Судијката Добрила Кацарска го прекина обвинетиот ексградоначалник на Битола во предметот „Транспортер“, Владимир Талевски, кој 15 минути говореше во распитот пред судот за наградите и успесите на Општината.

Талевски рече дека по завршување на мандатот, се вратил да работи во Народниот театар во Битола. Тој рече дека Општината и тој добиле двоцифрена бројка на награди и призанија за успесите на тимот со кој тој раководел.

„Тука беше и индустриската зона Жабени, во која инвестира ‘Кромберг Шуберт’, која вработи 6.000 луѓе…“, рече Талевски.

Судијката го прекина и рече да се држи до она за што е обвинет, а тоа е предметот со злоупотребата на положбата за исплата на двојно поскап превоз за учениците.

„Индустриската зона Жабени не е предмет на обвинението, како и тоа дали Општината била наградувана. Судот има трпение, но држете се до она за што сме овде…“, рече судијката.

Талевски и неговиот адвокат Димитар Дангов потоа се насочија на прашања и одговори што се однесуваат на работата на Оппштината во делот на надлежностите. Талевски рече дека за овој случај имало кривични пријави уште додека бил градоначалник, и тоа од, како што рече, спротивната политичка партија.

Судењето за „Транспортер“ почна на 28 септември 2017 година, но расправата почна од почеток. Обвинети се 21 лице за злуопотреби на буџетот со превозот на уленици во Битола. Меѓу обвинетите се ексградоначалникот на општина Битола, Владимир Талевски, експретседателот на Комисијата за јавни набавки во Битола, директори на основни и средни училишта, како и превозници, кои наплаќале двојно повисока цена за превозот.