Македонија
(Видео) Стојаноска од собраниската говорница: Запрете со овој филм, надвор имаме ужасна реалност, а вие ќе си гласате закон за да се амнестирате
Собраниските пратеници завршија со одморот. На првиот работен ден пратеничката од опозицијата, Дафина Стојаноска, им се обрати на собранискиот спикер и на владејачкото мнозинство.
Како стоите мирно денес тука, ги праша пратеничката Стојаноска собранискиот спикер Талат Џафери и владејачкото мнозинство алудирајќи на скандалот на Онкологија.
„Да имавме луѓе со морална чест и доблест, уште во саботата ќе расправавме за оставка на владата. Да имавме претседател со чест и доблест, ќе дојдеше да ни се обрати. И, конечно, да имавме владејачко мнозинство со чест и доблест, денес сите заеднички ќе се сложевме да расправаме по една друга пленарна седница, со единствена точка на дневен ред – за болните од рак на Онкологија. За жал, ништо од ова нема, а проблемите само се таложат“, потенцира пратеничката од ВМРО-ДПМНЕ.
На седницата, како што рече, треба да се зборува за скандалот на Онкологија, а не да се подметнуваат закони со европски знамиња. Реагира и на постапката на Џафери за незакажување на седницата за уставните измени.
„Многу добро ни е јасно зошто нема да свикате седница за уставните измени, можеби и до крајот на вашиот мандат. Но многу се плашам дека до крајот на вашиот мандат ќе ви се случат уште многу несреќи поради вашата небрежност и однесување“, рече Стојаноска.
Џафери ѝ објасни дека седницата за уставните измени ја прекинал кога утврдил дека дискусијата била исцрпена.
„Јас не сум крив што цитирате погрешни норми, нема правен проблем за прекин на седницата. Јас не го толкувам, туку го спроведувам тоа што го пишува во Деловникот“, одговори Џафери.
Револтирана за скандалот на Онкологија и незакажувањето на седницата за уставните измени, Стојаноска од собраниската говорница со порака до владејачкото мнозинство: „Запрете со овој филм, надвор имаме реалност, надвор ни се случуваат ужасни настани, а вие ќе си гласате закон за да се амнестирате“.
Пратеникот Скендер Реџепи беше целосно согласен со Стојаноска во врска со скандалот на Онкологија. И за него, како што рече, таму е сторено кривично дело. Но, според Реџепи, кривично дело е и неможноста Албанците од Велес да се образуваат на својот јазик.
„На Албанците од Велес не им се дозволи образование на албански јазик, дали ова не е кривично дело кога уставното право го опфаќа и начелото за образование“, праша Реџепи.
Инаку, на денешната седница на дневен ред е предлог на декларацијата по повод сто и дваесет годишнината од Илинденското Востание и Крушевската Република.
Пратениците ќе дискутираат и по предлогот за избор на член на Националниот совет за високо образование и научноистражувачка дејност и предлогот за избор на членови на Државниот совет за превенција на детско престапништво.
Како што е најавено, пратениците треба да расправаат и по предлог на закон за изменување и дополнување на Законот за акцизите и на Законот за Развојната банка на Северна Македонија по скратена постапка и слично.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево време со температура до 25 степени
Времето утрово е студено со појава на магла по одделни котлини и речни долини. Преку денот, ќе биде сончево со мала локална облачност. Ќе дува слаб ветер претежно од југоисточен правец. Минималната температура ќе биде во интервал од -3 до 5, а максималната ќе достигне од 18 до 25 степени.
Во Скопје минималната температура ќе се спушти до 2, а максималната ќе достигне до 23 степени, јавува УХМР.
Во наредните денови продолжува периодот на стабилно и претежно тивко време со студени утра и температури кои наместа ќе се спуштаат под нула степени. По одделни котлини ќе има услови за појава на утринска магла или ниска облачност. Дневната температура ќе биде без значителни промени.
Македонија
Не е за пиење водата во тетовските села Мерово, Луковица и Седларево, како и во прилепското село Ропотово
Регионалниот центар за управување со кризи Тетово, извести дека од Центарот за јавно здравје ЈЗУ – Тетово добиле информација дека испитаните примероци на вода за пиење од селата Мерово, Луковица и Седларево (Општина Желино) не одговара на законските и стручни прописи за бактериолошка анализа.
„Потребно е да се врши редовна дезинфекција на водата за да може да се употребува за пиење“, велат од ЦУК.
РЦУК Битола, информира дека од Центар за јавно здравје ЈЗУ – Прилеп е докажана здравствена микробиолошка неисправност на водата за пиење од регионалниот водовод (Општина Долнени) во с. Ропотово и во основното училиште на с. Ропотово.
Македонија
Се’ уште забранета водата за пиење во Струмица
Изречената забрана за пиење на водата од струмичкиот водоснабдителен систем останува на сила, соопшти Агенција за храна и ветеринарство (АХВ) по резулатите од анализираните мостри земени на 18 октомври годинава во рамки на спроведениот вонреден инспекциски надзор во водоснабдителниот објект – фабрика за вода на ЈКП „Комуналец” Струмица.
Од АХВ информираа дека кај сите мостри претходно зголеменото ниво на манган е во рамки на дозволените вредности, но микробиолошки, четири од земените мостри не ги исполнуваат безбедносните критериуми поради детектирано зголемено присуство на колиформни бактерии во водата.
Целта на контролата беше увид во досегашните активности спроведени од страна на ЈКПД Комуналец од Струмица во однос на спроведувањето добра производствена и добра хигиенска пракса, како и други технички зафати во водоснабдителниот систем.
Во рамки на надзорот, земени се 6 мостри за анализа на водата од водоводната мрежа на ЈПКД Комуналец Струмица и тоа: една мостра од сирова вода која доаѓа од браната, сирова вода од чешма во фабриката, втора мостра на хлорирана/третирана вода за пиење од чешма во фабриката за вода, три мостри вода за пиење од мерните места одредени од ЈПКД Комуналец во нивниот мониторинг план за земање мостри вода за анализа и една мостра вода за пиење земена по случаен избор на инспекторот од водоводната мрежа на ЈПКД Комуналец.