Македонија
Тихомир Јанчовски: Селекцијата на скандалозните песни не ја направи комисијата

Селекцијата на песните што се застапени во книгата не е направена од нас. Ние направивме избор на првонагредените три песни и толку, вели поетот Тихомир Јанчовски, член на комисијата за конкурсот на Агенцијата за млади и спорт „Млади поети“. Исто така, додава тој, песните што предизвикаа скандал по објавувањето на книгата не се меѓу трите песни одбрани од комисијата, во која покрај него биле и Јовица Ивановски и Николина Андова Шопова.
„Од нас се бараше да ги прочитаме песните што пристигнале на конкурсот и да одбереме три најдобри песни. Во комисијата бевме Јовица Ивановски, Николина Андова Шопова и јас. Ни дадоа папки со песни, ги прочитавме, и некако, по долги консултации, одбравме песни што го освоија првото.второто и третото место. И толку. Бев на доделувањето на наградите. Добитниците ги прочитаа своите песни, а читаа и други учесници на конкурсот што беа дошле. Тогаш, една од вработените во Агенцијата за млади и спорт, на крајот, рече дека сите пристигнати песни ќе бидат објавени во книга. Дотогаш, не знаев за тоа. Ако“, пишува Јанчовски на Фејсбук.
По ова, додава тој, никој од АМС не ни се јавил, ниту нè консултирал за содржината на книгата, и за тоа кои песни треба да влезат или да не влезат во неа.
„Не сме добиле ни имејл, ни писмо, ниту некој не барал по телефон во врска со тоа. Не сме правеле никаква селекција, ниту некој од нас барал некаков извештај. Селекцијата на песните што се застапени во книгата не е направена од нас. Ние направивме избор на првонагредените три песни и толку. Пред 3 недели од нас побараа и предговор. Николина напиша предговор. Од агенцијата не ѝ јавија, ниту ѝ пратија список кои песни се застапени во книгата. Таа напиша предговор за општиот впечаток од сите песни“, вели Јанчовски.
Тој наведува дека песните што предизвикаа скандал по објавувањето на книгата не се меѓу трите песни што ги одбрале тие, а не биле ни во поширок избор.
„Да ме прашал некој кои песни треба да се објават, и да сум рекол тие и тие, може да ми бараат одговорност. Вака, некако не оди. Книгата е објавена, јас не сум добил примерок и не знам како изгледа. Книгата е објавена, и никој не очекувал скандал. Поезија… млади… Откако изби скандалот, директорот на АМС ја префрла вината врз нас. Тоа е очекувано. Ако вината е до АМС, а тој е таму директор, ќе му речат да си даде оставка. Новинарите ги љубат скандалите и едвај чекаат такво нешто. Покажувал пред камери некакво решение. кое никој од нас никогаш не го видел, и на кое нема потпис на ниеден од нас“, тврди Јанчовски.
Тој истакнува дека на конкурсот имало 70-80 песни, а објавени се 44. Според него, значи некој, сепак, направил селекција на тоа кои песни да влезат во книгата.
„Најдете го тој/таа или тие што ги селектирале песните и прашајте ги зошто баш тие. Тие што ме познаваат, знаат дека ако ме прашале мене кои песни да влезат во книгата, книгата можеби не би ни излегла“, вели Јанчовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сестринската професија со децении била потценета и маргинализирана во системот: Алиу ги сослуша претставниците на Унијата на медицински сестри

Министерството за здравство ја почитува улогата и професионалниот придонес на медицинските сестри во здравствениот систем. Најнапред, во однос на вчерашната јавна дискусија, ја информираме јавноста дека станува збор за еден од повеќето чекори во тековниот процес на системско усогласување на 12 закони во здравството. Процесот е етапен, континуиран и максимално инклузивен, со вклучување на стручни здруженија, институции од системот, комори и меѓународни партнери, истакнуваат од ова министерство откако Унијата на медицински сестри реагираше дека не се сослушани нивните ставови.
„Министерот за здравство, Азир Алиу, денес ги прими претставниците на Унијата на медицински сестри ЗМСТАС „За нас“ и ги сослуша нивните ставови. На средбата јасно беше истакнато дека процесот за усогласување на 12-те закони не е затворен ниту финализиран, туку продолжува по етапи, со можност стручните забелешки да се вградат пред влегување во собраниска процедура. Министерот апелираше процесот да не се политизира, туку да остане во рамки на професионален дијалог и аргументирани предлози, во интерес на пациентите и целокупниот здравствен систем“.
На средбата Алиу истакнал дека ја препознава реалноста дека сестринската професија со децении била потценета и маргинализирана во системот — и токму затоа тековните реформи имаат цел системски да ја унапредат нејзината позиција, статус и глас во креирањето политики.
„Воедно потенцираме дека процесот на усогласување на пакетот од 12 закони е во тек и не е завршен. Тој ќе продолжи инклузивно и отворено, а секоја заинтересирана страна ќе има можност да даде свој придонес сè до моментот кога законските решенија ќе влезат во собраниска процедура и ќе бидат разгледувани и изгласани од пратениците“.
Унијата на медицинските сестри претходно реагираше и бараше да бидат слушнати нивните ставови.
Македонија
Минчев: Европеизацијата не почнува во Брисел, почнува овде, во секоја општина, на секој шалтер, во секој службеник кој работи со чест и со интегритет

Министерството за јавна администрација денес го започна вториот циклус на генерички обуки за административните службеници во Полошкиот регион, со што продолжува реализацијата на реформската агенда за професионална, ефикасна и современа јавна администрација.
На настанот присуствуваа претставници од институциите, административни службеници, како и експерти и обучувачи вклучени во обуката.
Министерот за јавна администрација, Горан Минчев, во своето обраќање истакна дека овие обуки се дел од континуираниот процес на градење нова култура на работа и нов дух во јавниот сектор:
„Реформите во јавната администрација не се само ветувања или празни зборови во уште една владина програма, туку вистински дела што се гледаат, чувствуваат и го менуваат секојдневието на граѓаните. Нема модерна држава без модерна администрација. Нема доверба без професионални, одговорни и мотивирани службеници.“
Министерот нагласи дека со овие обуки државата поставува нов стандард во начинот на кој се грижи за своите службеници, со повеќе од 600 обучени лица од претходниот циклус, а новиот циклус продолжува со уште поголем интензитет и покриеност низ сите региони.
„Овие обуки се практични, современи, инспирирани од најдобрите европски примери и имаат за цел не само да пренесат знаење, туку и да ја менуваат културата на работење – да создадат службеници кои не работат затоа што мораат, туку затоа што сакаат да направат разлика,“ рече Минчев.
Тој потсети дека во изминатата година министерството направи сериозни чекори во реформите на јавната администрација – со нови законски решенија што ја зајакнуваат отчетноста и транспарентноста, модернизација на системот за човечки ресурси ИСУЧР, развивање на ЛМС системот за онлајн обуки и воведување на нови практики за професионализација и ефикасност.
Дополнително, тој ја нагласи важноста на јавната администрација како темел на државноста и двигател на европската интеграција:
„Европеизацијата не почнува во Брисел – таа почнува овде, во секоја општина, на секој шалтер, во секој службеник кој ја работи својата работа со чест, со почит и со интегритет.“
Како што истакна, јавната администрација не е трошок туку таа е инвестиција.
„Инвестиција во стабилност, доверба и државност. Денес градиме систем што ќе биде транспарентен, човечки и европски по дух. Сега е моментот да покажеме дека државата може да функционира поинаку – со ред, со принципи и со резултати.“
Со вториот циклус на генерички обуки, Министерството за јавна администрација продолжува да ја гради визијата за професионална, етичка и европска администрација – администрација која ќе биде гордост на државата и вистински сервис на граѓаните, нагласуваат од оваа институција.
Македонија
Адеми: Политичката асимилација на Албанците нема да помине

Денешната влада не е производ на демократски процес, туку резултат на таен и антидемократски договор, склучен во 2022 година меѓу македонските политички лидери, под диригенција на олигарсите кои ја контролираат македонската политика и самата економија на државата, истакна потпретседателот на ДУИ, Арбер Адеми.
Овој договор, како што нагласи, имаше една единствена цел: дефакторизација и политичка асимилација на Албанците, претворајќи ги од државотворен фактор во симболична фигура внатре во институциите.
„Овој мрачен проект имаше за цел да ја поништи реалната политичка моќ на Албанците, да ја обесмисли албанската гласачка волја и да го негира легитимитетот на нивното политичко претставување.
И по парламентарните избори, овој план се претвори во пракса: откако албанскиот народ јасно проговори преку гласачките кутии, лидерот на ВМРО избра да го погази тој глас, внесувајќи во владата политички губитници од албанскиот блок – оние што не добија легитимитет од народот.
Тоа беше отворен чин на негирање на демократијата и еднаквоста, јасна и понижувачка порака до секој Албанец: „Вашиот глас не вреди. Вашиот збор не се слуша. За вашата судбина одлучуваат други, не вие.“
Тоа, според него, не е демократија, туку како што велат, мајоризација.
„Тоа е кршење на духот и буквата на Охридскиот мировен договор, документот кој ја гарантира функционалната мултиетничка демократија и еднаквата одговорност меѓу сите заедници, особено меѓу Албанците и Македонците – како двете столбови на оваа држава.
Секое отстапување од овој концепт ги поткопува темелите на државата и го загрозува меѓуетничкиот соживот.
Во изминатите 16 месеци, оваа влада се покажа како лабораторија на политичката асимилација.
Албанскиот политички фактор е исклучен од одлучувањето, маргинализиран во секој сегмент на јавниот живот – од економијата до културата, од администрацијата до централните институции.
Дури и таму каде што Албанците формално имаат позиции, тие се без реална политичка моќ.
Тоа не е претставеност – тоа е институционално понижување“.
Како што нагласи Адеми, се губи смислата Албанците да се натпреваруваат на избори, да изработуваат програми и да бараат доверба од народот, ако по изборите учеството во институциите не зависи од албанскиот глас, туку од волјата на македонскиот лидер.
„Што смисла има легитимитетот, ако тој се игнорира од мандатарот и се заменува со политички пазари зад затворени врати?
Тоа е политичка асимилација, процес насочен кон одземање на државотворниот статус на Албанците и нивно сведување на декоративна улога во владата.
Но овој план, колку и да е таен и добро испланиран, е осуден на неуспех.
Зашто Албанците повеќе не се набљудувачи на сопствената судбина.
Тие ја препознаа старата игра на Белград, облечена со костум од Скопје.
Тие го разбраа сервилизмот на албанските вазали кои прифатија да бидат дел од влада што го негира сопствениот народ.
На 19 октомври, Албанците ќе зборуваат на јазик кој не бара превод – на јазикот на политичкото достоинство.
Тој ден ќе биде референдум на националниот легитимитет, ден кога ќе се урне проектот на асимилацијата и ќе се возроди етничката еднаквост.
Албанците се автохтони и државотворни.
Тие не можат да бидат исклучени, игнорирани или заменети според желбата на некого“, потенцира Адеми.