Македонија
Тимот на Сиљановска обвинува дека СДСМ преку апликација прибирал лични податоци на граѓани

Со помош на апликација за смарт-телефони за оперативен систем андроид, СДСМ прибирал лични податоци на граѓани, обвини денеска Горан Момировски, кој рече дека информацијата ја добиле од таканаречен свиркач, кој испратил документ до член на тимот на кандидатката за претседател, Гордана Сиљановска-Давкова.
„Според независни ИТ-експерти кои ги консултиравме, постојат сериозни индиции дека со помош на апликацијата што е поставена на сервисот за апликации на Гугл плеј, а која е направена од страна на владејачкиот СДСМ се прибираат лични податоци и мета-дата од телефони на сите што ја симнале аликацијата“, рече Момировски и додаде дека со оглед на тоа што се работи и за следење на животите на граѓаните и скалдирање лични податоци, фотографии и видеа на граѓани овој скандал може да се нарече „Големото око“.
Дополнително, како што истакна, апликацијата се користи од членови на СДСМ коишто со нејзина помош добивале целосен увид во интернет-активностите на сите граѓани.
„Преку оваа апликација теренските активисти на СДСМ прибираат и складираат лични податоци на граѓани без нивна дозвола. Овие податоци спротивно на сите позитивни правни прописи се под контрола на партијата на власт и најверојатно се користат за други активности со цел да се влијае на гласањето, но и за други политички цели на власта. Според документите што ги добивме, имаме сериозна загриженост дека се злоупотребуваат матични броеви на граѓани, се врши контрола на лични контакти и таканаречена геолокација, односно следење движење на граѓани и на тој начин се вршат тешки злоупотреби во изборниот процес. Им сугерираме на сите граѓани веднаш да ја избришат апликацијата преку којашто една партија има целосен увид во приватниот живот на граѓани. Апелираме до граѓаните да одбијат да разговараат со теренските екипи на СДСМ коишто од нив бараат каков било податок“, додаде Момировски.
Тој рече дека сите релевантни институции коишто имаат ингеренции на ова поле го добиле материјалот и документот е доставен до Јавното обвинителство, ДИК, Комисијата за заштита на лични податоци, странски институции и организации и амбасади, ОБСЕ, ОДИХР, МВР оддел за компјутерски криминал. Најави дека ќе бидат информирани и низа други меѓународни организации во Брисел, во САД, европски членки и НАТО.
Од Јавното обвинителство бараат да преземе итни мерки за спречување на уништување на доказите. Бараат ЈО да одреди мерка за забрана на користење на апликацијата, да направи увид и конфискација на серверот во Социјалдемократскиот сојуз со цел да се утврди фактичката состојба којшто говори документот.
„По сите претходни скандали од овој тип не научивме дека изборите се празник на демократијата, а не можност за тешки злоупотреби на човековите права. Не очекуваме овој скандал да ја наруши победата на кандидатката за претседател Гордана Сиљановска-Давкова, но, за жал, овој скандал може да влијае негативно на можноста за добивање датум за преговори со ЕУ, нешто што е главна цел на македонските граѓани. Поради сензибилноста на случајот не би сакал да дадам одговори на ваши прашања, во очекување на реакциите од сите македонски институции, пред сè на ЈО“, истакна Момировски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Велјановски: Секогаш кога ДУИ губи, прибегнуваат кон потпалување на меѓуетничките односи

Секогаш кога ДУИ губи, секогаш кога граѓаните ќе ги прочитаат нивните вистински коруптивни намери, тие прибегнуваат кон потпалување на меѓуетничките односи и загрозување на соживотот, кажа на прес-конференција Александар Велјановски, пратеник на ВМРО-ДПМНЕ.
ДУИ, вели тој, нема аргументи и политики, единствена политика им е деструктивноста и уништувањето на соживотот на граѓаните.
ВМРО-ДПМНЕ, како што рече, најостро ја осудува срамната и опасна изјава на поранешниот министер за економија Крешник Бектеши, дадена при промоција на кандидатот на ДУИ за градоначалник на Тетово, Бајрам Реџепи.
„Бектеши, без трошка одговорност, велича оружје и отворено ја оправдува војната од 2001 година, претставувајќи ја како политички капитал. Тоа е скандал од невидени размери и директен удар врз меѓуетничките односи во државата.
Ова е класичен говор на омраза кој ја враќа Македонија во најтешките времиња. Наместо за иднината, граѓаните некој повторно сака да слушаат етнички провокации и поттикнување на поделби.
Македонците се столбот на Тетово. Со векови наназад тие се дел од неговата историја, култура и идентитет. Со својот труд и љубов кон овој град го изградиле и го зачувале. На овие избори како и многу пати претходно, токму Македонците со својот единствен сплотен глас и својата волја ќе одлучат кој ќе биде татко на Тетово и каква иднина ќе има овој град.
Ја повикуваме СДС јавно и веднаш да ја осуди оваа изјава и да се огради од својот коалициски партнер. Време е да се оттргнат од зависноста кон ДУИ и да покажат барем минимална одговорност. Секое молчење е соучесништво. Но, бидејќи СДС со години е навикнат да биде нем и покорен партнер на ДУИ, секој нивен денешен молк значи само едно, дека станале партнери и во омразата“.
Апелира до сите политички партии, организации и институции, да го осудат овој чин како отворен говор на омраза. Во Македонија, како што нагласи, нема место за политичари кои својата кампања ја градат на закани, омраза и величање оружје.
„Нашата обврска е да ја изградиме Македонија како силна, праведна и европска држава. Земја на мир и стабилност, а не на поделби и закани. Народот очекува јасна позиција, а ние ќе продолжиме да ја браниме Македонија од сите што сакаат да ја претворат во заложник на криминални и етнички поделби“.
Македонија
Сиљановска-Давкова: Нашите соседи наместо да не поддржат користат вето, крајно време е да се направат промени во ЕУ за начинот на одлучување

Претседателката Гордана Сиљановска-Давкова се обрати на годинашниот самит „Конкордија“, којшто секоја година се одржува паралелно со Генералното собрание на ОН.
Во обраќањето таа рече дека она што се ОН за светот, ЕУ е за Европа, мултилатерален проект со една врвна цел: мир на континентот и нагласи дека тоа се постигнува преку проширувањето врз основа на Kопенхашките критериуми: демократија, владеење на правото, човекови права и слободи, и пазарна економија. Додаде дека Европската Унија не може да го брани мултилатерализмот во светот ако го изневерува на својот континент. Според неа, проширувањето не е техничко прашање, туку тест за тоа дали ЕУ ќе го одбере патот на concordia или discordia, дали ќе биде Унија на правила и стандарди, или Унија на двојни стандарди и контрадикции.
Претседателката посочи дека ние можеме да направиме сè што е потребно во економијата, реформите, но сепак, нашите преговори зависат од нашите соседи и констатираше дека за разлика од Скандинавија која ги поддржа балтичките земји за ЕУ, нашите соседи често користат вето при приемот на нови членки.
„Оние соседи кои се членки на ЕУ сега се обидуваат повторно да отворат некои историски прашања поврзани со нацијата, јазикот, културата, па дури и со Европската Унија како тројански коњ за да си ги остварат овие интензивни желби. Велам дека ако регионот сака да стане членка на ЕУ, мора да бидеме свесни за регионалниот контекст.
Зошто? Затоа што мора да се поддржуваме едни со други, да се разбираме едни со други. Како можеме да очекуваме да бидеме разбрани од оние во ЕУ ако не сме подготвени да се поддржуваме едни со други?
Порача дека е крајно време да се направат промени во ЕУ за начинот на одлучување, што неодамна го потенцираше и претседателката на ЕК, Урсула Фон дер Лајен.
Темите на Самитот ja опфаќаат глобалната економија и трговија; демократијата, безбедноста и геополитичкиот ризик; енергијата и транзицијата; здравствените можности и предизвици; човековите права и социјалниот напредок, како и иновативната технологија. Овој настан претставува еден од најзначајните форуми кадешто се собираат лидери од различни сектори: државници, бизнис елити, претставници на граѓанското општество и иноватори.
Македонија
Минчев на конференција на ЕК во Црна Гора: Извештаите за нас не се формалност, туку алатка за реформи во јавната администрација

Министерот за јавна администрација, Горан Минчев, учествуваше на министерска конференција „Капацитети на јавните администрации за интеграција во ЕУ“ во Подгорица, Црна Гора, организирана од Европската комисија со поддршка на СИГМА.
На настанот учествуваа министри и претставници од земјите на Западен Балкан, Молдавија и Ерменија, како и од регионалните и меѓународните организации како ReSPA, RCC, OECD, WeBER и SIGMA.
Во излагањето во рамки на првиот дел на конференцијата, министерот Минчев изјави дека силата на јавната администрација не се одразува во бројки, туку во нејзиниот квалитет и капацитет да испорачува резултати, односно таа треба да биде двигател на реформите, гарант на правната држава и партнер во процесот на интеграцијата во Европската Унија.
Тој потенцираше дека препораките од Извештајот на СИГМА не останаа само на хартија, туку истите беа преточени во конкретни мерки и активности, интегрирани во акциски план кој веќе се спроведува, дополнително вградени и во ревизијата на Стратегијата за реформа на јавната администрација.
„Ние не гледаме на извештаите само како формалност, тие се алатка за реални промени. Реформите мора да имаат практичен ефект врз институциите и граѓаните, а не да останат декларативни“, рече министерот Минчев.
Тој смета дека е клучна улогата на меѓународната поддршка, со посебен акцент на ReSPA и SIGMA, како партнери во процесот на реформите преку обуки, експертска помош и размена на искуства со земјите-членки на ЕУ.
„Визијата на Министерството за јавна администрација е да изградиме администрација која активно ќе придонесува во креирањето и имплементацијата на европските политики. Македонија не гледа на процесот на интеграција како еднонасочен пат – нашата цел е да бидеме препознаени како сериозен партнер во Унијата и пример за лидерство во регионот“, рече министерот Минчев.
Од Министерството за јавна администрација велат дека остануваат целосно посветено на реформите кои ја носат Македонија поблиску до европското семејство, со силна заложба за создавање на модерна, ефикасна и транспарентна администрација, која ќе обезбеди институциите да бидат сервис на јавниот интерес.