Македонија
Струјата ќе поскапи за оние кои ја користат за луксуз, загреваат базени и поголеми простории, најави премиерот Ковачевски

Нова повисока цена на струјата ќе има, но не за сите категории потрошувачи, потврди денес премиерот Димитар Ковачевски. Оние кои ја користат струјата за основните потреби кои ги има домаќинството нема да имаат ценовен шок, за разлика од оние кои, како што рече премиерот, ја трошат за луксузирање.
„Првиот и вториот блок опфаќаат над 90 %, некаде до 98 % од домаќинствата во државата и за нив нема да има никаква промена на цената на електрична енергија, како што и немаше. Ние ценовен шок не дозволивме за граѓаните. Третиот и четвртиот блок се помал број на домаќинства кои имаат поголема потрошувачка на електрична енергија. Во четвртиот блок се домаќинства кои што, согласно своите приходи, согласно своите можности, загреваат поголеми простории, загреваат базени и така натаму. Секој согласно своите можности може тоа да го прави меѓутоа ќе плати и поскапа цена. Ние ја субвенционираме до 90 % електричната енергија во државата за да нема ценовен шок. Оние кои ја користат електричната енергија за основните потреби кои ги има едно домаќинство нема да имаат ценовен шок. Оние кои имаат можност да користат електрична енергија за полуксузни намени, тогаш и ќе плаќаат повеќе“, рече премиерот Ковачевски по денешната презентација на новата апаратура за генетика во Македонската академија на науките и уметностите.
Премиерот со денови се обидува да ја дообјасни неговата изјава дека со враќањето на евтината дневна тарифа на струјата во периодот од 13 до 15 часот, се заштедува 1000 денари месечно. Денес, одговарајќи на новинарски прашања кажа дека пресметката ја направиле, меѓу другото, и врз основа на претпоставена зголемена потрошувачка поради враќањето на дневната евтина тарифа.
„Се пресметува врз основа на пресметка која го определува просечното трошење на електрична енергија во текот на 24 часа и врз основа на претпоставено зголемување на потрошувачката од 13 до 15 часот, на нешто што се правело подоцна или порано, со оглед на тоа што голем број домаќинства во државата имаат пензионери меѓутоа имаат и лица кои се дома и имаат активности кои побаруваат поголема потрошувачка на енергија како што е готвење, перење и така натаму, кои ги извршуваат во тие два часа. Такви искуства сме имале и во минатото“, објасни премиерот Ковачевски.
Сите останати забелешки за формирањето на цената на струјата, новата давачка за пристап до мрежата и структурата која влијае на формирање на цената премиерот ги пренасочи во Регулаторната комисија за енергетика. Од таму веќе потврдија дека зголемување на цената на струјата ќе има, но ќе се бараат креативни решенија со кои ќе се амортизира ударот врз граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Со чесна и посветена работа Асен Шајн ќе го врати сјајот на Охрид

Претседателот на Социјалдемократскиот сојуз на Македонија, Венко Филипче на граѓанската трибина во Охрид, порача дека оваа општина заслужува посветена, чесна и одговорна локална власт, со Охрид повторно ќе биде бисер на Македонија.
„Сега имаме можност заедно да го направиме Охрид повторно бисер на Македонија. За нас и за нашите поколенија. Сега е време за промени во Охрид, време е општината да добие градоначалник како д-р Шајн”, порача Филипче.
Лидерот на СДСМ го претстави кандидатот за градоначалник, Асен Шајн, како човек со визија, искуство и посветеност кој ќе ги заврши проектите, ќе го врати редот и ќе се грижи за охриѓани со чесност и посветеност.
„Тој е тука за да го врати редот, да ги заврши проектите и да го врати Охрид на граѓаните. Асен е вреден човек, чесен човек. Човек кој ќе работи во интерес на Охриѓани и ќе се грижи за нив исто како што се грижи за нивното здравје. Кај него нема ароганција, нема непристапност, тој ќе биде човек на народот”, посочи Филипче.
Тој се осврна на моменталната состојба во општина Охрид, посочувајќи дека реалноста покажува сериозни проблеми: непланско ширење на градот, зголемени цени на јавни услуги, недовршени капитални проекти и сообраќаен хаос, што го намалува квалитетот на животот на охриѓани.
„Охрид стана симбол на урбанистички хаос, со рекорден број дозволи за градба и недовршени проекти како плоштадот „Крушевска Република“, велосипедската патека до Св. Стефан и катната гаража. Локалната власт е фокусирана на фамилијарни вработувања и тендери, додека граѓаните се соочуваат со секојдневни проблеми“, нагласи Филипче на граѓанската трибина на СДСМ и Коалицијата „Се бориме за нашиот дом”.
Македонија
Времето денеска променливо облачно со сончеви периоди

Времето денеска ќе биде променливо облачно со сончеви периоди. Ќе дува слаб до умерен ветер од северен правец, поизразен долж Повардарието. Минималната температура ќе биде во интервал од -6 до 5, а максималната ќе достигне од 3 до 15 степени.
Во Скопје, променливо облачно со сончеви периоди. Ќе дува слаб до умерен ветер од северен правец. Минималната температура ќе се спушти до 2, а максималната ќе достигне до 12 степени.
Во недела утрото ќе биде ведро и студено со ниски утрински температури, кои наместа ќе се спуштат под нула степени. Во текот на денот ќе преовладува сончево и потопло време со мала до умерена облачност, која кон крајот на денот ќе се зголемува. Во текот на ноќта и во понеделник ќе има повремени локални врнежи од дожд. До среда ќе дува умерен до засилен северен ветер, а температурите ќе се задржат под просекот за овој период од годината.
Македонија
Мицкоски до Ахмети: Игрите на етничка карта се научени, ние читаме една нова книга за Македонија која е развиена, во која младите се враќаат

СДСМ на овие избори настапуваат со слоганот „се бориме за нашиот дом“. И сè е тоа фино, ама забораваат дека пред година и три месеци тие управуваа со домот. И она што го затекнавме не беа нарушени, туку уништени темели. Кога ќе се сетам дека првите одлуки кои ги донесов како премиер беа да враќаме плати кои тие не ги исплатиле и дека делевме субвенции кои тие со години не ги исплаќаа. Секој ден во Владата ми доаѓаше по некој кој сведочеше за рушвет, тоа трае и денес, рече претседателот на ВМРО-ДПМНЕ Христијан Мицкоски на вечерашниот митинг во Битола.
„Се сеќавате дека 500 илјади наши сограѓани, поточно секој трет човек во државата живееше со 150 денари на ден. Дека имаше двоцифрена инфлација, дека го руинираа животниот стандард на чие кревање напорно и постепено работиме. А ДУИ беа господарите кои одлучуваа за целата економија, за тендерите, купуваа трговски центри, бензински пумпи, скапи деловни простории и што уште не. Се сеќавате ли на играњето фудбалчиња во канцеларии“, кажа Мицкоски.
Мицкоски укажа дека тоа време на народот не му носи ништо добро.
„Го слушам Филипче како се потсмева на тоа што на пензионерите им се зголемуваат пензиите за 1000 денари, а намерно пропушта да каже дека за година и пол пензиите се зголемуваат за цели 5000 денари, што покажува дека има разлика со времето кога тие наместо да даваат, земаа од пензионерите. Јас и сфаќам дека 5000 денари не се големи пари за Филипче кој е научен на јахти, згради и веселби во Дубаи, но ние го испорачавме тоа што го ветивме“, укажа Мицкоски.
Мицкоски се осврна на однесувањето на Али Ахмети и раководството на ДУИ во текот на оваа локална кампања.
„Што се однесува до Ахмети, тажна е сликата како се присетува и дели некакви историски лекции, додека неговиот народ се иселува поради неговото криминално владеење. Човекот води избори за локални избори, а не пропушта да спомне историска лекција. Но, додека беше во владата не заборави своето семејно портфолио да го зголеми со еден убав трговски центар во центарот на главниот град, неговите соработници да купуваат скапи деловни простории. Но, затоа не кажува ни еден збор што ќе направи да ги задржи Албанците во своите родни места, но него не му е до Албанците, тој само се заканува и игра само на етничка карта. Сакам да му порачам дека овие лекции се научени и се минато, ние читаме една нова книга за Македонија која е развиена, а младите што се селеа поради таквите како него да се вратат во државава“, заклучи Мицкоски.