеме дека Ненад Јосифовиќ, Јордан Камчев и обвинетите Јованче Тасковски заедно со Цветан Панделески, со намера да прибават противправна имотна корист, со лажно прикажување факти, како соизвршители ја довеле во заблуда оштетената Кираца Трајковска, да презема дејствија со кои нанела значителна имотна штета и на себе и правното лице, а притоа биле искористени и поголем број акционери на правното лице ‘Ферпшед’. Од доказите што ќе ги изведеме судот ќе се увери дека обвинетите, знаејќи дека акциите од ‘Ферпшед’, кои ги поседувале Трајковска и правното лице, се заложени да се земе кредит од Комерцијална и од Еуростандард банка, тие не се во можност да ги сервисираат своите обврски. Јордан Камчев со претходен договор со Цветан Панделески имал цел акциите на Кираца и на правното лице да му бидат продадени Штерјо Наков. Знаејќи дека Кираца Трајковска нема да се согласи со таквата продажба, ја довеле во заблуда дека ќе ѝ помогнат за исплата на кредитот, а таа да му помогне на правно лице од странство“, посочи Стефанова.
Објаснуваше и што направил обвинетиот брокер Тасковски.
„Обвинетиот Јованче Тасковски ги оневозможил акционерите слободно да тргуваат со акциите. И затоа нагло пораснала цената на слободните акции на ‘Фершпед’. За да ги земат акциите по помала цена од онаа на берзата, создале план по кој постапиле и акциите што ги имале Кираца Трајковска и правното лице ги запишале како основачки влог на ново правно лице, а притоа Панделески продолжил да купува акции од ‘Фершпед’, па во неработен ден, во просториите на брокерската куќа во присуство на Тасковски, Јосифовиќ и нотарот Сашо Писаровски, Кираца Трајковска добила документација за потпишување, со која се основа ново правно лице. За управител го поставиле Ненад Јосифовиќ, а со тоа ѝ дале да потпише и документација за отуѓување на правното лице. Следниот ден правното лице било пренесено на правното лице ‘Син фајненс“ ДООЕЛ, правен следбеник на друга фирма. Правното лице било користено на неговата сметка да биде пренесена имотната корист“, додаде таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Гази Баба и Кисела Вода денеска без струја

Регионалниот центар за управување со кризи на Град Скопје, по добиеното известување од ЕВН Македонија АД, информира дека дека поради технички зафати во електродистрибутивната мрежа денеска без електрична енергија ќе останат:
· од 08:30 до 09:30 часот, корисниците од село Инџиково од улиците: 3, 7, 14, дел од ул. 10 и дел од ул. Маџари. (Општина Гази Баба)
· од 08:30 до 15:30 часот, корисниците од дел од ул. Студеничанска и дел од ул. Драчевска. (Општина Кисела Вода)
· од 09:30 до 13:30 часот, корисниците од ул. Добре Ивановски, и дел од ул. 22 во нас. Инџиково. (Општина Гази Баба)
Македонија
Денеска максималната температура до 38 степени, од утре потопло

Времето денеска ќе биде сончево со мала до умерена локална облачност. Ќе дува слаб до умерен ветер од северен правец.
Минималната температура ќе биде во интервал од 11 до 18, а максималната ќе достигне од 30 до 38 степени.
Во Скопје, сончево со мала до умерена облачност. Ќе дува слаб до умерен ветер од северен правец. Минималната температура ќе се спушти до 17, а максималната ќе достигне до 38 степени.
Времето во наредните денови
Следува период на сончево и топло време со мала до умерена облачност.
Температурите ќе бидат во постепен пораст, особено од четврток до средината на наредната седмица кога дневната температура насекаде ќе биде над 30°C, а наместа ќе надмине 40°C. Во недела во попладневните и вечерните часови ќе има услови за локална нестабилна облачност со пороен дожд и грмежи.
Македонија
Муцунски на настан на Атлантскиот совет: Потребна е забрзана интеграција

На покана на Јерн Фленк, директор на Атлантскиот совет, министерот за надворешни работи и надворешна трговија, Тимчо Муцунски, денеска учествуваше на настан организиран од Советот, кој се одржа во просториите на Министерството за надворешни работи и надворешна трговија.
Покрај министерот Муцунски, на настанот се обратија и министерката за европски прашања на Црна Гора, Маида Горчевиќ, како и претставници Делегацијата на Европската Унија, невладиниот сектор и самиот Атлантски совет.
Во своето обраќање, министерот Муцунски ја нагласи потребата од одлучна и доследна поддршка за реформските процеси во регионот. Посебен акцент стави на Планот за раст како практичен инструмент кој го забрзува приближувањето кон единствениот европски пазар и носи реални економски придобивки за граѓаните – уште пред полноправното членство.
Министерот подвлече дека реформите мора да бидат препознаени и вреднувани од страна на Европската Унија преку конкретни и навремени чекори, со цел зачувување на кредибилноста на процесот на проширување и спречување на дополнително разочарување кај граѓаните. Тој истакна дека реформските процеси се потврда за јасната европска ориентација на Владата, и дека нивното спроведување не претставува само исполнување на агенда, туку реално подобрување на квалитетот на животот и на општеството во целина.
Во завршницата на обраќањето, министерот Муцунски, во контекст на денешниот Самит, ја повтори пораката дека Западниот Балкан е составен дел од Европската Унија и дека европската целина ќе биде комплетна само ако земјите од регионот станат нејзин дел. Тој упати повик за забрзана интеграција на регионот, што ќе значи и вистинска европеизација на овој дел од континентот.