Портпаролката на СДСМ, Богданка Кузеска, е во самоизолација затоа што имала средба со директорката на УЈП, Сања Лукаревска, која е позитивна на коронавирус.

„По насоки и препорака на епидемиолозите, во наредниот период ќе бидам во самоизолација, поради кратка средба што ја имав со мојата пријателка Сања Лукаревска. Немам никакви симптоми, се чувствувам одлично, а ќе се тестирам во текот на утрешниот ден. На мојата драга пријателка Сања, на другарот Мухамед Зекири и неговото семејство и на сите граѓани кои се позитивни на Ковид-19 и се во самоизолација, им посакувам брзо оздравување и добро здравје“, напиша таа на „Фејсбук“.

Од почнувањето со работа на угостителските објекти до сега од страна на Министерството за внатрешни работи во соработка со Државниот пазарен инспекторат извршени се контроли на вкупно 2.184 објекти, информираат од МВР.

При проверките било утврдено дека 24 угостители не ги спроведуваат одлуките на Влада. Од вкупниот број контроли, 1.573 биле направени за време на викендот (од петок до недела), а 483 во текот на вчерашниот ден.

Понатамошното постапување по однос на констатираните прекршоци е во надлежност на Државниот пазарен инспекторат.

МВР апелира до граѓаните да ги почитуваат одлуките на Владата кои се однесуваат на соодветна употреба на заштитна опрема, а угостителските објекти да ги преземат сите мерки за нивно соодветно спроведување.

Во текот на изминатото деноноќие на територијата на цела држава на 337 лица им се издадени решенија за изолација, а 62 лица потпишале изјави за самоизолација.

Од МВР информираат дека од страна на полициски службеници биле извршени контроли кај лица во изолација и самоизолација, но не се евидентирани прекршувања на мерките.

Во однос на мерката за носење заштитни маски регистрирани се 585 прекршоци.