Првиот вицепремиер и министер за животна средина и просторно планирање, Изет Меџити заедно со директорката на Државниот инспекторат за животна средина Ивана Гиновска и в.д. директорот на Јавното претпријатие „Дрисла“ Ненад Јосевски ја посетија депонијата „Дрисла“.

При оваа посета се разговараше за важноста на инвестициите во депонијата, со цел таа да биде целосно функционална и да нуди побезбедни и поефикасни услуги.

Меџити ја нагласи потребата од заградување на депонијата пред се од безбедносни причини, а со тоа ќе се овозможи заштита на животната средина и јавното здравје.

Тој нагласи дека потребните инвестиции ќе помогнат да се подобрат условите за работа и ќе се придонесе за подобро управување со отпадот во регионот.

Оваа посета, како што соопштија од кабинетот на Меџити, ја истакнува посветеноста на Владата за подобрување на управувањето со отпадот и обезбедување почиста и поздрава животна средина за граѓаните.

Како држава ја поддржуваме образовната мобилност. Но, ги поддржуваме и политиките на ЕУ за справување со одливот на мозоци, а Владата, преку мултиресорски пристап, креира мерки и активности за да се намали заминувањето на кадрите кои нам ни требаат, рече министерката за образование и наука Весна Јаневска на доделувањето 20 стипендии „Борис Трајковски“ за двегодишни студии од втор циклус во рамки на Пан-европската извршна МБА програма со двојна диплома од Универзитетот Јорк и Универзитетот во Стразбур.

Стипендија што го носи името на претседателот Борис Трајковски, како што рече министерката, во знак на почит за човекот кому му беа најважни личниот интегритет, човечката добрина и Татковината, треба да им биде мотив и инспирација на стипендисти да стекнат нови знаења, напредни вештини, иновативни идеи и различни перспективи, кои потоа ќе ги применат во матичната земја.

За да ги поттикне младите и високообразувани кадри да ја видат својата иднина во Македонија, Министерството за образование и наука целосно го реобмислува системот на образование на сите образовни нивоа.

„Завршени се измените на дел од регулативата, ја зајакнуваме основата врз која го градиме образовниот систем. Работиме на усогласување на образованието со потребите на пазарот на труд. Во средното стручно образование веќе имаме успех, во високото образование следи ревизија на квотите за упис на факултетите, врз основа на реална анализа за потребите на државата. Тоа повлекува и ревизија на политиките за стипендирање. Подготвуваме регистар за евиденција на сите стипендисти. Кога на ова ќе го додадеме и ставот на Владата дека буџетот за образование и наука од година на година ќе расте, јасно е дека сериозно пристапуваме кон предизвикот да го подигнеме квалитетот на образованието“, укажа Јаневска.

Студиите се реализираат во Солун, Грција, со студиски посети на Универзитетот Јорк во Обединето Кралство и на Универзитетот во Стразбур, Франција. Средствата за уписнина ги обезбедуваат Владата на Република Северна Македонија, преку Министерство за образование и наука и Сити Колеџ, Европскиот кампус на Универзитетот Јорк.

Денеска во Глазгов, Шкотска – Обединетото Кралство започна четиридневното Генерално Собрание на ИНТЕРПОЛ кое ќе трае до 07.11.2024 година, на кое македонската делегација ја предводи Директорот на Бирото за јавна безбедност, Александар Јанев.

Генералното Собрание беше отворено од страна на Премиерот на Обединетото Кралство, Кер Стармер.

Во текот на Генералното Собрание ќе се дискутираат теми кои се од витално значење за меѓународната полициска соработка која се спроведува преку ИНТЕРПОЛ, најголемата светска полициска организација со 196 држави членки ширум светот.

Темите опфаќаат нова генерација на полициски капацитети за размена на информации во борбата против тероризмот, организираниот криминал, сајбер криминалот и борбата против финансискиот криминал и корупцијата. Од огромно значење е и размената на биометриски податоци, вештачката интелигенција и иднината на полициското работење, како и поврзување на полициите преку глобално партнерство.

Во текот на Генералното Собрание ќе биде избран новиот Генерален Секретар на ИНТЕРПОЛ, кандидатот од Бразил, г.Валдеси Уркиза, како и останати членови на Извршниот Комитет на Организацијата.

Во текот на првиот ден од Генералното Собрание, македонската делегација оствари средба со делегацијата од Колумбија, на која беше договорено започнување на постапка за потпишување на Договор за соработка на полето на размена на информации и учество во заеднички истраги против трговијата со дрога и другите форми на организиран криминал, како и со делегациите од Обединети Арапски Емирати, Јужна Кореја, Турција и Франција, со кои беа дискутирани важни прашања за продлабочување на билатералната соработка со овие држави, во насока на зголемување на размената на информации за сите области на криминал, имплементирање на софистицирани методи, алатки и напредни технологии при постапувањето на полицијата, а воедно се дискутираше и за предизвиците со кои се соочуваат полициските служби во дигитален свет во кој денес живееме.
Македонската полиција ја етаблираме во рамноправен партнер за соработка во глобални рамки, се истакнува во соопштението.